ព័ត៌មានអន្ដរជាតិ

តុលាការពាណិជ្ជកម្មអាមេរិកសម្រេចថា ពន្ធ ១០% របស់ ត្រាំ គឺខុសច្បាប់

បានផុស

២ ខែ មុន

នៅ

ថ្ងៃសៅរ៍ ៩ ឧសភា ២០២៦

ដោយ

តុលាការសហព័ន្ធទទួលបន្ទុកខាងពាណិជ្ជកម្មរបស់សហរដ្ឋអាមេរិក កាលពីថ្ងៃព្រហស្បតិ៍ទី ៧ ឧសភា បានសម្រេចថា ពន្ធ ១០% ដែលលោកប្រធានាធិបតី ដូណាល់ ត្រាំ បានដាក់លើទំនិញនាំចូលលើបណ្ដាប្រទេសជុំវិញពិភពលោកកាលពីខែកុម្ភៈ គឺខុសច្បាប់ ខណៈក្រសួងយុត្តិធម៌បានប្តឹងឧទ្ធរណ៍ប្រឆាំងនឹងការសម្រេចនោះ។ នេះបើតាមការចុះផ្សាយរបស់បណ្ដាញទូរទស្សន៍ ABC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីសម្រេចដែលមានសម្លេងគាំទ្រ ២ ទល់នឹង ១ ចៅក្រមនៅតុលាការពាណិជ្ជកម្មអន្តរជាតិរបសអាមេរិក បាននិយាយថា រដ្ឋបាលលោក ត្រាំ បានបកស្រាយច្បាប់ដែលប្រើនោះខុស ដើម្បីបង្ហាញអំពីភាពត្រឹមត្រូវនៃពន្ធគយដ៏ទូលំទូលាយរបស់ខ្លួន។

វាគឺជាលើកទី២ហើយក្នុងឆ្នាំនេះ ដែលគោលនយោបាយពន្ធរបស់លោក ត្រាំ ត្រូវបានតុលាការអាមេរិកចាត់ទុកថាខុសច្បាប់។

កាលពីដើមឆ្នាំ តុលាការកំពូលអាមេរិកបានគាំទ្រសេចក្តីសម្រេចរបស់តុលាការពាណិជ្ជកម្មអន្តរជាតិ ដោយថា ត្រាំ បានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសនៅជុំវិញពិភពលោក ដោយខុសច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧។ ជាការឆ្លើយតប លោក ត្រាំ បានប្រកាសពន្ធ ១០% ដោយប្រើច្បាប់ពាណិជ្ជកម្មឆ្នាំ ១៩៧៤ លើគ្រប់ប្រទេសទាំងអស់ និងចូលជាធរមាននៅថ្ងៃទី ២៤ ខែកុម្ភៈ ហើយរំពឹងផុតកំណត់នៅចុងខែកក្កដា។

មេធាវីក្រសួងយុត្តិធម៌កាលពីថ្ងៃសុក្រ បានដាក់ពាក្យបណ្តឹងឧទ្ធរណ៍នៅតុលាការពាណិជ្ជកម្មអន្តរជាតិ ដោយបង្ហាញថាពួកគេមានគម្រោងជំទាស់នឹងសេចក្តីសម្រេចកាលពីថ្ងៃព្រហស្បតិ៍។

ដោយឡែក លោក ត្រាំ វិញ បានរិះគន់លើការសម្រេចរបស់តុលាការដោយបន្ទោសលើ «ចៅក្រមឆ្វេងនិយមជ្រុល២រូប» ដែលគាំទ្រការសម្រេច។ លោកថ្លែងយ៉ាងដូច្នេះថា៖ «គ្មានអ្វីធ្វើឱ្យខ្ញុំភ្ញាក់ផ្អើលជាមួយនឹងតុលាការនោះទេ។ គ្មានអ្វីធ្វើឱ្យខ្ញុំភ្ញាក់ផ្អើលនោះទេ។ ពេលយើងទទួលបានសេចក្តីសម្រេចមួយ ហើយយើងធ្វើវាតាមផ្លូវផ្សេង»។

ទោះបីជាយ៉ាងណាក៏ដោយ គេក៏មិនទាន់ច្បាស់លាស់ដែរថាតើការសម្រេចដដែលនឹងបង្កការអនុវត្តបែបណាទៅមុខទៀត៕