អ្នកជំនាញ ប្រាប់តួលេខ អ្នកស្លាប់ពិតប្រាកដ ដោយសារជំងឺកូវីដ-១៩ នៅឥណ្ឌា លោតដល់ខ្ទង់លានឯណោះ!

ក្រុមអ្នកជំនាញបានលើកឡើងថា ចំនួនអ្នកស្លាប់ពិតប្រាកដដោយសារជំងឺកូវីដ-១៩នៅក្នុងប្រទេសឥណ្ឌា គឺអាចមានដល់ទៅ១.៦លាននាក់ឯណោះ បើប្រៀបធៀបទៅនឹងចំនួនអ្នកស្លាប់ផ្លូវការ ៣១០,០០០នាក់។

កាលពីសប្តាហ៍មុន ប្រទេសអាស៊ីដែលរងការបំផ្លិចបំផ្លាញដោយវីរុសមួយនេះ បានកត់ត្រាអ្នកស្លាប់ចំនួន៤,៥២៩នាក់ ត្រឹមមួយថ្ងៃ ដែលជាតួលេខខ្ពស់ជាងប្រទេសណាណាទាំងអស់ អំឡុងពេលមានជំងឺរាតត្បាតកូវីដ-១៩។

ប៉ុន្តែការវិភាគដោយកាសែត New York Times បានបង្ហាញថា ចំនួនពិតអាចខ្ពស់ជាងតួលេខផ្លូវការជិតទ្វេដង ពោលគឺដល់ទៅ៦០០,០០០នាក់ឯណោះ។

បើប្រៀបធៀបទៅ អង់គ្លេសមានអ្នកស្លាប់តែ៩នាក់ប៉ុណ្ណោះនៅថ្ងៃនេះ ហើយមានអ្នកស្លាប់សរុបជាង១២៧,០០០នាក់។ សហរដ្ឋអាមេរិកបានកត់ត្រាអ្នកស្លាប់ប្រហែល ៥៩០,០០០នាក់ ដែលក៏ធ្វើឲ្យគេសង្ស័យផងដែរអំពីការកត់ត្រាមិនត្រឹមត្រូវ។

តួលេខអ្នកស្លាប់ផ្លូវការនៅក្នុងប្រទេសឥណ្ឌា ត្រូវបានគេដាក់ថាមានចំនួន ៣១០,០០០ នាក់ក្នុងចំនួនប្រជាជន១.៤ពាន់លាននាក់។

នៅក្នុងការពិគ្រោះយោបល់ជាមួយអ្នកជំនាញរាប់សិបនាក់ កាសែត Times បានរកឃើញថា ​វាពិបាកក្នុងការទទួលបានរូបភាពច្បាស់លាស់ សូម្បីតែចំនួនសរុបនៃការឆ្លងនៅក្នុងប្រទេសឥណ្ឌាក៏ដោយ នោះព្រោះតែការរក្សាកំណត់ត្រាមិនបានល្អ និងកង្វះនៃការធ្វើតេស្តទ្រង់ទ្រាយធំ។

លោកស្រី Kayoko Shioda អ្នកជំនាញផ្នែករោគរាតត្បាតនៃសកលវិទ្យាល័យ Emory បាននិយាយថា ដោយសារតែមន្ទីរពេទ្យកំពុងណែនតាន់តាប់ដោយអ្នកជំងឺ ដូចនេះចំនួនពិតប្រាកដមិនត្រូវបានគេរាប់ច្បាស់ទេ។

នេះអាចមានន័យថា ការស្លាប់ជាច្រើនដោយសារកូវីដ កំពុងកើតឡើងនៅតាមផ្ទះ ជាពិសេសនៅតាមតំបន់ជនបទ ដូច្នេះពួកគេមិនត្រូវបានគេរាប់បញ្ចូលឡើយ៕

ប្រែសម្រួល៖​ Vann Vann

ប្រភព៖ Daily Mail

ចុចអាន៖ ទៀតហើយ! ក្រុមអាចារ្យនៅ ឥណ្ឌា បួងសួងសុំសេចក្តីមេត្តាពីព្រះអាទិទេព ជួយការពារកូវីដ ក្រោយអស់ជំនឿលើគ្រូពេទ្យ