អ៊ីរ៉ង់ ថា ការ​គ្រប់គ្រង​ច្រកសមុទ្រ Hormuz ដូច​មាន​គ្រាប់បែកនុយក្លេអ៊ែរនៅ​ក្នុង​ដៃ

ស្របពេលដែលស្ថានភាពនៅមជ្ឈិមបូព៌ាកំពុងតែឡើងកម្ដៅខ្លាំង ទីប្រឹក្សារបស់មេដឹកនាំកំពូលអ៊ីរ៉ង់ បានចេញមកថ្លែងសារយ៉ាងមុតស្រួច ដោយប្រៀបធៀបឥទ្ធិពលនៃការគ្រប់គ្រងច្រកសមុទ្រ Hormuz ថាមានតម្លៃស្មើនឹងការមានគ្រាប់បែកនុយក្លេអ៊ែរនៅក្នុងដៃ។ មន្ត្រីរូបនេះ បានបញ្ជាក់ថា ការដែលអាចសម្រេចជោគវាសនាសេដ្ឋកិច្ចពិភពលោកបានតាមរយៈការសម្រេចចិត្តតែមួយលើផ្លូវទឹកនេះ គឺជាឱកាសមាសដ៏ធំធេង ដែលអ៊ីរ៉ង់នឹងមិនបោះបង់ចោលជាដាច់ខាត។

តាម​ការ​ផ្សាយ​របស់ AFP លោក Mohammad Mokhber ដែលជាទីប្រឹក្សារបស់មេដឹកនាំកំពូលអ៊ីរ៉ង់ បានអះអាងកាលពីថ្ងៃទី៨ ខែឧសភា ថា អ៊ីរ៉ង់ នឹងការពារសមិទ្ធផល ដែលខ្លួនទទួលបានពីជម្លោះនេះ ហើយត្រៀមខ្លួន នឹងកែប្រែច្បាប់អន្តរជាតិ ជុំវិញការប្រើប្រាស់ច្រកសមុទ្រ Hormuz តាមដែលអាចធ្វើទៅបាន។ លោកថែមទាំងបានបញ្ជាក់ថា អ៊ីរ៉ង់ហ៊ានធ្វើសកម្មភាពតែម្នាក់ឯង ដោយមិនខ្វល់ពីអ្នកណា ប្រសិនបើចាំបាច់ ដើម្បីធានាថា ការគ្រប់គ្រងផ្លូវទឹកនេះ នៅតែស្ថិតក្នុងដៃរបស់ខ្លួន។

ទន្ទឹមនឹងការថ្លែងសារដ៏តឹងសរសៃកនេះ ក៏មានសេចក្តីរាយការណ៍មកថា អ៊ីរ៉ង់បានបង្កើតស្ថាប័នថ្មីមួយ ដើម្បីត្រួតពិនិត្យ និងប្រមូលថ្លៃសេវាពីកប៉ាល់ដឹកទំនិញទាំងឡាយណា ដែលចង់ឆ្លងកាត់ច្រកសមុទ្រដ៏សំខាន់នេះ។ កន្លងមក ច្រកសមុទ្រ Hormuz គឺជាផ្លូវដឹកជញ្ជូនប្រេងដ៏សំខាន់ ដែលផ្គត់ផ្គង់ដល់ទៅ ២០ភាគរយនៃតម្រូវការប្រេងទូទាំងពិភពលោក ហើយក្នុងពេលសន្តិភាព កប៉ាល់ទាំងអស់អាចឆ្លងកាត់ដោយសេរី ប៉ុន្តែពេលនេះអ្វីៗបានប្រែប្រួលអស់ទៅហើយ។

ចាប់តាំងពីសង្រ្គាមបានផ្ទុះឡើង អ៊ីរ៉ង់បានបិទច្រកសមុទ្រនេះ និងអនុញ្ញាតឲ្យ​តែនាវារបស់ប្រទេសណា ដែលខ្លួនចាត់ទុកថាជា «មិត្ត» ប៉ុណ្ណោះ ដែលអាចឆ្លងកាត់បាន ដោយយកលេសថាធ្វើឡើង ដើម្បីសន្តិសុខជាតិ។ សម្រាប់ក្រុមហ៊ុនដឹកជញ្ជូនណា ដែលចង់ឆ្លងកាត់ ពួកគេត្រូវស្ថិត​ក្រោម​ការត្រួតពិនិត្យយ៉ាងតឹងរ៉ឹងពីសំណាក់កងឆ្មាំបដិវត្តន៍អ៊ីរ៉ង់ (IRGC) ហើយត្រូវទទួលបានលេខកូដបញ្ជាក់ រួមជាមួយការណែនាំផ្លូវធ្វើដំណើរយ៉ាងច្បាស់លាស់ ទើបអាចធ្វើដំណើរទៅមុខបាន។

ស្ថានភាពកាន់តែអាក្រក់ទៅៗ នៅពេលដែលសហរដ្ឋអាមេរិក បានចាប់ផ្តើមអនុវត្តវិធានការបិទខ្ទប់កំពង់ផែរបស់អ៊ីរ៉ង់ កាលពីពាក់កណ្តាលខែមេសាកន្លងទៅ ក្រោយពីការចរចានៅក្នុងប្រទេសប៉ាគីស្ថាន មិនទទួលបានលទ្ធផល។ បើទោះបីជាមានសម្ពាធខ្លាំងពីអាមេរិកយ៉ាងណាក៏ដោយ ក៏អ៊ីរ៉ង់នៅតែបង្ហាញជំហររឹងរូស និងកាន់តែរឹតបន្តឹងការគ្រប់គ្រងលើច្រកសមុទ្រ Hormuz នេះដដែល។ ការប៉ះទង្គិចគ្នា ដោយអាវុធរវាងប្រទេសទាំងពីរ នៅតំបន់ច្រកសមុទ្រនេះ កាលពីថ្ងៃទី ៧ ខែឧសភា បានធ្វើឲ្យក្តីសង្ឃឹម ក្នុងការស្វែងរកសន្តិភាព កាន់តែរសាត់​ឆ្ងាយទៅៗ៕

ប្រែសម្រួល៖ ឈាង