ព័ត៌មានអន្ដរជាតិ

លោក ត្រាំ គំរាមបំផ្លាញអ៊ីរ៉ង់ជាថ្មី បើទីក្រុងតេហេរ៉ង់ ហ៊ានវាយប្រហារនាវាអាមេរិក

បានផុស

១ ខែ មុន

នៅ

ថ្ងៃអង្គារ ៥ ឧសភា ២០២៦

ដោយ

ស្ថានភាពនៅមជ្ឈិមបូព៌ាកាលពីថ្ងៃចន្ទ (ត្រូវយប់ថ្ងៃអង្គារម៉ោងនៅកម្ពុជា) បានបង្កឱ្យមានភាពតានតឹងកាន់តែខ្លាំងជាថ្មីម្តងទៀត ដោយសហរដ្ឋអាមេរិក បានបើកការវាយប្រហារលើទូកល្បឿនលឿនរបស់អ៊ីរ៉ង់ ចំណែកអ៊ីរ៉ង់តបវិញដោយបាញ់លើឃ្លាំងប្រេងរបស់ប្រទេសអារ៉ាប់រួម។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមាន ថា យោធាអាមេរិកនឹងបំផ្លាញអ៊ីរ៉ង់ចោល ប្រសិនបើទីក្រុងតេហេរ៉ង់ហ៊ានវាយប្រហារនាវាអាមេរិកនោះ ខណៈភាពតានតឹងជុំវិញច្រកសមុទ្រហ័រមូស (Hormuz) ជំរុញឱ្យបទឈប់បាញ់រវាងប្រទេសទាំងពីរឈានដល់កម្រិតក្តៅបំផុតជាថ្មីទៀត។

ប្រធានាធិបតីសហរដ្ឋអាមេរិក លោក ដូណាល់ ត្រាំ ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Al Jazeera ផ្សាយថ្ងៃទី០៤ ខែឧសភា ឆ្នាំ២០២៦ បានឱ្យដឹងថា អរិភាពបានបន្តក្នុងតំបន់មជ្ឈិមបូព៌ាកាលពីថ្ងៃចន្ទ ខណៈអ៊ីរ៉ង់បានវាយប្រហារប្រទេសអារ៉ាប់រួម យ៉ាងណា លោក ត្រាំ អះអាងថា យោធាអាមេរិកបានវាយប្រហារទូកតូចៗចំនួន ៧គ្រឿងរបស់អ៊ីរ៉ង់នៅជិតច្រក Hormuz ។

នៅក្នុងបទសម្ភាសន៍ជាមួយសារព័ត៌មាន Fox News លោក ត្រាំ បានគូសបញ្ជាក់ពីអំណាចយោធារបស់ទីក្រុងវ៉ាស៊ីនតោន ហើយប្រធានាធិបតីអាមេរិករូបនេះនៅបន្តការគំរាមកំហែងលើអ៊ីរ៉ង់ជាបន្តបន្ទាប់។

លោក ត្រាំ លើកឡើងថា៖ « យើងមានអាវុធ និងគ្រាប់រំសេវច្រើនទៀត។ យើងមានឧបករណ៍ល្អបំផុត! យើងមានរបស់របរ[ទ្រព្យសម្បត្តិយោធា] នៅទូទាំងពិភពលោក យើងមានមូលដ្ឋានទ័ពនៅទូទាំងពិភពលោក។ ពួកវាទាំងអស់នោះមានស្តុកទុកដោយឧបករណ៍យោធា។ យើងអាចប្រើប្រាស់របស់របរទាំងអស់នោះបាន ហើយយើងនឹងប្រើប្រាស់ ប្រសិនបើយើងត្រូវការវា»។

គួរបញ្ជាក់ថា យោធាសហរដ្ឋអាមេរិកបានចាប់ផ្តើមអនុវត្តផែនការរបស់ លោក ត្រាំ នៅថ្ងៃចន្ទ ដែលមានឈ្មោះថា «Project Freedom» ដើម្បីណែនាំកប៉ាល់ឆ្លងកាត់ Hormuz និងបំបែកការបិទផ្លូវអ៊ីរ៉ង់ លើផ្លូវទឹកដឹកជញ្ជូនយុទ្ធសាស្ត្រនេះ។

មិនតែប៉ុណ្ណោះ ទីក្រុងវ៉ាស៊ីនតោនអះអាងថា ខ្លួនបានជួយនាវាពាណិជ្ជកម្មអាមេរិកពីរគ្រឿងឆ្លងកាត់ច្រកសមុទ្រ Hormuz ប៉ុន្តែគេហទំព័រតាមដាននាវាបង្ហាញថា ចរាចរណ៍ឆ្លងកាត់ផ្លូវទឹកនេះភាគច្រើននៅតែផ្អាកនៅឡើយ៕

ប្រែសម្រួល៖ ណឺ មិនា

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា