ព័ត៌មានជាតិ
អ្នកជំនាញអចលនទ្រព្យបង្ហើបទីផ្សារតម្លៃខុនដូរ និងស្ថានភាពតម្រូវការជួលអាគារការិយាល័យនៅកម្ពុជា
វិស័យអចលនទ្រព្យក្នុងប្រទេសកម្ពុជា កំពុងរងសម្ពាធ។ ក្នុងឆមាសទី ១ ឆ្នាំ ២០២៦ ទីផ្សារខូនដូរមានការធ្លាក់ថ្លៃ ស្របតម្រូវការអគារការិយាល័យមាននិន្នាការការផ្គត់ផ្គង់ច្រើនជាងតម្រូវការរបស់អតិថិជន។
កញ្ញា សុខ ហេងពេជ្រមុន្នី អ្នកគ្រប់គ្រងផ្នែកសេវាកម្មលក់រាយរបស់ក្រុមហ៊ុន APS ដែលជាក្រុមហ៊ុនផ្តល់សេវាកម្មអចលនទ្រព្យអន្តរជាតិដ៏ធំមួយបានឲ្យដឹងថា ទីផ្សារការិយាល័យលំដាប់ Grade A កំពុងជួបបញ្ហាលើសការផ្គត់ផ្គង់ និងកង្វះអ្នកជួលយ៉ាងខ្លាំង។
ក្នុងរយៈពេល ៣ ឆ្នាំចុងក្រោយនេះ មានអាគារយ៉ាងហោចណាស់ ១០ បន្ថែមទៀតបានលេចឡើង ដែលធ្វើឲ្យទំហំការិយាល័យទំនេរនៅលើទីផ្សារកើនឡើងដល់ប្រហែល ៦០ ម៉ឺនម៉ែត្រការ៉េ។
«បញ្ហាចម្បងគឺទីផ្សារខ្វះអ្នកជួល មិនមែនខ្វះទីតាំង ឬខ្វះអាគារនោះទេ»។ កញ្ញា សុខ ហេងពេជ្រមុន្នីបញ្ជាក់។
ដោយសារតម្លៃជួលការិយាល័យ Grade A មានតម្លៃថ្លៃ ក្រុមហ៊ុនជួលមានការប្រុងប្រយ័ត្នជាងមុន ដោយអ្នកខ្លះបានសម្រេចចិត្តប្ដូរពីការជួលការិយាល័យ Grade A មកជួល Grade B វិញនៅពេលផ្លាស់ប្ដូរទីតាំង។
អ្នកជួលអគារការិយាល័យ Grade A ច្រើនជាង ៦០% គឺជាក្រុមហ៊ុនបរទេសធំៗ ខណៈក្រុមហ៊ុនក្នុងស្រុកភាគច្រើនមិនសូវផ្តោតលើការិយាល័យ Grade A ទេ គឺពួកគេជ្រើសរើសទីតាំងណាដែលអាចហុចលទ្ធភាពឱ្យ និងមានស្តង់ដារល្មមដូចជា Grade B ឬ Grade C។
កញ្ញា សុខ ហេងពេជ្រមុន្នី បញ្ជាក់ថា «ជិត ៦០% នៃអ្នកជួលអាគារការិយាល័យធំៗគឺជាក្រុមហ៊ុនបរទេស ឬក្រុមហ៊ុនពហុជាតិ ដែលអាចឈរជើងបានយូរ។ ទោះជាយ៉ាងណា ក្រុមហ៊ុនទាំងនោះក៏ព្យាយាមសន្សំសំចៃដោយងាកទៅជួលការិយាល័យលំដាប់ Grade B ឬ Grade C ជំនួសវិញ ដើម្បីកាត់បន្ថយការចំណាយ»។
ក្រុមហ៊ុនខ្មែរភាគច្រើនចូលចិត្តជួលផ្ទះល្វែង ឬវីឡាដើម្បីធ្វើជាការិយាល័យ។ បច្ចុប្បន្ននិន្នាការក៏មានការផ្លាស់ប្ដូរពីការជួលផ្ទះល្វែងនៅតាមផ្លូវធំៗ ទៅជួលវីឡាវិញ។ ភាពខុសគ្នារវាងការិយាល័យ និងវីឡាពីព្រោះការជួលវីឡាដាច់ដោយឡែកផ្ដល់ភាពបត់បែនខ្ពស់ ដោយបុគ្គលិកអាចស្នាក់នៅ គ្មានការកំណត់ម៉ោងចេញចូលតឹងរ៉ឹង ខុសប្លែកពីការជួលនៅក្នុងអាគារការិយាល័យដែលមានច្បាប់វិន័យតឹងរ៉ឹង។
ពាក់ព័ន្ធទីផ្សារខុនដូរវិញ កញ្ញា សុខ ហេងពេជ្រមុន្នីបានបញ្ជាក់ថា តម្លៃមានការធ្លាក់ចុះយ៉ាងខ្លាំង ខណៈមានខុនដូរាប់ម៉ឺនយូនីតកំពុងស្ថិតក្នុងស្ថានភាពទំនេរមិនទាន់មានអ្នកស្នាក់នៅ។
