តម្លៃប្រេងអន្តរជាតិហក់ឡើងខ្ពស់ ដោយជម្លោះអាមេរិក-អ៊ីរ៉ង់កាន់តែតានតឹង

តម្លៃប្រេងអន្តរជាតិ​បាន​បន្តហក់ឡើងខ្ពស់សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទនេះ ​ខណៈភាពតានតឹង​នៃជម្លោះសហរដ្ឋអាមេរិក-អ៊ីរ៉ង់កើនឡើងជាថ្មី ហើយគំរាមកំហែងដល់ការដឹកជញ្ជូនប្រេងនៅច្រកសមុទ្រហ័រមូហ្ស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅ ម៉ាក Brent បាន​ហក់ឡើង ៣,១៨ ដុល្លារ ឬ ៤,១៨% ​ដល់ ៧៩,១៩ ដុល្លារ/បារ៉ែល គិតត្រឹមម៉ោង ១០ ព្រឹកនៅទីក្រុងហុងកុង ខណៈតម្លៃប្រេងអាមេរិក WTI បាន​កើនឡើង ៣,០៦ ដុល្លារ ឬ ៤,២៩% ដល់ ៧៤,៤៧ ដុល្លារ/បារ៉ែល។

តម្លៃប្រេង Brent បាន​កើនឡើង ៥,៥៍៍% និង WTI ជាង ៤% កាលពីសប្ដាហ៍មុន។

នៅចុងសប្ដាហ៍កន្លងទៅ ភាពតានតឹង​មជ្ឈិមបូព៌ាបានកើន​កាន់តែខ្លាំង បន្ទាប់ពីអ៊ីរ៉ង់ពង្រីកការវាយប្រហារទៅលើប្រទេសកាតា និង​អារ៉ាប់រួម ខណៈ​អាមេរិកក៏បានបើកការវាយប្រហារបន្ថែមលើអ៊ីរ៉ង់ផងដែរ។ ការវាយប្រហារ និងការឆ្លើយតបជាបន្តបន្ទាប់នេះ បានបង្កការព្រួយបារម្ភអំពីសុវត្ថិភាពនៃការដឹកជញ្ជូនប្រេងឆ្លងកាត់ច្រកសមុទ្រហ័រមូហ្ស ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក។

ប្រធានាធិបតីអាមេរិក លោក ដូណាល់ ត្រាំ បានអះអាងថា ច្រកសមុទ្រហ័រមូហ្សនៅតែបើកសម្រាប់នាវាពាណិជ្ជកម្ម។ ទោះជាយ៉ាងណា អ៊ីរ៉ង់បានប្រកាសថា ខ្លួនបានបិទច្រកសមុទ្រនេះ បន្ទាប់ពីនាវាមួយគ្រឿងធ្វើដំណើរតាមផ្លូវដែល​អ៊ីរ៉ង់មិន​អនុញ្ញាត ហើយត្រូវរងការវាយប្រហារ។ ទិន្នន័យតាមដាននាវាបង្ហាញថា មាននាវាតែ ៦ គ្រឿងប៉ុណ្ណោះបានឆ្លងកាត់ច្រកសមុទ្រនេះកាលពីថ្ងៃអាទិត្យ ដែលជាចំនួនទាបបំផុតក្នុងរយៈពេល ៥ សប្ដាហ៍។

អ្នកវិភាគបានលើកឡើងថា ភាពតានតឹងចុងក្រោយធ្វើឱ្យការស្វែងរកដំណោះស្រាយធ្លាក់ចូលទៅក្នុងភាពមិនប្រាកដប្រជា ​ខណៈទីផ្សារប្រេងនៅតែតាមដានយ៉ាងជិតស្និទ្ធនូវការវិវត្តនៃជម្លោះ និង​ហានិភ័យ​​​ដែលអាចប៉ះពាល់ដល់ការផ្គត់ផ្គង់ប្រេងពិភពលោក​៕

​