បាត់ដំណឹងយូរឆ្នាំ​ស្មានទៅរស់នៅស្រុកគេហើយ តាមពិតអតីតម្ចាស់ជយលាភីលេខ១ក្នុងឆ្នាំ៩០ប្លាយ ធ្លាក់ខ្លួនបែបនេះ

បន្ទាប់ពីជាប់ចំណាត់ថ្នាក់លេខ១នៃការប្រឡងចម្រៀងសម័យទូទាំងប្រទេសកាលពីឆ្នាំ៩០ប្លាយ និងបានលេចវត្តមានលើវិស័យសិល្ប:មួយរយៈ លោក សុ៊ន ប៊ុនរិទ្ធ ក៏បាត់មុខជាយូរឆ្នាំលើវិស័យមួយនេះ។

ការបាត់ដំណឹងយូរឆ្នាំរបស់លោកត្រូវបានមហាជនគិតស្មានថា តារារូបនជទៅរស់នៅស្រុកគេបាត់ហើយ តាមពិតអតីតម្ចាស់ជយលាភីលេខ១ផ្នែកចម្រៀងសម័យជាប់ចំណាត់ថ្នាក់លេខ១ទូទាំងប្រទេសក្នុងឆ្នាំ១ ៩៩៥ លោក សុ៊ន ប៊ុនរិទ្ធ ធ្លាក់ខ្លួនធ្វើជាសន្តិសុខ។

បើតាមប្រភពពីលោក ថន ផន (Thorn Phorn) បានទម្លាយឲ្យដឹងថា កាលពីថ្មីៗកន្លងទៅលោកបានជួបលោក សុ៊ន ប៊ុនរិទ្ធ  ដោយចៃដន្យ នៅពេលដែលយកថវិកាទៅជូនលោក សំ វណ្ណៈ អ្នកតន្ត្រីពិកាដែលទទួលរងការគ្រោះថ្នាក់ចរាចរណ៍កាលពីឆ្នាំ ២០២០។

លោកបន្តថា គាប់ជួនពេលនោះក៏បានឃើញលោក ស៊ុន ប៊ុនរិទ្ធ ដើរយួរថង់ម្ហូបដោយមើលសឹងពុំស្គាល់ ហើយលោក សំ វណ្ណៈ ប្រាប់ថា នោះជាលោក សុ៊ន ប៊ុនរិទ្ធ ។ លោកថា ដោយហេតុនេះក៏សម្ភាសន៍សំណេះសំណាលនិងផ្តល់ជូនថវិកា ៥ ម៉ឺនរៀលដល់លោក សុ៊ន ប៊ុនរិទ្ធ ហើយក៏សំណូមពរឱ្យគាត់បកស្រាយបទ អារសាច់ជូនម្តាយ បាន ២ឃ្លាដែលជាបទជយលាភីលេខ១។

លោកបន្ថែមទៀតថា បច្ចុប្បន្នលោក សុ៊ន ប៊ុនរិទ្ធ ធ្លាក់ខ្លួនមកធ្វើជាសន្តិសុខយាមផ្ទះ ហើយរឿងដែលអាណិតទៀតនោះគឺកាលពីមិនទាន់ជាសន្តិសុខគាត់ធ្លាប់ដើរស៊ីឈ្នួលរែកដីឱ្យគេទៀតផង ។ ជាមួយគ្នានេះក៏មានការលើកឡើងថាលោក សុ៊ន ប៊ុនរិទ្ធ កាលពីនៅមានជីវភាពធូធារ ជាមនុស្សម្នាក់ដែលចិត្តល្អ ស្លូតបូត និងចូលចិត្តជួយគេផងដែរ៕

អត្ថបទ៖ ចាន់រ៉ា

ចុចអាន៖ លោក ហេង ឡុង៖ ខ្ញុំមិនគាំទ្រដាច់ខាតចំពោះអ្នកសិល្ប:ដែលធ្វើរឿងអត់ប្រយោជន៍មិនផ្តល់គំរូល្អសម្រាប់សង្គម

ចុចអាន៖ តារាសម្តែង វ៉ាយុ បកស្រាយពីផលប៉ះពាល់ធ្ងន់ធ្ងរដល់អាជីពសិល្បៈដោយសារផ្ទុះព័ត៌មានមិនពិតមួយ