អាជីវករផ្សារដើមគរ ឆ្លងកូវីដ​១៩ ​ចំនួន២នាក់ មានម្នាក់មិនបានចាក់វ៉ាក់សាំង

ក្រុមគ្រូពេទ្យ បានសហការជាមួយអាជ្ញាធរ និងគណកម្មការផ្សារ បានចុះយកសំណាកលើ អាជីវករលក់ដូរនៅសងខាងផ្លូវ៣៣៦ ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ នៅព្រឹកថ្ងៃទី៣០ ខែសីហា ឆ្នាំ២០២១ ក្រោយពី មានអ្នកវិជ្ជមានកូវីដ១៩ បំប្លែងថ្មីប្រភេទដែលតា ធ្លាប់បានចេញចូលទីតាំងនេះ។

លោក គៀង ចក់ ប្រធានផ្សារដើមគរបានបញ្ជាក់ថា ការធ្វើតេស្តរយៈពេលជាងមួយម៉ោងនៅព្រឹកនេះ លើអាជីវករចំនួន២១៥នាក់ ជាលទ្ធផលរកឃើញអាជីករចំនួន២ វិជ្ជមានកូវីដ១៩។

លោក គៀង ចក់ បានបន្តទៀត ក្នុងចំណោមអ្នកទាំង២ មានម្នាក់អាយុ៣១ឆ្នាំ ភេទស្រី ជាអ្នកលក់កាហ្វេតាមរទេះរុញចល័ត ធ្លាប់បានចាក់វ៉ាក់សាំងគ្រប់ចំនួន រីឯម្នាក់ទៀត អាយុ១៦ឆ្នាំ ភេទស្រី ជាអ្នកជួយលក់ស្បោងអោយគេ មិនដែលធ្លាប់បានចាក់វ៉ាក់សាំងបង្ការជំងឺកូវីដ១៩នោះទេ។

លោក គៀង ចក់ បានបន្ថែមថា ចំពោះការបិទខ្ទប់ ឬមានវិធានការអ្វីបន្តយ៉ាងនោះគឺត្រូវរងចាំការវាយតម្លៃពីគណកម្មការអន្តរក្រសួង នៅរសៀលនេះសិន។

គួរបញ្ជាក់ថា ការធ្វើតេស្តកាលពីព្រឹកមិញគឺធ្វើតេស្តលើអាជីវករសងខាងផ្សារផ្លូវលេខ៣៣៦ ខាងជើងផ្សារដើមគរ ដោយចំពោះបរិវេណផ្សារដើមគរគឺនៅដំណើរការបើកជាធម្មតា៕

អត្ថបទ៖ ពុធិកា