សេដ្ឋកិច្ច

អ្នកជំនាញហិរញ្ញវត្ថុអះអាង និន្នាការតម្លៃមាសនឹងបន្តធ្លាក់ចុះ

បានផុស

២៤ វិនាទី មុន

នៅ

ថ្ងៃពុធ ១ កក្កដា ២០២៦

ដោយ

អ្នកជំនាញនៅក្នុងវិស័យហិរញ្ញវត្ថុបានអះអាងថា តម្លៃហាងឆេងមាសមាននិន្នាការធ្លាក់ចុះបន្ថែមទៀត ដោយសារភាពមិនប្រាកដប្រជានៃភូមិសាស្ត្រនយោបាយ និងសង្គ្រាមរវាងអាមេរិក និងអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង ៩ ព្រឹក ថ្ងៃទី ០១ កក្កដា ២០២៦ តម្លៃហាងឆេងមាសក្នុងស្រុកបន្តទំនោរធ្លាក់ចុះនៅ ៤៨២ ដុល្លារ ក្នុងមួយជី។

លោក ឡុង សំណាង នាយកអភិវឌ្ឍអាជីវកម្មនៃក្រុមហ៊ុន PP Link securities ប្រាប់កម្ពុជាថ្មីនៅថ្ងៃទី ០១ កក្កដា ២០២៦ថា តម្លៃហាងឆេងមាសមានទំនោរធ្លាក់ចុះ បន្ទាប់ពីបំបែកកំណត់ត្រាខ្ពស់បំផុតជាង ៦ ពាន់ដុល្លារ ក្នុងមួយតម្លឹង។

លោក ឡុង សំណាង បញ្ជាក់ថា៖ «ទំនោរនៃការធ្លាក់ចុះនៅបន្ត សម្រាប់អ្នកចង់ទិញនៅតម្លៃបច្ចុប្បន្ន សូមកុំទាន់យកលុយ ១០០% ទៅទិញ សូមប្រើមួយកញ្ចប់តូចសិន ព្រោះឱកាសវានឹងមានច្រើន ហើយឱកាសដែលល្អអាចយើងទិញនៅតម្លៃទាប»។

អ្នកជំនាញរូបនេះ បន្ថែមថា មកដល់ពេលនេះ បញ្ហាវិវាទរវាងអាមេរិក និងអ៊ីរ៉ង់ មិនមានភាពច្បាស់លាស់ ដូច្នេះ តម្លៃមាសនឹងដើរតាមទំនោរធ្លាក់ចុះ។

ម្យ៉ាងទៀត ប្រធានធានាគារកណ្ដាលថ្មីអាមេរិក លោក Kevin Warsh បានលើកឡើងពីការដំឡើងអត្រាការប្រាក់ ដែលធ្វើឱ្យលុយដុល្លារឡើងថ្លៃ ធ្វើឱ្យមាសធ្លាក់ចុះ។

បើតាមអ្នកជំនាញហិរញ្ញវត្ថុដដែលរូបនេះ គិតចាប់ពីពេលនេះ រហូតដល់ដំណាច់ឆ្នាំ ២០២៦ តម្លៃហាងឆេងមាស អាចនឹងចុះទាបបំផុតត្រឹម ៣៦០០ ដុល្លារ ក្នុងមួយអោន ឬប្រមាណ ៤៣៣៨ ដុល្លារ ក្នុងមួយតម្លឹង៕

អត្ថបទ៖ ឡេង ដេត

Related Topics:តម្លៃមាស