ព័ត៌មានជាតិ

ខេត្តព្រះសីហនុ រំសាយក្រុមគ្រូពេទ្យ២០នាក់ ក្រោយកូវីដថយចុះ

បានផុស

៥ years មុន

នៅ

ថ្ងៃពុធ ១ កញ្ញា ២០២១

ដោយ

ដោយមើលឃើញថាស្ថានភាពឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រខេត្តព្រះសីហនុមានការថមថយចុះជាបន្តបន្ទាប់នោះ រដ្ឋបាលខេត្តព្រះសីហនុ បានឯកភាពតាមសំណើររបស់ប្រធានមន្ទីរសុខាភិបាលខេត្ត ដែលបានស្នើសុំរំសាយក្រុមគ្រូពេទ្យចំនួន២០នាក់ ឲ្យទៅបម្រើការនៅតាមមណ្ឌលសុខភាពចំនួន១៦នៅកន្លែងដើមវិញ។

នៅរសៀលថ្ងៃទី៣១ ខែសីហា ឆ្នាំ២០២១ លោក គួច ចំរើន អភិបាលនៃគណៈអភិបាលខេត្តព្រះសីហនុ អញ្ជើញសំណេះសំណាលជាមួយក្រុមគ្រូពេទ្យព្យាបាលជំងឺកូវីដ-១៩ នៅសាលាខេត្តព្រះសីហនុ។

នៅក្នុងរបាយការណ៍ លោកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុ បានឱ្យដឹងថា ខេត្តព្រះសីហនុ មានក្រុងពីរ និងស្រុក៣ មានមណ្ឌលសុខភាពចំនួន១៦ ហើយថ្ងៃនេះត្រូវបានរំសាយក្រុមគ្រូពេទ្យចំនួន២០នាក់ ឱ្យទៅកាន់មណ្ឌលសុខភាពដើមវិញ បន្ទាប់ពីបានចូលរួមប្រយុទ្ធប្រឆាំងនឹងជំងឺកូវីដ-១៩ នៅខេត្តព្រះសីហនុ នាពេលកន្លងមក ហើយមកដល់ពេលនេះ មានការថយចុះជាបន្តបន្ទាប់ ។

លោក គួច ចំរើន អភិបាលខេត្តព្រះសីហនុ មានប្រសាសន៍ថា ក្នុងនាមក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋក្នុងខេត្តព្រះសីហនុ សូមកោតសរសើរថ្នាក់ដឹកនាំមន្ទីរសុខាភិបាល មន្ត្រីសុខាភិបាល និងក្រុមគ្រូពេទ្យរបស់យើងទាំងអស់ ដែលបានចូលរួមប្រយុទ្ធប្រឆាំងនឹងជំងឺកូវីដ-១៩ ក្នុងខេត្តព្រះសីហនុ នាពេលកន្លងមក។ ដោយឆ្លងកាត់ព្រឹត្តិការណ៍ជាច្រើនក្នុងក្របខណ្ឌទូទាំងខេត្ត ពិសេសក្រុមគ្រូពេទ្យរបស់យើងបានប្រមូលផ្តុំគ្នាបំពេញការងារយ៉ាងសស្រាក់សស្រាំ ក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩។ ក្រុមគ្រូពេទ្យរបស់យើងបានបង្កើនការយកចិត្តទុកដាក់ និងបានបណ្តុះបណ្តាលក្រុមជំនាញក្នុងការយកសំណាក ការព្យាបាលអ្នកជំងឺ និងកាត់ផ្តាច់ការចម្លងក្នុងសហគមន៍។

លោកអភិបាលខេត្តបានបន្តថា ក្រោយពីការរំសាយ ក្រុមគ្រូពេទ្យនឹងទៅបំពេញការងារតាមមណ្ឌលសុខភាពដើមវិញ ម្យ៉ាងទៀតក្រុមគ្រូពេទ្យរបស់យើងមានជំនាញបច្ចេកទេសក្នុងការយកសំណាកកូវីដ-១៩ និងការព្យាបាលជំងឺកូវីដ ដោយសារតែសកម្មភាពជំងឺកូវីដ-១៩ នៅខេត្តព្រះសីហនុ មានការថយចុះគួរឱ្យកត់សម្គាល់ ទើបយើងសម្រេចរំសាយក្រុមគ្រូពេទ្យទៅបម្រើការងារនៅតាមមណ្ឌលសុខភាពវិញ។ រដ្ឋបាលខេត្ត នឹងចងចាំគុណតម្លៃរបស់ក្រុមគ្រូពេទ្យដែលបានចូលរួមបំពេញការងារនៅសមរភូមិមុខក្នុងការប្រយុទ្ធនឹងជំងឺកូវីដ-១៩ នៅខេត្តព្រះសីហនុ ម្យ៉ាងទៀតក្រុមគ្រូពេទ្យបានចូលរួមក្នុងយុទ្ធនាការចាក់វ៉ាក់សាំង ជូនមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ កុមារ និងយុវវ័យរបស់យើងចាប់ពីអាយុ១២ឆ្នាំ ដល់ក្រោម១៨ឆ្នាំ ។

ក្នុងឱកាសនេះផងដែរ លោក គួច ចំរើន បានមានប្រសាសន៍ថា ក្នុងនាមរដ្ឋបាលខេត្ត លោកសូមចូលរួមសោកស្តាយចំពោះក្រុមគ្រួសារសពអ្នកគ្រូពេទ្យ អ៊ឹម ស្រីនិ ដែលបានបាត់បង់អាយុជីវិត ក្នុងបុព្វហេតុប្រយុទ្ធប្រឆាំងនឹងជំងឺកូវីដ-១៩ នេះជាការបាត់បង់នូវធនធានមនុស្ស ដែលជាវីរភាពដ៏ល្អប្រពៃក្នុងការចូលរួមជាមួយរាជរដ្ឋាភិបាល ក៏ដូចជារដ្ឋបាលខេត្តក្នុងយុទ្ធនាការប្រយុទ្ធប្រឆាំងនឹងជំងឺកូវីដ- ១៩ សូមឱ្យវិញ្ញាណក្ខន្ធអ្នកគ្រូពេទ្យទៅកាន់សុគតិភពកុំបីឃ្លៀងឃ្លាតឡើយ។

ជាមួយគ្នានេះដែរលោកអភិបាលខេត្ត ក៏បានឧបត្ថម្ភថវិកាជូនដល់ក្រុមគ្រូពេទ្យព្យាបាលជំងឺកូវីដ-១៩ ចំនួន៦២នាក់ ក្នុងម្នាក់ៗទទួលបានថវិកាចំនួន មួយលានពីរសែនរៀល(១.២០០.០០០រៀល )៕

អត្ថបទ៖ ស៊ុយ ចាន់ធា

Related Topics:រដ្ឋបាលខេត្តព្រះសីហនុ