មន្ត្រីជំនាញអះអាងថា អ្នកជំងឺវីរុសបំប្លែងខ្លួន ត្រូវចំណាយពេលព្យាបាលយូរជាងអ្នកឆ្លងកូវីដ-១៩

ប្រធានមន្ទីរសុខាភិបាលខេត្តបាត់ដំបងបានប្រាប់ឱ្យដឹងថា ការព្យាបាលអ្នកជំងឺកូវីដបំប្លែងថ្មី B.1.617 ដែលមានប្រភពមកពីប្រទេសឥណ្ឌាត្រូវការចំណាយពេលវេលាយូរជាងអ្នកជំងឺឆ្លងវីរុសកូវីដធម្មតា។

លោកវេជ្ជបណ្ឌិត វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបងបានឱ្យដឹងនៅរសៀលថ្ងៃទី២០ មិថុនានេះថា
ជាក់ស្តែងអ្នកជំងឺបំប្លែងថ្មី B.1.617 ចំនួន២នាក់នៅបាត់ដំបង បើទោះបីជាបានជាសះស្បើយ បន្ទាប់ពីធ្វើតេស្តអវិជ្ជ
មានចំនួន២ដងរួចហើយក៏ដោយ គ្រូពេទ្យនៅមិនទាន់អនុញ្ញាតឱ្យចេញពីមន្ទីរពេទ្យបានទេ ដោយត្រូវទុកពិនិត្យរយៈពេល៧ថ្ងៃដើម្បីធ្វើតេស្តម្តងទៀត បើអវិជ្ជមាននឹងត្រូវបន្តធ្វើចត្តាឡីស័ករយៈពេល១៤ថ្ងៃទៀត។

លោកបានបន្តថា ការធ្វើបែបនេះគឺដើម្បីឱ្យប្រាកដប្រជាថាអ្នកជំងឺអស់មេរោគវីរុសបំប្លែងថ្មីនឹងមិនមានលាប់ជំងឺឡើងវិញនៅពេលក្រោយ។ ផ្ទុយពីនេះ ប្រសិនបើអ្នកឆ្លងវីរុសកូវីដ-១៩ មិនមែនបំប្លែងថ្មីពេលតេស្តអវិជ្ជមាន២ដងហើយ គ្រូពេទ្យអាចអនុញ្ញាតឱ្យអ្នកជំងឺវិលត្រឡប់ទៅផ្ទះវិញបាន តែត្រូវបន្តធ្វើចត្តាឡីស័កនៅផ្ទះរយៈពេល១៤ថ្ងៃទៀត។

លោក វេជ្ជបណ្ឌិត វឿង ប៊ុនរ៉េត បានបន្តទៀតថា អ្នកជំងឺបំប្លែងថ្មី B.1.617 ចំនួន២នាក់នេះ ដែលម្នាក់ជាបុរសវ័យ ៤៦ ឆ្នាំសម្រាកព្យាបាលនៅមន្ទីរពេទ្យឯកភ្នំខេត្តបាត់ដំបង និងម្នាក់ទៀតជាស្ត្រីវ័យ ៤៣ ឆ្នាំកំពុងសម្រាកព្យាបាលនៅមន្ទីរពេទ្យស្រុកមោងឬស្សី ខេត្តបាត់ដំបង ដែលអ្នកជំងឺទាំងពីរនាក់នេះត្រូវបានក្រសួងសុខាភិបាលប្រកាសរកឃើញឆ្លងជំងឺបំប្លែងថ្មី B.1.617 ថ្មីកាលពីថ្ងៃទី៤ ខែមិថុនាកន្លងទៅជាមួយនឹងអ្នកជំងឺម្នាក់ទៀតនៅខេត្តឧត្តរមានជ័យដែលបានព្យាបាលជាសះស្បើយដូចគ្នាដែរ ។

លោក វេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តបន្ទាយមានជ័យបានឱ្យដឹងថា ស្ត្រីអាយុ ២៧ ឆ្នាំជាពលករធ្វើដំណើរមកពីប្រទេសថៃឆ្លងជំងឺវីរុសបំប្លែងឥព្ឌា បានចូលសម្រាកមន្ទីរពេទ្យនៅថ្ងៃទី៤ ខែមិថុនា ហើយបានជាសះស្បើយពីជំងឺនេះហើយ បន្ទាប់ពីធ្វើតេស្តអវិជ្ជមានចំនួន២លើករួចមក។

លោក វេជ្ជបណ្ឌិតបានបន្តថា បើទោះបីជាគាត់ជាសះស្បើយក្តី ក៏ក្រសួងមិនទាន់អនុញ្ញាតឱ្យគាត់ចេញពីមន្ទីរពេទ្យដែរដោយតម្រូវឱ្យធ្វើចត្តាឡីស័កចំនួន២១ថ្ងៃទៀត ។

កាលពីថ្ងៃទី១៩ ខែមិថុនា ឆ្នាំ២០២១ ក្រសួងសុខាភិបាលបានប្រកាសរកឃើញករណីវីរុសបំប្លែងថ្មី ប្រភេទ B.I.617
ចំនួន៧នាក់បន្ថែមទៀតដែលជាពលករមកពីប្រទេសថៃក្នុងនោះ ខេត្តឧត្តរមានជ័យចំនួន២នាក់ ខេត្តបន្ទាយមានជ័យចំនួន១នាក់ ខេត្តសៀមរាបចំនួន២នាក់ កំពត១នាក់ និងខេត្តកំពង់ចាមចំនួន១នាក់៕

អត្ថបទ៖ សំអឿន

ចុចអាន៖ ឃាត់ខ្លួនមនុស្ស៣នាក់លួចដឹកសាច់ជ្រូកនិងប្រហិតខុសច្បាប់ ស្រាប់តែរកឃ់ើញវិជ្ជមានកូវីដម្នាក់