ព័ត៌មានជាតិ

ក្រសួងសុខាភិបាលកំពុងចាត់មន្ត្រីចុះពិនិត្យផលិតផលទាក់ទងសុខភាពដែលដាក់លក់តាមទីផ្សារ និងអនឡាញ

បានផុស

១ ម៉ោង មុន

នៅ

ថ្ងៃសៅរ៍ ២០ មិថុនា ២០២៦

ដោយ

អនុប្រធាននាយករដ្ឋឱសថ ចំណីអាហារ បរិក្ខាពេទ្យ និងគ្រឿងសម្អាងនៃក្រសួងសុខាភិបាលលោកស្រី ឆាយ រ័ត្នធានី បានព្រមានពីការចាត់វិធានការលើផលិតដែលទាក់ទងនឹងសុខភាពមនុស្សទាំងអស់នៅលើទីផ្សារដែលគ្មានលិខិតបញ្ជាក់(មីញ៉ែត) និងមិនបានឆ្លងកាត់ការពិនិត្យពីក្រសួងសុខាភិបាល។ លោកស្រីបញ្ជាក់ថារាល់ផលិតផលដែលគ្មានលិខិតទាំងពីរនេះនឹងត្រូវចាត់ទុកថាជា «ផលិតផលក្លែងក្លាយ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់របស់លោកស្រី ឆាយ រ័ត្នធានី ធ្វើឡើងក្នុងវេទិកាគយ និងFASMEC កាលពីពេលថ្មីៗនេះ ដោយមន្ត្រីជំនាញរូបនេះបញ្ជាក់ថាពេលនេះក្រុមអធិការកិច្ចក្រសួងបានចុះពិនិត្យតាមក្រុមហ៊ុន និងតាមទីផ្សារ និងអ្នកលក់តាមអនឡាញហើយ។

លោកស្រីបញ្ជាក់ថា៖ «ផលិតផលដែលត្រូវចុះបញ្ជីការមានច្រើនប្រភេទ ដូចជាផលិតផលឱសថ ផលិតផលបំប៉នសុខភាព ផលិតផលប្រពៃណី សម្ភារៈបរិក្ខារពេទ្យ ផលិតផលជំនួយសុខភាព និងគ្រឿងសម្អាងជាដើម»។

បើតាមលោកស្រី រ័ត្នធានី ការចុះបញ្ជីការផលិតផល និងការទទួលបានអាជ្ញាប័ណ្ណ ឬវិញ្ញាបនបត្រ មានសារៈសំខាន់ខ្លាំងណាស់សម្រាប់សហគ្រាសធុនតូច និងមធ្យម (SMEs)។ នៅពេលទទួលបានអាជ្ញាប័ណ្ណ ផលិតផលនោះត្រូវបានចាត់ទុកថាជាផលិតផលស្របច្បាប់ មានសិទ្ធិច្បាប់ក្នុងការដាក់លក់នៅលើទីផ្សារយ៉ាងទូលំទូលាយ និងអាចធ្វើការផ្សព្វផ្សាយពាណិជ្ជកម្មពីផលិតផលរបស់ខ្លួនបានដោយសេរី និងស្របច្បាប់។ ការទទួលបានអាជ្ញាប័ណ្ណ ឬការបិទស្លាកសញ្ញាសម្គាល់ ដែលឆ្លងកាត់ការពិនិត្យពីក្រសួងសុខាភិបាល គឺជាភស្តុតាងបញ្ជាក់ថា ផលិតផលនោះពិតជាមានគុណភាព និងសុវត្ថិភាព បង្កើតទំនុកចិត្តពីអ្នកប្រើប្រាស់បញ្ជាក់ពីគុណភាពពិតប្រាកដ៕