កម្ពុជា ឡើង ៥ ចំណាត់ថ្នាក់ ក្នុងតារាង FIFA ក្រោយឈ្នះ ប៊ូតាន និងហុងកុង

ក្រុមបាល់ទាត់ជម្រើសជាតិ កម្ពុជា បានឡើង ៥ ចំណាត់ថ្នាក់ នៅក្នុងតារាងចំណាត់ថ្នាក់ FIFA Ranking បន្ទាប់ពីឈ្នះក្រុមជម្រើសជាតិ ប៊ូតាន និងចិនហុងកុង ក្នុងការប្រកួតមិត្តភាពនាដើមខែ មិថុនា ឆ្នាំ ២០២៦។

នាមុនការប្រកួតមិត្តភាពទាំង ២ ប្រកួតនេះ គឺជម្រើសជាតិ កម្ពុជា ស្ថិតនៅចំណាត់ថ្នាក់លេខ ១៨០ ពិភពលោក។ បច្ចុប្បន្នក្រុមគោព្រៃបានហក់ឡើងមកលេខ ១៧៥ ក្នុងចំណាត់ថ្នាក់ FIFA ក្រោយឈ្នះ ប៊ូតាន ៤-០ កាលពីថ្ងៃទី ៤ ខែ មិថុនា និងឈ្នះ ហុងកុង ២-០ កាលពីថ្ងៃទី ៩ ខែ មិថុនា ឆ្នាំ ២០២៦។

ជ័យជម្នះទាំង ២ ប្រកួតនេះ ក្រៅតែពីធ្វើឱ្យ កម្ពុជា ល្អ​ប្រសើរ​ក្នុង​​តារាងចំណាត់ថ្នាក់ពិភព​លោក​ FIFA គឺវាបានផ្តល់ស្នាមញញឹមឡើងវិញជូនអ្នកគាំទ្រ កម្ពុជា បន្ទាប់ពីខកខានស្គាល់រស់ជាតិបែបនេះជិត ២ ឆ្នាំ។ រឿងដ៏ពិសេសបំផុត គឺក្រុមជម្រើសជាតិ កម្ពុជា ដៃទី ១ បានយកឈ្នះលើក្រុម ហុងកុង ជាលើកដំបូងក្នុងរយៈពេល ៦៩ ឆ្នាំ។

គួរបញ្ជាក់ ថា តារាង​ចំណាត់ថ្នាក់ FIFA ដែលបានធ្វើបច្ចុប្បន្នភាពខាងលើ មិនទាន់អចិន្ត្រៃយ៍នៅឡើយទេ ដោយនឹងមានការប្រែប្រួលបន្ថែមទៀត ដោយសារការប្រកួតជម្រើសជាតិ ជាពិសេសព្រឹត្តិការណ៍ World Cup 2026 នៅមានជាបន្តបន្ទាប់ទៀត៕

អត្ថបទ៖ សេម កុសល