ព័ត៌មានជាតិ

ពីវេទិកាគយ និង FASMEC វិស័យឯកជនស្នើជួយដោះស្រាយនីតិវិធីចុះបញ្ជី និងបញ្ហាសារពើពន្ធដើម្បីជំរុញ SME រីកចម្រើន

បានផុស

១០ ម៉ោង មុន

នៅ

ថ្ងៃព្រហស្បតិ៍ ១១ មិថុនា ២០២៦

ដោយ

វិស័យឯកជនបានលើកយកពីឧបសគ្គមួយចំនួន ដែលធ្វើឲ្យរាំងស្ទះដល់ការអភិវឌ្ឍសហគ្រាសខ្នាតតូចនិងមធ្យមនៅកម្ពុជាឲ្យរីកចម្រើន។

ឧកញ៉ា តែ តាំងប៉ ប្រធានក្រុមប្រឹក្សាភិបាល សហព័ន្ធសមាគមសហគ្រាសធុនតូច និងមធ្យមកម្ពុជា បានលើកជាសំណូមពរដល់ស្ថាប័នពាក់ព័ន្ធ ក្នុងការជួយដល់សហគ្រាសក្នុងស្រុក ដោយលោកយកបញ្ហាបង្កការរាំងស្ទះដល់ការអភិវឌ្ឍវិស័យ SME នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវេទិកាគយនិង FASMEC ដែលរៀបចំឡើងក្រោមប្រធានបទ៖ «ការគាំទ្រ និងការគាំពារសហគ្រាសធុនតូច និងមធ្យម ដើម្បីជំរុញផលិតកម្មក្នុងស្រុក និងសមត្ថភាពប្រកួតប្រជែង» ឧកញ៉ា តែ តាំងប៉ បានបញ្ជាក់ថា សហគ្រាសធុនតូច និងមធ្យម គឺជាឆ្អឹងខ្នងនៃសេដ្ឋកិច្ចជាតិ ដែលមានតួនាទីយ៉ាងសំខាន់នៅក្នុងការគាំទ្រកំណើនសេដ្ឋកិច្ច ការបង្កើតការងារ បង្កើតប្រាក់ចំណូលដល់ប្រជាពលរដ្ឋ ជម្រុញផលិតផលក្នុងស្រុក ការបង្កើតតម្លៃបន្ថែម និងការបង្កើនមូលដ្ឋានសេដ្ឋកិច្ចកម្ពុជាឱ្យកាន់តែរឹងមាំ និងមានសមត្ថភាពប្រកួតប្រជែង។

យ៉ាងណា លោកលើកឡើងពីបញ្ហាប្រឈមរបស់សហគ្រាសធុនតូច និងមធ្យម (SMEs) និងឧបសគ្គជាច្រើនរួមមាន ការកង្វះខាតព័ត៌មានជុំវិញការចុះបញ្ជី និងកាតព្វកិច្ចសារពើពន្ធ ការចូលដំណើរការហិរញ្ញប្បទាននៅមានកម្រិត កង្វះបច្ចេកវិទ្យា និងនវានុវត្តន៍ ព្រមទាំងតម្រូវការបច្ចេកទេស ដើម្បីលើកកម្ពស់ស្តង់ដារផលិតផលខ្មែរ ផលវិបាកក្នុងប្រតិបត្តិការនាំចេញ-នាំចូល ការប្រកួតប្រជែងខ្ពស់ពីផលិតផលនាំចូលនៅលើទីផ្សារ ការយល់ដឹងនៅមានកម្រិតអំពីនីតិវិធីគយ និងស្តង់ដារពាណិជ្ជកម្មអន្តរជាតិ ការចំណាយប្រតិបត្តិការខ្ពស់ និងតម្រូវការក្នុងការបង្កើនកិច្ចសហប្រតិបត្តិការជាមួយអាជ្ញាធរឱ្យកាន់តែជិតស្និទ្ធ។

ក្នុងបរិបទនេះ ដើម្បីបង្កើតបរិយាកាសធុរកិច្ចដែលមានភាពងាយស្រួល ប្រកួតប្រជែងដោយស្មើភាព និងអំណោយផលសម្រាប់ការរីកចម្រើនរបស់សហគ្រាសក្នុងស្រុក ក្នុងនាមតំណាងឲ្យវិស័យឯកជន លោកស្នើសុំឱ្យមានការគាំទ្រលើចំណុចគន្លឹះ ទី១ គឺការសម្រួលនីតិវិធីគយ និងកាត់បន្ថយភាពស្មុគស្មាញក្នុងការនាំចេញវត្ថុធាតុដើមសម្រាប់ផលិតផលក្នុងស្រុក។

ទី២. ការបង្កើនការផ្សព្វផ្សាយ និងបណ្តុះបណ្តាលដល់ SMEs អំពីបទប្បញ្ញត្តិគយ និងអត្ថប្រយោជន៍ពាក់ព័ន្ធ។ ទី៣. ការបង្កើតយន្តការគាំទ្រពិសេសសម្រាប់ផលិតផលក្នុងស្រុក ដើម្បីលើកកម្ពស់សមត្ថភាពប្រកួតប្រជែង។ ទី៤. ការជម្រុញប្រព័ន្ធឌីជីថល និងការធ្វើទំនើបកម្មនីតិវិធី ដើម្បីកាត់បន្ថយពេលវេលា និងថ្លៃដើម និងទី៥. ការបន្តបង្កើតវេទិកាសន្ទនាជាប្រចាំ ដើម្បីឱ្យវិស័យរដ្ឋ និងឯកជនអាចដោះស្រាយបញ្ហាបានទាន់ពេលវេលា។

