នារីបម្រើការលើយន្តហោះថៃ ត្រូវចាប់ខ្លួននៅអូស្រ្តាលី ពាក់ព័ន្ធការរត់ពន្ធគ្រឿងញៀន, ប្រឈមជាប់ពន្ធនាគារ ៥០ឆ្នាំ

ស្រ្តីជនជាតិថៃម្នាក់ ជាអ្នកបម្រើការលើយន្តហោះក្រុមហ៊ុន Thai Airways ត្រូវបានចាប់ខ្លួន ក្នុងប្រទេសអូស្រ្តាលី ពាក់ព័ន្ធការរត់ពន្ធគ្រឿងញៀន ខណៈពេលនេះកំពុងមានការស៊ើបអង្កេត។

តាមការផ្សាយរបស់ Khaosod នៅថ្ងៃចន្ទ ទី២៩ ខែមិថុនា ឆ្នាំ២០២៦ នារីម្នាក់នេះមានវ័យ ២៦ឆ្នាំ បម្រើការលើជើងហោះហើរ TG465 ត្រូវបានចាប់ខ្លួន នៅឯអាកាសយានដ្ឋានអន្តរជាតិ Melbourne កាលពីថ្ងៃទី២៤ ខែនេះ។

អាជ្ញាធរអូស្រ្តាលី បានរកឃើញថ្នាំញៀនប្រភេទហេរ៉ូអ៊ីនជាង ១ គីឡូក្រាម លាក់ទុកក្នុងស្រទាប់ខាងក្នុងនៃកាបូបយួរដៃ ចំនួន ១២ ដែលនាងដាក់តាមខ្លួន។

បើតាមការប៉ាន់ស្មានតម្លៃលើទីផ្សារងងឹត ថ្នាំញៀនទាំងនោះ មានតម្លៃ ប្រហែល ៣៤ម៉ឺនដុល្លារ អាមេរិក ខណៈពេលនេះ នាងត្រូវប្រឈមមុខ នឹងបទល្មើសរត់ពន្ធគ្រឿងញៀនឆ្លងដែន ដែលជាទោសធ្ងន់ធ្ងរក្នុងប្រទេសអូស្រ្តាលី។

អាជ្ញាធរអូស្ត្រាលី បានចោទប្រកាន់នាង ជាផ្លូវការចំនួន ២ បទល្មើស ក្រោមក្រមព្រហ្មទណ្ឌអូស្ត្រាលី ដែលបទចោទទី១ គឺការនាំចូលគ្រឿងញៀន ដែលត្រូវបានត្រួតពិនិត្យតាមព្រំដែនក្នុងបរិមាណសម្រាប់លក់លើទីផ្សារ និងបទចោទទី២ គឺការកាន់កាប់គ្រឿងញៀន ដែលត្រូវបានត្រួតពិនិត្យតាមព្រំដែន ក្នុងបរិមាណសម្រាប់លក់លើទីផ្សារ។

បើបូកចូលគ្នា! បទល្មើសទាំងពីរនេះ អាចឲ្យនាងប្រឈមនឹង ការមានទោសជាប់ពន្ធនាគារ អតិបរមា ៥០ឆ្នាំ។ ទោះបីជាយ៉ាងណាក៏ដោយ ប្រទេសអូស្ត្រាលី គ្មានទោសប្រហារជីវិតឡើយ៕

អត្ថបទ៖ សុវណ្ណ