រដ្ឋមន្ត្រីយុត្តិធម៌៖ការសម្រុះសម្រួលវិវាទក្រៅប្រព័ន្ធតុលាការ ជាយន្តការឈ្នះៗសម្រាប់ភាគីទាំងអស់ ជាជាងការតតាំងក្ដី

រដ្ឋមន្រ្តីក្រសួងយុត្តិធម៌ លោក កើត រិទ្ធ បានគូសបញ្ជាក់ថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ គឺជាយន្តការឈ្នះៗសម្រាប់ភាគីទាំងអស់ ដោយក្នុងន័យនេះ លោកលើកទឹកចិត្តឱ្យមានការប្រើយន្តការសម្រុះសម្រួលក្រៅប្រព័ន្ធតុលាការនេះ បើសិនជាអាចចៀសបានពីការតតាំងរឿងក្ដីនៅតុលាការ។  

លោកឧបនាយករដ្ឋមន្ត្រី កើត រិទ្ធ ដែលជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការផង បានថ្លែងរំលឹកពីគុណតម្លៃរបស់អាជ្ញាធរជាតិមួយនេះ ក្នុងការរួមចំណែកបង្កើនសុខដុមរមនានៅក្នុងសង្គមជាតិ។ ខណៈក្នុងរយៈពេលពីរឆ្នាំមកនេះ លោក ថា ការដោះស្រាយរបស់អាជ្ញាធរជាតិនេះបានជាង៨០០ករណី គឺស្មើនឹងការរំលែកបន្ទុកតុលាការបានប្រមាណជាង២៤០០ករណី។

លោកបានលើកឡើងក្នុងសិក្ខាសាលាថ្នាក់ជាតិស្ដីពីការធ្វើឱ្យប្រសើរឡើងនូវយន្តការដោះស្រាយវិវាទក្រៅប្រព័ន្ធតុលាការ កាលពីសប្ដាហ៍មុន ថា ការសម្រុះសម្រួលមួយ ទោះបីវាមិនល្អឥតខ្ចោះ ប៉ុន្តែវាគឺជាយន្តការឈ្នះៗសម្រាប់ភាគីទាំងអស់ សំដៅរួមចំណែកបង្កើនសុខដុមរមនានៅក្នុងសង្គម។ ផ្ទុយទៅវិញ លោក ថា ដំណើរការរឿងក្ដីមួយ ទោះបីជាល្អឥតខ្ចោះទៅតាមច្បាប់យ៉ាងណាក៏ដោយ ក៏ប៉ុន្តែវាគឺជាយន្តការដែលសម្រេចឱ្យភាគីម្ខាងឈ្នះ ភាគីម្ខាងទៀតចាញ់។

លោកនិយាយថា«រឿងក្ដីដែលឆ្លងទៅតុលាការ គឺភាគីមិនមែនចង់ឈ្នះចាញ់ទេ តែភាគីដណ្ដើមគ្នាដើម្បីឈ្នះ»។ ក្នុងន័យនេះ លោកបានផ្ដាំថា ចៀសក្ដីបានចៀសទៅ ចៀសក្ដីបានមករកអាជ្ញាធរជាតិដោះស្រាយវិវាទក្រៅប្រព័ន្ធតុលាការ។

សម្រាប់លោករដ្ឋមន្ត្រីក្រសួងយុត្តិធម៌ ការឈានដល់ដំណើរការរឿងក្ដីនៅស្ថាប័នតុលាការ គឺមិនត្រឹមតែកាត់តែក្ដីប៉ុណ្ណោះទេ តែថែមទាំងត្រូវកាត់ទាំងមនោសញ្ចេតនាទៀត សូម្បីតែសាច់ញាតិ។ ខណៈនៅពេលតុលាការកាត់ក្ដីឱ្យភាគីម្ខាងឈ្នះ ភាគីម្ខាងទៀត ដែលជាអ្នកចាញ់ នឹងស្រែកថា អយុត្តិធម៌។

ប៉ុន្តែតាមរយៈដំណោះស្រាយរបស់ដោះស្រាយវិវាទក្រៅប្រព័ន្ធតុលាការ លោក ថា ភាគច្រើនភាគីទាំអស់សម្ដែងក្ដីរំភើប ដោយឈ្នះទាំងសងខាង៕

ដោយ៖ ធឿន វ៉ាន់សុង