វាលធំឋានសួគ៌លោកិយ ហ៊ុំព័ទ្ធដោយពពក ជួរភ្នំ ព្រៃឈើ មានចម្ងាយ​ជាង ៥០​ ពី​ក្រុងបានលុង

វាលធំស្ថិតនៅក្នុងឧទ្យានជាតិវីរៈជ័យត្រូវបានគេចាត់ទុកថាជាឋានសួគ៌លោកិយ ដោយសារតែមានទេសភាពស្រស់ស្អាត ដែលហ៊ុំព័ទ្ធទៅដោយពពក ជួរភ្នំ និងព្រៃឈើ។

អ្នកជំនាញខាងបរិស្ថាន និងទេសចរណ៍បានលើកឡើងថា នៅតំបន់អាស៊ីអាគ្នេយ៍យើងនេះ គឺគ្មានកន្លែងណាដែលមានទេសភាពស្អាតលើសវាលធំនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ញ៉ែម សំអឿន អភិបាលនៃគណៈអភិបាលខេត្តរតនគិរីបានគូសបញ្ជាក់ថា វាលធំស្ថិតនៅក្នុងឧទ្យានជាតិវីរៈជ័យ ហើយជាតំបន់ខ្ពង់រាបមានកម្ពស់ជាមធ្យមជាង ៣០០ ម៉ែត្រ ដែលអាចខ្ពស់ជាងកម្ពស់ភ្នំទូទៅនៅក្នុងខេត្ត។

បច្ចុប្បន្នផ្លូវធ្វើដំណើរទៅកាន់វាលធំគឺមិនទាន់មានភាពងាយស្រួលនៅឡើយទេ។ ការធ្វើដំណើរពីទីរួមខេត្តឆ្ពោះទៅស្រុកតាវែងមានចម្ងាយប្រហែល ៣០ គីឡូម៉ែត្រ ហើយបន្តទៅវាលធំទៀតសរុបចម្ងាយជិត ៥០ គីឡូម៉ែត្រ ដែលអាចចំណាយពេលធ្វើដំណើរពី ១ ម៉ោង ទៅ ២ ម៉ោង។

លោក ញ៉ែម សំអឿន បានឲ្យដឹងថា ខណៈ​តំបន់នេះមិនទាន់មានការរៀបចំឬកែច្នៃជាលក្ខណៈទ្រង់ទ្រាយធំនៅឡើយ ប្រសិនមានការវិនិយោគទៅលើហេដ្ឋារចនាសម្ព័ន្ធផ្លូវថ្នល់ ជាពិសេសបើសិន​មានសាងសង់​ព្រលានយន្តហោះ នឹងជួយជំរុញវិស័យទេសចរណ៍នៅតំបន់នេះឱ្យរឹតតែមានសក្តានុពល ទាំងទេសចរណ៍បែបវប្បធម៌របស់បងប្អូនជនជាតិភាគតិច និងកសិទេសចរណ៍៕