លោកបានលើកឡើងពីកិច្ចសហការរៀបចំវេទិកាគយ និង FASMEC ជាវេទិកាសន្ទនាបើកចំហ សម្រាប់ការផ្លាស់ប្តូរយោបល់ ការចែករំលែកបទពិសោធន៍ និងការស្វែងរកដំណោះស្រាយរួម។

លោកថា នេះគឺព្រឹត្តិការណ៍ប្រវត្តិសាស្ត្រថ្មីមួយទៀត នៃកិច្ចសហការរវាងអគ្គនាយកដ្ឋានគយ និងរដ្ឋាករកម្ពុជា និង (FASMEC) ក្នុងគោលបំណង បង្កើតការយល់ដឹងអំពីនីតិវិធីគយ ការលើកទឹកចិត្តផ្នែកពន្ធដារ និងការសម្រួលសម្របសម្រួលពាណិជ្ជកម្មនានា។

ពាក់ព័ន្ធការលើកឡើងបញ្ហាពីវិស័យឯកជន លោក គុណ ញឹម រដ្ឋមន្រ្តីអមនាយករដ្ឋមន្រ្តីទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានទទួលស្គាល់ពីកម្លាំងចលករសេដ្ឋកិច្ចរបស់សហគ្រាសធុនតូច និងមធ្យម (MSMEs) ដែលផ្នែកមួយដ៏សំខាន់នៃសកម្មភាពសេដ្ឋកិច្ច និងផលិតកម្មក្នុងស្រុក ដែលរួមចំណែកបង្កើតការងារ បង្កើតប្រាក់ចំណូល និងលើកកម្ពស់សកម្មភាពបំពេញតម្រូវការទីផ្សារ។

លោកថា ក្នុងបរិបទដែលបរិយាកាសធុរកិច្ចនិងការធ្វើពាណិជ្ជកម្មមានការប្រកួតប្រជែងខ្ពស់ ការកាត់បន្ថយថ្លៃដើម ការសម្រួលនីតិវិធី និងការបង្កើតភាពងាយស្រួលក្នុងការផលិត និងធ្វើពាណិជ្ជកម្ម គឺជាកត្តាចាំបាច់ដើម្បីជួយឱ្យសហគ្រាសទាំងនោះរីកចម្រើន និងពង្រីកឱកាសទីផ្សារ។

លោកបានលើកឡើងពីកិច្ចខិតខំប្រឹងប្រែង និងការកែទម្រង់របស់រដ្ឋបាលគយ ដែលបានកំពុងអនុវត្តកម្មវិធីកែទម្រង់ និងទំនើបកម្មជាច្រើន ដើម្បីសម្រួលពាណិជ្ជកម្ម និងគាំទ្រដល់វិស័យឯកជន រួមមាន ការជំរុញការធ្វើទំនើបកម្មតាមរយៈការអនុវត្តប្រព័ន្ធស្វ័យប្រវត្តិកម្មគយ (ASYCUDA) ការទូទាត់ប្រាក់ពន្ធ-អាករតាមប្រព័ន្ធអេឡិចត្រូនិច ការអនុវត្តប្រព័ន្ធគ្រប់គ្រងហានិភ័យ និងប្រព័ន្ធបញ្ជរតែមួយជាតិ (National Single Window) ដើម្បីកាត់បន្ថយពេលវេលា និងបង្កើនប្រសិទ្ធភាពសេវាសាធារណៈ។

លោកបានលើកពីគោលនយោបាយសន្ធានកម្មពន្ធ ដែលមានការបន្តបន្ទាបអត្រាពន្ធ និងអាករលើមុខទំនិញសំខាន់ៗ ដែលជាគ្រឿងម៉ាស៊ីន និងធាតុចូលផលិតកម្ម។ ការអនុវត្តការលើកលែងពន្ធ និងអាករលើការនាំចូលសម្ភារ និងធាតុចូលផលិតកម្មសម្រាប់សហគ្រាសធុនតូច និងមធ្យម ដែលមានលក្ខណៈសម្បត្តិស្របតាមបទប្បញ្ញត្តិជាធរមាន។

លើកិច្ចសហប្រតិបត្តិការ និងការចុះអនុសរណៈនៃការយោគយល់ (MoU) ភាពជាដៃគូរដ្ឋ និងឯកជន លោកថា វេទិកានេះបង្កើតឡើងក្នុងគោលបំណងបង្កើនការសន្ទនា ផ្សព្វផ្សាយគោលនយោបាយ ស្ដាប់នូវបញ្ហាប្រឈម និងសំណូមពររបស់សហគ្រាស ដើម្បីស្វែងរកដំណោះស្រាយសមស្រប។

ការចុះអនុស្សណៈនៃការយោគយល់គ្នារវាងអគ្គនាយកដ្ឋានគយ និងសហព័ន្ធសមាគមសហគ្រាសធុនតូច និងមធ្យមកម្ពុជា ក៏នឹងក្លាយជាក្របខ័ណ្ឌការងារដ៏សំខាន់ក្នុងការលើកកម្ពស់ការយល់ដឹងអំពីនីតិវិធីគយ ការកសាងសមត្ថភាព និងការទាញយកអត្ថប្រយោជន៍ពីវិធានការលើកទឹកចិត្តរបស់រាជរដ្ឋាភិបាល។ លោក គុណ ញឹម បន្ថែម៕

Related Topics:លោក គុណ ញឹម

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា