អាជ្ញាធរខេត្តព្រៃវែង បិទខ្ទប់ភូមិមួយក្នុងស្រុកកំចាយមារ ក្រោយផ្ទុះជំងឺកូវីដខ្លាំង

រដ្ឋបាលខេត្តព្រៃវែង បានសម្រេចបិទខ្ទប់ភូមិ ព្រៃស្ទរ ឃុំស្មោងជើង ស្រុកកំចាយមារ ជាបណ្ដោះ​អាសន្ន​រយៈពេល១៤ថ្ងៃ ចាប់ពីម៉ោង០០ ថ្ងៃទី១៥ ខែកក្កដា រហូតដល់ថ្ងៃទី២៨ ខែកក្កដា ឆ្នាំ២០២១ ក្រោរកឃើញ​ករណី​ឆ្លងជំងឺកូវីដ-១៩ ច្រើន។

រដ្ឋបាលខេត្តបានបញ្ជាក់ថា កាលពីថ្ងៃទី១០ ខែកក្កដា ឆ្នាំ២០២១​ មានកម្មកររោងចក្រកាត់ដេរ អរិន មេនូ​ហ្វេក​ធឺរីង (ខ្មែរ) ឆ្លងជំងឺកូវីដ-១៩ និងបានឆ្លងចូលក្នុងសហគមន៍ក្នុងស្រុកកំចាយមារ ដែលអាជ្ញាធរ ឃុំ ស្រុក កំពុងស្រាវជ្រាវរកអ្នកពាក់ព័ន្ធផ្ទាល់ និងប្រយោល ចាត់វិធានការណ៍ជាបន្តបន្ទាប់។ ដោយឡែក​ក្នុងភូមិ ព្រៃស្ទរ ឃុំស្មោងជើង មានប្រជាពលរដ្ឋឆ្លងជំងឺកូវីដ-១៩ ច្រើនតម្រូវឲ្យអាជ្ញាធរចាត់វិធានការជា​បន្ទាន់៕

អត្ថបទ ​៖ សុខុម