មេបក្សប្រឆាំងវ៉េណេស៊ុយអេឡា ប្រកាស​ចូលស្រុក​វិញ ក្រោយ​ប្រទេស​កើតមាន​គ្រោះ​រញ្ជួយដីដ៏​កាចសាហាវ

ម្ចាស់ពានរង្វាន់ណូបែលសន្តិភាព និងជាមេដឹកនាំគណបក្សប្រឆាំងវ៉េណេស៊ុយអេឡា លោកស្រី Maria Corina Machado បានប្រកាស​ថា លោកស្រីមានគម្រោងវិលត្រឡប់ទៅកាន់ប្រទេសកំណើតវិញ ក្នុងពេលឆាប់ៗខាងមុខ ដើម្បីចូលរួមជួយសង្គ្រោះ និងដោះស្រាយផលប៉ះពាល់ដ៏ធ្ងន់ធ្ងរ បន្ទាប់ពីគ្រោះរញ្ជួយដីភ្លោះដ៏កាចសាហាវ បានវាយប្រហារប្រទេសជាតិ កាលពីសប្តាហ៍មុន។

ទីភ្នាក់ងារព័ត៌មាន​ Anadolu បានចុះផ្សាយ​នា​ថ្ងៃទី​៣០ ខែមិថុនា ឆ្នាំ​២០២៦ នេះ ថា តាមរយៈវីដេអូមួយដែលបានបង្ហោះនៅលើបណ្តាញសង្គម X លោកស្រី Machado បានថ្លែងថា ពេលវេលាបានមកដល់ហើយ វាជាកាតព្វកិច្ចរបស់លោកស្រី ក្នុងការឈរនៅក្បែរប្រជាជន។ លោកស្រីបានសង្កត់ធ្ងន់ថា នៅក្នុងស្ថានភាពដ៏លំបាកនេះ រឿងដែលសំខាន់បំផុត គឺការសង្គ្រោះជីវិតមនុស្ស និងការផ្តល់ជម្រកដល់ប្រជាជនរាប់ពាន់នាក់ ដែលបាត់បង់ផ្ទះសម្បែង ដោយត្រូវទុកជម្លោះនយោបាយមួយឡែកសិន។ យ៉ាង​ណាមិញ លោកស្រីបានចោទប្រកាន់រដ្ឋាភិបាលបណ្តោះអាសន្នរបស់លោកស្រី Delcy Rodriguez ថាបានបិទដែនអាកាសមិនឱ្យរូបលោកស្រីចូលប្រទេសឡើយ ខណៈដែលបច្ចុប្បន្នលោកស្រី កំពុងស្នាក់នៅក្នុងប្រទេសប៉ាណាម៉ា។

ជាមួយគ្នានេះដែរ មេដឹកនាំបក្សប្រឆាំងរូបនេះ បានរិះគន់អាជ្ញាធរវ៉េណេស៊ុយអេឡា ដែលបានដាក់កម្រិត និងរារាំងដល់ការនាំចូលជំនួយមនុស្សធម៌ ក៏ដូចជាការធ្វើដំណើររបស់ក្រុមសង្គ្រោះអន្តរជាតិ ដែលកំពុងជាប់គាំងនៅតាមព្រលានយន្តហោះ ទាំងដែលប្រជាជនជាច្រើនកំពុងត្រូវការជំនួយជាប្រេង ថ្នាំសង្កូវ និងអាហារ។

ការប្រកាសវិលត្រឡប់នេះ បានធ្វើឡើងចំពេលដែលក្រុមសង្គ្រោះអន្តរជាតិ កំពុងស្ថិតក្នុងដំណាក់កាលដ៏ប្រផិតប្រផើយ ក្នុងការស្វែងរកអ្នករស់រានមានជីវិតនៅក្រោមគំនរបាក់បែក ខណៈដែលចំនួនអ្នកស្លាប់បានកើនឡើងហួសពី ១ ៧១៩នាក់ទៅហើយ និងមានមនុស្សរាប់ម៉ឺននាក់ទៀតកំពុងបាត់ខ្លួន។

គួរបញ្ជាក់ថា លោកស្រី Machado បានចាកចេញពីប្រទេសវ៉េណេស៊ុយអេឡា កាលពីខែធ្នូ ឆ្នាំមុន ក្នុងប្រតិបត្តិការសម្ងាត់មួយ ដើម្បីទៅទទួលពានរង្វាន់ណូបែលសន្តិភាពឆ្នាំ២០២៥ នៅទីក្រុង Oslo ប្រទេសន័រវេស ហើយក្រោយមកលោកស្រីបានប្រគល់មេដាយនោះជូនប្រធានាធិបតីអាមេរិក លោក ដូណាល់ ត្រាំ។ បន្ទាប់ពីកងទ័ពអាមេរិក បានចាប់ខ្លួនប្រធានាធិបតី នីកូឡាស ម៉ាឌូរ៉ូ កាលពីខែមករា កន្លងទៅ លោកស្រីមានបំណងវិលត្រឡប់ទៅ​ប្រទេសវិញ ប៉ុន្តែត្រូវបានលោក ដូណាល់ ត្រាំ និងរដ្ឋមន្ត្រីការបរទេសលោក Marco Rubio ណែនាំឱ្យផ្អាកសិន ដោយសារតែបញ្ហាសន្តិសុខនៅវ៉េណេស៊ុយអេឡា នៅមិនទាន់មានស្ថិរភាពនៅឡើយ៕

ប្រែសម្រួល៖ ឈាង