អគ្គិភ័យឆេះស្ថានីយប្រេងឥន្ធនៈ BVM បណ្ដាលឱ្យបុរសជាម្ចាស់ រងរបួសធ្ងន់

បុរសជាម្ចាស់ហ្គារាស់សាំង BVM បានរងរបួសធ្ងន់ ក្នុងហេតុការណ៍ឆេះហ្គារាស់សាំង ស្ថិតនៅ ខាងមុខផ្សារអូរអំបិល សង្កាត់ផ្សារអូរអំបិល ក្រុងសិរីសោភ័ណ ខេត្តបន្ទាយមានជ័យ នៅម៉ោង ៧៖១៥ នាទីព្រឹកថ្ងៃទី ២៩ ខែតុលានេះ។

ប្រភពព័ត៌មានប្រាប់កម្ពុជាថ្មីថា មូលហេតុនៃការឆាបឆេះ ដោយសារតែឆ្លងចរន្តឆេះម៉ូទ័រផ្ទេរសាំងពីរថន្តស៊ីទែនដែលកំពុងផ្ទេរ ហើយរាលដាលដល់ហ្គារាស់សាំងតែម្ដង បណ្ដាលឱ្យឆេះរថយន្ត ២ គ្រឿង និងបុរសជាម្ចាស់ ត្រូវបានបញ្ជូនទៅសង្គ្រោះនៅមន្ទីរពេទ្យ។

ប្រតិបត្តិការពន្លត់ក្រោមការដឹកនាំដោយផ្ទាល់ របស់លោក សិទ្ធិ ឡោះ ស្នងការនគរបាលខេត្តបន្ទាយមានជ័យ ដោយ ប្រើរថយន្តពន្លត់អគ្គិភ័យ ២ គ្រឿង ហើយគ្រប់គ្រងបានទាំងស្រុងរយៈពេល ជិត ១ ម៉ោង បន្ទាប់ ពោលគឺនៅម៉ោង ៧៖៥០ នាទី ព្រឹកថ្ងៃទី ២៩ ខែតុលា ឆ្នាំ ២០២១៕

អត្ថបទ៖ ពៅ