សម្តេច ម៉ែន សំអន ៖ ការបង្កើនវិស័យវិនិយោគទុន គឺជាសក្ខីភាពសបញ្ជាក់ពីការយកចិត្តទុកដាក់របស់ថ្នាក់ដឹកនាំ ដែលជាកម្លាំងចលករយ៉ាងសំខាន់ជំរុញសេដ្ឋកិច្ចជាតិឲ្យកាន់តែរឹងមាំ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានថ្លែងថា ការបង្កើនវិស័យវិនិយោគទុន គឺជាសក្ខីភាពសបញ្ជាក់ពីការយកចិត្តទុកដាក់របស់ថ្នាក់ដឹកនាំ ចំពោះការវិនិយោគទុនក្នុងស្រុក ដែលជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចជាតិឲ្យកាន់តែរឹងមាំ និងមានភាពទាក់ទាញខ្លាំងឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន បានថ្លែងបែបនេះពេលអញ្ជើញជាអធិបតីដ៏ខ្ពង់ខ្ពស់ក្នុងពិធីកាត់ខ្សែបូសម្ពោធដាក់ឲ្យដំណើរការជាផ្លូវការនូវក្រុមហ៊ុន SSN Food Industry Co., Ltd និងហាងកាហ្វេ Kave Kafe ដែលមានទីតាំងស្ថិតនៅអគារលេខ ១ តាមបណ្តោយផ្លូវជាតិលេខ ១ ខណ្ឌច្បារអំពៅ រាជធានីភ្នំពេញ កាលពីព្រឹកថ្ងៃសុក្រ ៨ រោច ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី ១០ ខែមេសា ឆ្នាំ ២០២៦ ថ្មីៗ នេះ។

នៅក្នុងឱកាសដ៏វិសេសវិសាលនោះ កញ្ញា ស៊ុយ ស្រីណុច នាយកប្រតិបត្តិ នៃក្រុមហ៊ុន SSN Food Industry Co., Ltd បានថ្លែងអំណរគុណយ៉ាងជ្រាលជ្រៅបំផុតជូនចំពោះ សម្តេចកិត្តិសង្គហបណ្ឌិត ដែលបានចំណាយពេលវេលាដ៏មានតម្លៃអញ្ជើញជាអធិបតី ដែលនេះគឺជាការផ្ដល់កិត្តិយស និងការលើកទឹកចិត្តយ៉ាងធំធេងសម្រាប់សហគ្រិនក្នុងស្រុក។

នៅក្នុងពិធីនោះផងដែរ កញ្ញា ស៊ុយ ស្រីណុច បានលើកឡើងពីចក្ខុវិស័យដ៏វែងឆ្ងាយរបស់ក្រុមហ៊ុនថា ក្រុមហ៊ុនមានការប្តេជ្ញាចិត្តយ៉ាងមោះមុត ក្នុងការផ្តល់ជូនអតិថិជននូវបទពិសោធដ៏ល្អឥតខ្ចោះលើផ្នែកម្ហូបអាហារ ភេសជ្ជៈ សេវាកម្មទេសចរណ៍ និងកីឡា ប្រកបដោយគុណភាព និងស្តង់ដារ។ បច្ចុប្បន្ន ក្រុមហ៊ុនកំពុងជោគជ័យលើការគ្រប់គ្រងភោជនីយដ្ឋាន Little Sheep Hot Pot ចំនួន ៣ សាខា និងគ្រោងនឹងបើកសម្ពោធសាខាទី ៤ នៅផ្សារទំនើបអ៊ីអនម៉ល ភ្នំពេញ នាពេលឆាប់ៗ ខាងមុខ ដើម្បីឆ្លើយតបនឹងការគាំទ្ររបស់អតិថិជន។ លើសពីនេះ ក្រុមហ៊ុន ក៏កំពុងពង្រីកបន្ថែមទៀតលើវិស័យកីឡា និងការកម្សាន្ត តាមរយៈគម្រោង “Hay Ground” ដែលនឹងក្លាយជាមជ្ឈមណ្ឌលសម្រាប់សកម្មភាពកីឡា សុខភាព និងការរស់នៅបែបប្រណិតភាព។

អ្វីដែលកាន់តែពិសេសនោះ ក្រុមហ៊ុន SSN មិនត្រឹមតែផ្ដោតលើអាជីវកម្មប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងសកម្មក្នុងកិច្ចការមនុស្សធម៌ និងការងារសង្គម ស្របតាម យុទ្ធសាស្ត្របញ្ចកោណ ដំណាក់កាលទី ១ របស់រាជរដ្ឋាភិបាល នីតិកាលទី ៧។ ក្រុមហ៊ុន ប្ដេជ្ញាបង្កើតឱកាសការងារ ពង្រឹងសមត្ថភាពធនធានមនុស្ស និងអនុវត្តអាជីវកម្មដោយផ្អែកលើសុចរិតភាព តម្លាភាព និងការទទួលខុសត្រូវខ្ពស់។

សម្តេចកិត្តិសង្គហបណ្ឌិត ម៉ែន សំអន បន្ថែមថា ការបង្កើនវិស័យវិនិយោគទុន គឺជាសក្ខីភាពសបញ្ជាក់ពីការយកចិត្តទុកដាក់របស់ថ្នាក់ដឹកនាំ ចំពោះការវិនិយោគទុនក្នុងស្រុក ដែលជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចជាតិឲ្យកាន់តែរឹងមាំ និងមានភាពទាក់ទាញខ្លាំងឡើង។

គួរបញ្ជាក់ផងដែរថា ក្រុមហ៊ុន SSN គឺជាក្រុមហ៊ុនវិនិយោគពហុវិស័យ ដែលផ្ដោតសំខាន់លើវិស័យកសិកម្ម ឧស្សាហកម្មចំណីអាហារ និងសេវាកម្ម ដោយប្រកាន់ខ្ជាប់នូវការផ្ដល់តម្លៃជូនអតិថិជនជាចម្បងបំផុត៕
អត្ថបទ ៖ វិមាន