លោក ចូ បៃដិន ថា អាមេរិក មិនទាន់ “យកឈ្នះ” ជំងឺកូវីដ ១៩ នៅឡើយទេ

ប្រធានាធិបតីអាមេរិកលោក ចូ បៃឌិន បានព្រមានកាលពីថ្ងៃអាទិត្យ នៅឯពិធីអបអរសាទរទិវាបុណ្យឯករាជ្យជាតិថា ជំងឺកូវីដ ១៩ មិនទាន់ត្រូវបាន “យកឈ្នះ” នៅឡើយទេ បើទោះបីជាជនជាតិអាមេរិក ទទួលការចាក់វ៉ាក់សាំងប្រឆាំងនឹងជំងឺរាតត្បាតនេះក៏ដោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់ហ្វូងមនុស្ស ដែលមានការអបអរសាទរនៅសេតវិមានថា “យើងទទួលបានការគាំទ្រដើម្បីប្រឆាំងពីវីរុសនេះ ។ ប៉ុន្តែជំងឺកូវីដ ១៩ មិនទាន់ត្រូវបានយកឈ្នះនៅឡើយទេ ។ យើងទាំងអស់គ្នាដឹងហើយថា វីរុសបំប្លែងខ្លួនដែលកំពុងមានឥទ្ធិពល បានលេចចេញមក ដូចជា វីរុសបំប្លែងខ្លួនឥណ្ឌា Delta ជាដើម” ។

លោក បៃដិន ដែលបានធ្វើការប្រយុទ្ធប្រឆាំងនឹងវីរុសនេះ ជាអាទិភាពដ៏សំខាន់នៃរដ្ឋបាលរបស់លោក បានប្រកាសថា ថ្ងៃទី ៤ ខែកក្កដា ជាកាលបរិច្ឆេទគោលដៅសម្រាប់ជនជាតិអាមេរិក ប្រមូលផ្តុំគ្នាជាក្រុមតូចៗសម្រាប់វិស្សមកាល និងជាសញ្ញាបង្ហាញពីការវិលត្រឡប់ទៅរកភាពធម្មតាវិញ នៅពាក់កណ្តាលនៃជំងឺរាតត្បាត ។

លោក បៃដិន ដំបូងឡើយបានកំណត់គោលដៅដើម្បីធានា មនុស្សពេញវ័យចំនួន ៧០ ភាគរយទទួលបានវ៉ាក់សាំងការពារជំងឺកូវីដ ១៩ យ៉ាងហោចណាស់ ១ ដូសនៅត្រឹមថ្ងៃទី ៤ ខែកក្កដា ។ ប៉ុន្តែប្រទេសនេះមិនបានសម្រេចគោលដៅនេះនោះទេ ពោលគឺជនជាតិអាមេរិកចំនួន ១៧២ លាននាក់ ឬប្រហែល ៦៧ ភាគរយប៉ុណ្ណោះនៃមនុស្សពេញវ័យ បានទទួលការចាក់វ៉ាក់សាំងយ៉ាងតិច ១ ដូស ។

គួរបញ្ជាក់ថា គិតត្រឹមពេលនេះ សហរដ្ឋអាមេរិក មានករណីឆ្លងជំងឺកូវីដ ១៩ ជាង ៣៤.៥ លានករណី និងមានអ្នកស្លាប់ជាង ៦២ ម៉ឺននាក់ ពោលច្រើនជាងប្រទេសដទៃទៀតទាំងអស់នៅលើពិភពលោក ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ អាមេរិក ជំរុញប្រជាជនឲ្យចាក់វ៉ាក់សាំង ព្រោះជិតដល់បុណ្យឯករាជ្យ និងចំពេលផ្ទុះវីរុសបំប្លែងខ្លួនឥណ្ឌា