តើកីឡាការិនីខ្មែរ-អាមេរិក Gwendolyn មាន​ប្រវត្តិ​យ៉ាង​ណា ត្រូវបានកោះហៅចូលក្រុម​នារីកម្ពុជា លើកដំបូង?

សហព័ន្ធបាល់ទាត់ កម្ពុជា បានប្រកាសជាផ្លូវការ អំពីបញ្ជីឈ្មោះកីឡាការិនីទាំង ២៣ នាក់ ត្រៀមចូលរួមការប្រកួតពានរង្វាន់នារីអាស៊ាន ASEAN Women’s Cup 2026 នៅប្រទេស ម៉ាឡេស៊ី ខណៈក្នុងចំណោមនោះ មានកីឡាការិនីថ្មីម្នាក់​គឺ​ សាំង រ៉ូសានហ្គិនដូលីន (Gwendolyn Saing) ត្រូវបានកោះហៅជាលើកដំបូង។

កីឡាការិនី សាំង រ៉ូសានហ្គិនដូលីន គឺជាកូនកាត់ខ្មែរ-អាមេរិក ដែលបច្ចុប្បន្ននេះមានវ័យ ២១ ឆ្នាំ។ នាងឪពុកជាជនជាតិ ខ្មែរ និងម្តាយជាជនជាតិអាមេរិក។ បច្ចុប្បន្ន នាងកំពុងលេងឱ្យក្លិបបាល់ទាត់សកលវិទ្យាល័យឈ្មោះ Pacific Boxers ក្នុងតួនាទីជាខ្សែបម្រើ។

សាំង រ៉ូសានហ្គិនដូលីន បានចាប់ផ្តើមលេងបាល់ទាត់តាំងតែពីអាយុ ៤ ឆ្នាំ។ ដោយសារចិត្តស្រឡាញ់កីឡាបាល់ទាត់ ហ្គិនដូលីន ធ្លាប់បានចូលលេងនៅក្លិបយុវជន ហើយក្រោយមកក៏លេងនៅក្រុមវិទ្យាល័យ និងចុងក្រោយនេះបានលេងនៅក្រុមធំកម្រិតសាកលវិទ្យាល័យ ដែល​មាន​រយៈ​ពេល ៤ ឆ្នាំជាប់គ្នា។

កាលពីឆ្នាំ ២០២២ គឺជាឆ្នាំដំបូង ដែល ហ្គិនដូលីន លេងឱ្យក្រុម Pacific Boxers។ នៅឆ្នាំនោះ នាងលេងបានសរុបចំនួន ១៩ ប្រកួត។ ឈានចូលឆ្នាំ ២០២៣ លេងបាន ១៩ ប្រកួត និង​​ឆ្នាំ ២០២៤ នាងលេងបាន ២០ ប្រកួត។ ចំណែកកាលពីឆ្នាំមុន ២០២៥ នាងលេងបាន ១៩ ប្រកួត ក្នុងនោះរកបាន ៤ គ្រាប់ និងបញ្ជូន ២ លើក។

កញ្ញា ហ្គិនដូលីន ធ្លាប់មានក្តីសុបិនលេងតំណាងឱ្យជម្រើសជាតិ កម្ពុជា ខណៈពេលនេះក្តីស្រមៃរបស់នាងបានក្លាយជាការពិតហើយ។ នៅឆ្នាំ ២០២៦ នេះ នាងនឹងត្រូវតំណាងឱ្យក្រុមនារី កម្ពុជា ដើម្បីចូលលេងការប្រកួតពាន ASEAN Women’s Cup 2026 នៅប្រទេស ម៉ាឡេស៊ី។ ក្រុមនារី កម្ពុជា ស្ថិតនៅក្នុងពូល B ជាមួយជម្រើសជាតិ ឥណ្ឌូណេស៊ី និង ទីម័រ៕

អត្ថបទ៖ សេម កុសល