«ទីផ្សារខុនដូរបច្ចុប្បន្នតម្លៃទាបបំផុតចាប់ពីប្រហែល ១ ២០០ ដុល្លារ ក្នុងមួយម៉ែត្រការ៉េ និងខ្ពស់បំផុតអាចចាប់ពី ២ ៧០០ ឡើងទៅ ក្នុងមួយម៉ែត្រការ៉េ។ យ៉ាងណាមិញ តម្លៃលក់ជាក់ស្តែងអាចទាបជាងតម្លៃដាក់ស្នើពី ២០% ទៅ ៣០%»។
កញ្ញា សុខ ហេងពេជ្រមុន្នី បានបញ្ជាក់ថា ម្ចាស់ខុនដូឥឡូវនេះសុខចិត្តបញ្ចុះតម្លៃ ដើម្បីទាក់ទាញអ្នកជួលឲ្យបានមុនសិន ទោះបីជាចំណូលដែលទទួលបានមានគម្លាតឆ្ងាយខ្លាំងពីការវិនិយោគសាងសង់រាប់លានដុល្លាររបស់ពួកគេក៏ដោយ។
ដើម្បីទាក់ទាញអ្នកជួលក្នុងស្ថានភាពទីផ្សារដ៏លំបាកនេះ អ្នកជំនាញរូបនេះណែនាំដល់ម្ចាស់អចលនទ្រព្យត្រូវតែកែសម្រួលយុទ្ធសាស្ត្រពីរយ៉ាង៖ ១. បញ្ចុះតម្លៃជួល៖ កាលពីមុន តម្លៃជួលការិយាល័យមិនងាយចុះថ្លៃនោះទេ ប៉ុន្តែបច្ចុប្បន្នត្រូវតែបញ្ចុះតម្លៃដើម្បីប្រកួតប្រជែង។ ២. ផ្ដល់ការសម្រួលដល់ការរៀបចំការិយាល័យធ្វើការឲ្យមានស្តង់ដាជាមុន ដើម្បីជួយកាត់បន្ថយការចំណាយ និងពេលវេលារបស់អ្នកជួលក្នុងការសាងសង់បន្ថែម ដែលធ្វើឲ្យពួកគេងាយស្រួលក្នុងការសម្រេចចិត្តចូលជួល។
អ្នកជំនាញក្រុមហ៊ុនអចលនទ្រព្យមើលឃើញថា ខណះប្រជាជនខ្មែរទូទៅនៅតែនិយមរស់នៅតាមបុរី ប៉ុន្តែសម្រាប់ទីផ្សារ ខុនដូ យុវជនជំនាន់ក្រោយៗ ដូចជាក្រុម Gen Z និង Gen Alpha អាចជានិន្នាការអតិថិជនគោលដៅនាពេលអនាគត ព្រោះពួកគេមានស្ទីលរស់នៅបែបទាន់សម័យ និងស៊ីវិល័យជាងមុន៕
-
សេដ្ឋកិច្ច៣ ថ្ងៃ agoអ្នកជំនាញ៖ វិស័យអចលនទ្រព្យនៅកម្ពុជាមិនទាន់មានសញ្ញាងើបឡើងវិញរហូតដល់បច្ចុប្បន្ននេះ
-
ព័ត៌មានអន្ដរជាតិ៧ ម៉ោង agoយន្តហោះមីយ៉ាន់ម៉ា ទម្លាក់គ្រាប់បែកជញ្ជ្រំព្រំដែន កក្រើកដល់ដីថៃ ធ្វើឲ្យពលរដ្ឋភ័យព្រលឹងចុងសក់ ទៀតហើយ
-
ព័ត៌មានជាតិ១ សប្តាហ៍ agoឱកាសសិស្សនិស្សិត! អាហារូបករណ៍ទេពកោសល្យឌីជីថលតេជោ ៦០០កន្លែង កំពុងបើកទទួលពាក្យ
-
ព័ត៌មានអន្ដរជាតិ៣ ថ្ងៃ agoតើឥណ្ឌាពិតជាខ្នងបង្អែកដ៏រឹងមាំ របស់អ៊ីស្រាអែល ដូចអ្វីដែលលោក ណេតាន់យ៉ាហ៊ូ អួតអាងមែនទេ?
-
ព័ត៌មានជាតិ១ ថ្ងៃ agoលេចចេញគំរូស្ពានឆ្លងទន្លេមេគង្គ គ្រោងសាងសង់ដោយជប៉ុនតាមផ្លូវជាតិលេខ ១
-
សន្តិសុខសង្គម១ ថ្ងៃ agoបង្ក្រាប Online Scam នៅក្រុងសិរីសោភ័ណ ឃាត់ខ្លួនយុវជនម្នាក់ បើកកន្លែងប្រតិបត្តិការឆបោកតែម្នាក់ឯង
-
ព័ត៌មានជាតិ៣ ថ្ងៃ agoកម្ពុជា UNODC និងសមាជិកមហាអនុតំបន់ទន្លេមេគង្គឆ្នាំ១៩៩៣ នឹងបន្តរួមគ្នាដោះស្រាយបញ្ហាគ្រឿងញៀនសំយោគ
-
ព័ត៌មានអន្ដរជាតិ៣ ថ្ងៃ agoមានការផ្ទុះគ្រាប់បែក ក្បែរសណ្ឋាគារលោក Macron ស្នាក់នៅ អំឡុងដំណើរទស្សនកិច្ច ប្រទេសស៊ីរី