បារាំង នៅពូល I មាន ២ ក្រុមជាឧបសគ្គធំ ប៉ុន្តែមិនមែនជារនាំងឆ្លងផុតវគ្គចែកពូល

ក្រុមបាល់ទាត់ជម្រើសជាតិ បារាំង ហាក់មិនពិបាកខ្លាំងឡើយ ដើម្បីឆ្លងផុតពូលឡើងទៅកាន់វគ្គ ៣២ ក្រុមចុងក្រោយ ប៉ុន្តែនៅក្នុងពូល ក៏មានក្រុមខ្លាំង ២ នឹងធ្វើឱ្យពួកគេមិនងាយស្រួលពេកដែរ។

ក្រុមមាន់គក បារាំង ស្ថិតនៅក្នុងពូល I ជាមួយក្រុមជម្រើសជាតិ សេណេហ្គាល់ អ៊ីរ៉ាក់ និង ន័រវែស។ នៅក្នុងពូលនេះ ជំនួបរវាងក្រុម បារាំង និង ន័រវែស ត្រូវបានគេចាត់ទុក ជាជំនួប ដែលអ្នកគាំទ្រចង់ឃើញបំផុត ដោយសារកំពូលខ្សែប្រយុទ្ធ Kylian Mbappe និង Erling Haaland ត្រូវជួបគ្នាលើកដំបូងនៅជម្រើសជាតិ។

ជំនួបរវាងក្រុមមកពី អឺរ៉ុប ទាំង ២ ក៏នឹងក្លាយជាការប្រកួតដ៏តឹងតែងផងដែរ ដោយសារ បារាំង ជាក្រុមខ្លាំងពីអតីតកាល ខណៈ ន័រវែស ជាក្រុមកំពុងឡើងជើងមិនអាចមើលរំលងបាន។ ដូចបានដឹងស្រាប់ បារាំង ជាម្ចាស់ជើងឯក World Cup ២ សម័យ ហើយបច្ចុប្បន្នមានកីឡាករកំពូលជាច្រើន ដូចជា Kylian Mbappe, Michael Olise, Ousmane Dembele និងកីឡាករជាច្រើនទៀត។

ចំណែក ន័រវែស វិញក៏មិនធម្មតា ដោយបច្ចុប្បន្នមានកីឡាករឆ្នើមៗដូចជា Erling Haaland, Alexander Sørloth និង Martin Odegaard ជាដើម។ ដោយឡែក ក្រុមជម្រើសជាតិ សេណេហ្គាល់ វិញ ក៏ជារនាំងធំមួយសម្រាប់ បារាំង ផងដែរ ដោយសារពួកគេមានកីឡាករឆ្នើមៗជាច្រើនដូចជា Sadio Mané, Nicolas Jackson, Ismaïla Sarr, Kalidou Koulibaly និងអ្នកចាំទី Édouard Mendy ជាដើម។

ផ្អែកតាមការបង្ហាញខាងលើ ក្រុមម្ចាស់ជើងឯកឆ្នាំ ២០១៨ បារាំង នឹងមិនហ៊ានមើលស្រាលលើ ន័រវែស និង សេណេហ្គាល់ នោះទេ។ ប៉ុន្តែបើនិយាយអំពីជម្រើសជាតិ អ៊ីរ៉ាក់ វិញ ទំនងនឹងមិនមែនគូប្រជែងរបស់បារាំងឡើយ ដោយផ្អែកតាមសមត្ថភាពកីឡាករ និងប្រវត្តិប្រកួតកន្លងមក។

អំណះអំណាងបន្ថែមទៀត គឺចំណាត់ថ្នាក់ក្នុង FIFA។ បច្ចុប្បន្ន បារាំង ស្ថិតនៅលេខ ៣ ពិភពលោក ខណៈ សេណេហ្គាល់ នៅលេខ ១៦ និង ន័រវែស នៅលេខ ៣១។ ចំណែក អ៊ីរ៉ាក់ វិញ គឺនៅដាច់ឆ្ងាយពីគេខ្លាំង ដោយស្ថិតនៅលេខ ៥៧ ឯណោះ។

គួរបញ្ជាក់ ថា ក្រុមជម្រើសជាតិ បារាំង នឹងត្រូវជួបក្រុម សេណេហ្គាល់ ក្នុងការប្រកួតប្បើកឆាកពូល I នៅម៉ោង ២ រំលងអាធ្រាត្រ ឈានចូលថ្ងៃទី ១៧ ខែ មិថុនា។ ប្រកួតទី ២ ពួកគេត្រូវជួបក្រុម អ៊ីរ៉ាក់ នៅថ្ងៃទី ២៣ ខែ មិថុនា​ ម៉ោង ៤ ព្រឹក។ ចុងក្រោយ ក្រុមមាន់គកត្រូវជួបក្រុម ន័រវែស ម៉ោង ២ រំលងអាធ្រាត្រថ្ងៃទី ២៧ ខែ មិថុនា ឆ្នាំ ២០២៦៕

អត្ថបទ៖ សេម កុសល