ព័ត៌មានអន្ដរជាតិ

លោក ត្រាំ ថា គ្មាននរណាម្នាក់មានចេតនា វាយប្រហារលើសាលារៀនក្មេងស្រី នៅអ៊ីរ៉ង់ កាលពីខែកុម្ភៈ ទេ

បានផុស

១៤ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើងកាលពីថ្ងៃទី១៧ ខែមិថុនា ថា គ្មាននរណាម្នាក់ មានចេតនាវាយប្រហារលើសាលារៀនក្មេងស្រីមួយកន្លែង ក្នុងប្រទេសអ៊ីរ៉ង់កាលពីខែកុម្ភៈ នោះទេ។

ភ្នាក់ងារសារព័ត៌មានរ៉យទ័រ បានរាយការណ៍ជាលើកដំបូង ពីការស៊ើបអង្កេតផ្ទៃក្នុងរបស់យោធាអាមេរិកបង្ហាញថា កងកម្លាំងអាមេរិកទំនងជាទទួលខុសត្រូវ ចំពោះការវាយប្រហារដ៏សាហាវនៅតំបន់ Minab ភាគខាងត្បូងប្រទេសអ៊ីរ៉ង់។ ចាប់តាំងពីពេលនោះមក មន្ទីរបញ្ចកោណបង្កើនការស៊ើបអង្កេត ប៉ុន្តែខ្លួនមិនបានទទួលស្គាល់ការរកឃើញបឋមណាមួយឡើយ។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្ត្រីអ៊ីរ៉ង់ ការវាយប្រហារនៅថ្ងៃទី២៨ ខែកុម្ភៈ ជាថ្ងៃដំបូងនៃជម្លោះ បានសម្លាប់កុមារ និងគ្រូបង្រៀនជាង ១៧៥នាក់។

លោក ត្រាំ ថ្លែងក្នុងសន្និសីទសារព័ត៌មានមួយក្រៅសន្និសីទក្រុមប្រទេសទាំង៧ នៅទីក្រុង Evian-les-Bains ប្រទេសបារាំង ថា៖ « រឿងនោះកំពុងស្ថិតក្រោមការស៊ើបអង្កេត។ កំហុសឆ្គងត្រូវបានធ្វើឡើងក្នុងសង្គ្រាម។ គ្មាននរណាម្នាក់ធ្វើបែបនេះដោយចេតនាទេ»។

ដំបូងឡើយ លោក ត្រាំ អះអាងដោយគ្មានភស្តុតាងថា អ៊ីរ៉ង់ជាអ្នកទទួលខុសត្រូវ។ ចាប់តាំងពីពេលនោះមក លោកនិយាយថា លោកមិនបានដឹងគ្រប់គ្រាន់អំពីការវាយប្រហារនោះទេ ការស៊ើបអង្កេតកំពុងបន្ត ហើយលោកនឹងទទួលយកលទ្ធផលនៃការស៊ើបអង្កេត។

កាលពីខែមិថុនា ប្រធានបញ្ជាការកណ្តាលសហរដ្ឋអាមេរិក អះអាងថា ការស៊ើបអង្កេតលើការវាយប្រហារនៅសាលារៀនក្មេងស្រីគឺស្មុគស្មាញ ដោយសារមានទីតាំង នៅលើមូលដ្ឋានមីស៊ីលបើកបរអ៊ីរ៉ង់ ប៉ុន្តែការស៊ើបអង្កេតកំពុងខិតជិតដល់ការសន្និដ្ឋានហើយ៕

សម្រួល៖ ណឺ មិនា