អាមេរិក វាយ ៤យប់-៤ថ្ងៃ! អ៊ីរ៉ង់ ប្រកាសថា ស្លាប់ជនស៊ីវិលជាង ៣០នាក់ និងរបួស ២៦០នាក់

ក្នុងរយៈពេល៤យប់-៤ថ្ងៃមកនេះ សហរដ្ឋអាមេរិក បានវាយសន្ធាប់អ៊ីរ៉ង់មិនព្រមដកដៃនោះឡើយ ដោយកំណត់គោលដៅលើទីតាំង រាប់រយកន្លែង ហើយឥឡូវទីក្រុងតេហេរ៉ង់ អះអាងថា មានជនស៊ីវិលជាង ៣០នាក់ ស្លាប់ក្នុងការវាយប្រហារនោះ។

ទូរទស្សន៍ Al Jazeera បានដកស្រង់របាយការណ៍ របស់ក្រសួងសុខាភិបាលអ៊ីរ៉ង់ ដែលក៏ឲ្យដឹងផងដែរថា ក្រៅពីមនុស្សស្លាប់ នៅមាន ជាង ២៦០នាក់ទៀតរបួស ទូទាំងប្រទេស។

ទន្ទឹមនោះ ទីក្រុងតេហេរ៉ង់ ក៏ទទួលស្គាល់ដែរថា ការវាយប្រហារដោយមីស៊ីលតែមួយគ្រាប់ របស់សហរដ្ឋអាមេរិក ដែលមានផ្ទុកក្បាលគ្រាប់ចំនួន ១៣ បានធ្លាក់ចំយោធភូមិភាគមួយ នៅជិតទីក្រុង Bampur ភាគអាគ្នេយ៍ សម្លាប់បុគ្គលិកយោធាអស់ ៧ នាក់។

រឿងនេះកើតឡើង បន្ទាប់ពីការវាយប្រហាររបស់អាមេរិក លើអ៊ីរ៉ង់ បានឈាន​ចូល​យប់​ទី​៤​ និង​ថែមទាំង​ ចាប់​ផ្តើម​អនុវត្តការបិទខ្ទប់​ផ្លូវ​ទឹក​ ទៀតផង។

តាមការផ្សាយរបស់ CNN នៅថ្ងៃពុធ ទី១៥ ខែកក្កដា ឆ្នាំ២០២៦ ប្រតិបត្តិការយោធាចុងក្រោយបង្អស់នេះ ចាប់ផ្តើមឡើងនៅម៉ោង ១០:៣០នាទីយប់ថ្ងៃអង្គារ ហើយក្រោយមកមួយម៉ោង លោកប្រធានាធិបតី ដូណាល់ ត្រាំ ក៏បញ្ជាឲ្យបិទខ្ទប់ផ្លូវទឹកជាផ្លូវការតែម្តង លើគ្រប់កំពង់ផែអ៊ីរ៉ង់។

ជុំវិញរឿងនេះ បើតាមសេចក្តីប្រកាសរបស់បញ្ជាការដ្ឋានកណ្តាលសហរដ្ឋអាមេរិក (CENTCOM), ការវាយប្រហារ គឺផ្តោតសំខាន់ទៅបំផ្លាញសមត្ថភាពរបស់អ៊ីរ៉ង់ លែងឲ្យវាយប្រហារលើកប៉ាល់ដឹកជញ្ជូនពាណិជ្ជកម្ម នៅក្នុងច្រកសមុទ្រ Hormuz ទៀត។

ក្នុងប្រតិបត្តិការនោះ អាមេរិកបានវាយប្រហារលើមជ្ឈមណ្ឌលដែនសមុទ្រសំខាន់ៗ រួមមានទីក្រុងកំពង់ផែដ៏ធំ Bandar Abbas, រោងចក្រចម្រាញ់ប្រេងដ៏ចំណាស់ជាងគេបំផុតនៅមជ្ឈិមបូព៌ាក្នុងទីក្រុង Abadan, ទីក្រុង Mahshahr ក៏ដូចជាកោះ Qeshm, កោះ Kish និងកោះ Abu Musa ផងដែរ៕

អត្ថបទ៖ សុវណ្ណ