ព័ត៌មានជាតិ

រដ្ឋាភិបាលប្រកាសរៀបចំការប្រឡងជ្រើសរើសនិស្សិតចូលរៀនផ្នែកវិស័យសុខាភិបាលតាមអនឡាញ

បានផុស

៥ years មុន

នៅ

ថ្ងៃចន្ទ ៧ មិថុនា ២០២១

ដោយ

ភ្នំពេញ ៖ គណៈកម្មការប្រឡងថ្នាក់ជាតិសម្រាប់ការបណ្តុះបណ្តាលក្នុងវិស័យសុខាភិបាលសហការជាមួយវិទ្យាស្ថានបច្ចេកវិទ្យាកម្ពុជានឹងរៀបចំការប្រលងអនឡាញដើម្បីជ្រើសរើសនិស្សិតចូលរៀនថ្នាក់ឆ្នាំសិក្សាមូលដ្ឋានសម្រាប់កម្រិតបរិញ្ញាបត្រនិងថ្នាក់ឆ្នាំទី១ សម្រាប់កម្រិតបរិញ្ញាបត្ររងនៅតាមគ្រឹះស្ថានបណ្តុះបណ្តាលវិស័យសុខាភិបាលសម្រាប់ឆ្នាំសិក្សា២០២០ ២០២១។

លោកបណ្ឌិតសភាចារ្យហ៊ីងថូរ៉ាស៊ី ប្រធានគណៈកម្មការប្រឡងថ្នាក់ជាតិសម្រាប់បណ្តុះបណ្តាលក្នុងវិស័យសុខាភិបាលបានឲ្យដឹងក្នុងសេចក្តីជួនដំណឹងចុះថ្ងៃទី៧មិថុនានេះថា ការប្រឡងតាមអនឡាញនេះដោយសារស្ថានភាពជំងឺកូវីដ ១៩ដែលទាក់ទិនទៅនឹងព្រឹត្តិការណ៍សហគមន៍២០កុម្ភៈមិនទាន់បានធូរស្រាលនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បណ្ឌិតសភាចារ្យ បានបន្តថា ដូចនេះទើបគណៈកម្មការសហការជាមួយវិទ្យាស្ថានបច្ចេកវិទ្យាកម្ពុជានឹងរៀបចំការប្រលងអនឡាញសម្រាប់បេក្ខជនបេក្ខនារីដែលបានដាក់ពាក្យចូលរួមប្រឡងរួចហើយកាលពីថ្ងៃទី២២ខែមករាឆ្នាំ ២០២១សម្រាប់ការបណ្ដុះបណ្ដាលក្នុងវិស័យសុខាភិបាល។

លោក បណ្ឌិតសភាចារ្យ បានបន្តទៀតថា ចំពោះការប្រឡងសាកល្បងលើកទី១នឹង ប្រព្រឹត្តទៅនៅថ្ងៃទី១៥ខែមិថុនាឆ្នាំ២០២១ ចាប់ពីម៉ោង២រសៀលដល់ម៉ោង ៣រសៀលនិងលើកទី២នៅថ្ងៃទី១៧ ខែមិថុនាឆ្នាំ២០២១ចាប់ពីម៉ោង២រសៀលដល់ម៉ោង៣រសៀល។

លោក បណ្ឌិតសភាចារ្យ បានបន្ថែមទៀតថាការប្រឡងបែងចែកបេក្ខជនបេក្ខនារីជា៣ ក្រុម។ ក្រុមទី១សម្រាប់បេក្ខជនបេក្ខនារីប្រឡងចូលរៀនថ្នាក់វេជ្ជបណ្ឌិតទូទៅថ្នាក់ទន្តបណ្ឌិតទូទៅនិងថ្នាក់បរិញ្ញាបត្រឆ្មប ។ ក្រុមទី២ សម្រាប់បេក្ខជនបេក្ខនារីប្រឡងចូលរៀនថ្នាក់បរិញ្ញាបត្រឱសថ ថ្នាក់បរិញ្ញាបត្រគិលានុបដ្ឋាកនិងថ្នាក់បរិញ្ញាបត្រព្យាបាលដោយចលនានិង ក្រុមទី ៣ សម្រាប់បេក្ខជនបេក្ខនារីប្រឡងចូលរៀនថ្នាក់បរិញ្ញាបត្ររងគិលានុបដ្ឋាក បរិញ្ញាបត្ររងឆ្មប បរិញ្ញាបត្ររងបច្ចេកទេសមន្ទីរពិសោធន៍ បរិញ្ញាបត្ររងទន្តគិលានុបដ្ឋាក បរិញ្ញាប័ត្ររងព្យាបាលដោយចលនានិងថ្នាក់បរិញ្ញាបត្ររងវិទ្យុសាស្ត្រ។

លោក បណ្ឌិតសភាចារ្យ បានបញ្ជាក់ថា កម្មវិធីប្រលងមានចំនួនពីរថ្ងៃគឺ នៅ ថ្ងៃទី ២៨ខែមិថុនាឆ្នាំ២០២១ ពេលព្រឹកសម្រាប់ក្រុមទី១និង ពេលរសៀលសម្រាប់ក្រុមទី២។ចំណែកនៅថ្ងៃទី២៩ ខែមិថុនាពេលព្រឹកសម្រាប់ក្រុមទី៣។

លោក បណ្ឌិតសភាចារ្យ បានបញ្ជាក់បន្ថែមថា បេក្ខជនបេក្ខនារីត្រូវមានឈ្មោះក្នុងបញ្ជីរាយនាមបេក្ខជនចូលរួមប្រឡងថ្នាក់ឆ្នាំសិក្សាមូលដ្ឋានសម្រាប់កម្រិតបរិញ្ញាបត្រនិងថ្នាក់ឆ្នាំទី១ សម្រាប់កម្រិតបរិញ្ញាបត្ររងនៅតាមគ្រឹះស្ថានបណ្តុះបណ្តាលវិស័យសុខាភិបាលសម្រាប់ឆ្នាំសិក្សា២០២០ ២០២១នាសម័យប្រឡងថ្ងៃទី២៨និង២៨ខែមិថុនាទើបអាចចូលរួមប្រលងតាមកម្មវិធីអនឡាញបាន។

លោក បណ្ឌិតសភាចារ្យ បានបន្ថែមថា បេក្ខជនបេក្ខនារីត្រូវរកកន្លែងដែលមានអ៊ីនធឺណិតខ្លាំងនិងសុវត្ថិភាពដើម្បីធានាថា មិនរំខានដល់ដំណើរការប្រឡងហើយគណៈកម្មការមិនទទួលខុសត្រូវចំពោះការរំខានការប្រឡងដែលបណ្ដាលមកពីបញ្ហាអ៊ីនធឺណិតរបស់ប្រទេសនោះទេ៕

ដោយ ៖ សំអឿន