អាជ្ញាធរខណ្ឌ៧មករា បន្តចុះរៀបចំសណ្តាប់ធ្នាប់រំដោះចិញ្ចើមផ្លូវសម្រាប់ថ្មើរជើង ជុំវិញបរិវេណផ្សារអូរឫស្សី

រដ្ឋបាលខណ្ឌ៧មករា បានបន្តយកចិត្តទុកដាក់ក្នុងការចុះរៀបចំសណ្តាប់ធ្នាប់ តាមបណ្តោយផ្លូវជុំវិញបរិវេណផ្សារអូរឫស្សី ស្ថិតក្នុងសង្កាត់អូរឫស្សី១ ខណ្ឌ៧មករា ដើម្បីរបៀបរៀបរយ ពិសេសទុកចិញ្ចើមផ្លូវសម្រាប់ពលរដ្ឋ និងភ្ញៀវ ថ្មើរជើង។

ការចុះរៀបចំនេះធ្វើឡើងកាលពីវេលាព្រឹកថ្ងៃទី០៣ ខែឧសភា ឆ្នាំ២០២៦ ក្រោមការចង្អុលណែនាំផ្ទាល់ដោយ លោក ថេង សុថុល អភិបាលនៃគណៈអភិបាលខណ្ឌ៧មករា និងដឹកនាំកម្លាំងគណៈបញ្ជាការឯកភាពដោយលោក ណុប ផា អភិបាលរងខណ្ឌ នៅតាមបណ្តោយផ្លូវលេខ១១១ , ផ្លូវលេខ១៦៦ និងផ្លូវលេខ១៤១។

លោកណុប ផា អភិបាលរងខណ្ឌ បានឲ្យដឹងថា  កិច្ចការងាររៀបចំសណ្តាប់ធ្នាប់នេះ ក្នុងនាមអាជ្ញាធរ នៃរដ្ឋបាលខណ្ឌ ក្រោមការដឹកនាំរបស់លោកអភិបាល គឺតែងតែចុះរៀបចំនៅតាមដងផ្លូវនានាតូចធំទាំងអស់ក្នុងមូលដ្ឋាន សំដៅធានាបាននូវសោភ័ណ្ឌភាពរបៀបរៀបរយល្អ ពិសេសការរំដោះចិញ្ចើមផ្លូវសាធារណៈទុកសម្រាប់ការថ្មើរជើង។

ជាក់ស្តែង កាលពីព្រឹកថ្ងៃទី០៣ ខែឧសភា ឆ្នាំ២០២៦ កំឡុងការចុះអនុវត្តការរៀបចំ អាជ្ញាធរចម្រុះ ក៏បានជួបឧបសគ្គតិចតួចដែលបានរារាំងដល់ដំណើរការរៀបចំ ដោយមានពលរដ្ឋមួយគ្រួសារ រស់នៅលើកំណាត់ផ្លូវលេខ១១១ បានយកថ្មជាច្រើនទៅចាក់លើចិញ្ចើមផ្លូវសាធារណៈមុខលំនៅឋានផ្ទាល់របស់ខ្លួន ដែលបានធ្វើឲ្យបិទទាំងស្រុងដល់ការធ្វើដំណើរដោយថ្មើរជើងរបស់ពលរដ្ឋ។

ទន្ទឹមនឹងនោះ អាជ្ញាធរបានសម្រេចកាយ និងលើកថ្មខាងលើចេញពីចិញ្ចើមផ្លូវសាធារណៈ និងបានណែនាំដល់ម្ចាស់ផ្ទះ អំពីការធ្វើបំពានដោយខុសច្បាប់ មកលើទីតាំងសាធារណៈដែលគ្រប់គ្រងដោយអាជ្ញាធររដ្ឋអំណាច។

លោកអភិបាលរងខណ្ឌ បញ្ជាក់បន្ថែមថា ៖ ការចុះអនុវត្តរៀបចំសណ្តាប់ធ្នាប់នេះ ពុំបានធ្វើឡើងដើម្បីតម្រូវចិត្តបុគ្គលណាមួយនោះឡើយ វាគឺកិច្ចការងារចំបាច់របស់អាជ្ញាធរ ដែលត្រូវធ្វើដើម្បីផលប្រយោជន៍រួមរបស់ប្រជាជន និងសង្គមជាតិ៕អត្ថបទ ៖ រដ្ឋា