ណុប បាយ៉ារិទ្ធ ចេញមុខការពារស្នាដៃនិពន្ធរបស់ឪពុក ក្រោយមានជនខិលខូចបន្លំ

តារាចម្រៀងលោក ណុប បាយ៉ារិទ្ធ បានចេញមុខប្រតិកម្ម បន្ទាប់ពីមានជនខិលខូចមួយចំនួនបានលួចបន្លំស្នាដៃនិពន្ធបទ ឆន្ទៈយុវជន ដែលជាស្នាដៃនិពន្ធឪពុករបស់លោក ដោយចង់យកធ្វើជាកម្មសិទ្ធរបស់គេ។

ការចេញមុខប្រតិកម្មពីសំណាក់លោក ណុប បាយ៉ារិទ្ធ ធ្វើឡើងបន្ទាប់ពីមានចម្ងល់ជាច្រើនរបស់អ្នកគាំទ្រដែលតែងបានសួរនាំអំពីម្ចាស់ស្នាដៃ ដូច្នេះហើយទើបតារាប្រុសរូបនេះ បានចេញមុខបញ្ជាក់ការពិត និងស្រាយមន្ទិលតែម្តង។

បើតាមការបញ្ជាក់របស់លោក ណុប បាយ៉ារិទ្ធ បានឲ្យដឹងថា “ទៅណាមកណា ជួបលោកអ៊ុំ លោកពូ អ្នកមីង មន្រ្តីរាជកា និងបងប្អូនជាច្រើន លោកតែងសួរមកខ្ញុំថា បទក្មួយច្រៀងមួយបទពិរោះណាស់ បទ ឆន្ទៈយុវជន តើអ្នកណាអ្នកនិពន្ធ? ចេះតែល្ហិចល្ហៀងថា អ្នកនេះជាអ្នកនិពន្ធ អ្នកនោះជាអ្នកនិពន្ធ។”

លោកបន្តថា “រហូតមកដល់ថ្ងៃនេះបងប្អូនជាច្រើននៅតែមិនដឹងថា តើបទនេះនណាជាអ្នកនិពន្ធឱ្យពិតប្រាកដ។ ពេលនេះបើមិននិយាយផ្ទាល់មាត់ទេ ពិតជាមិនអាចបកស្រាយចម្ងល់របស់អ៊ុំពូមីងទាំងអស់បានទេ។”

លោក ណុប បាយ៉ារិទ្ធ លើកឡើងបន្ថែមថា “មូលហេតុដែលខ្ញុំផុស ព្រោះមានអ្នកបន្លំស្នាដៃនិពន្ធរបស់ឪពុកខ្ញុំជាច្រើននាក់ នាំគ្នាចេញមុខថាជាស្នាដៃនិពន្ធរបស់ខ្លួន ទាំងកុហកឥតកេរ្ត៍ិខ្មាស់ ដូច្នេះខ្ញុំត្រូវតែការពារស្នាដៃនិពន្ធរបស់ឪពុករបស់ខ្ញុំជាដាច់ខាត។”

“បទ «ឆន្ទៈយុវជន» និពន្ធទំនុកច្រៀងដោយលោកឪពុករបស់ខ្ញុំផ្ទាល់ ណុប សម្បត្តិ (Sombat Nop) ក្នុងរយៈពេលត្រឹមតែ១យប់គត់ និពន្ធបទភ្លេងលោកគ្រូ ម៉ម សុគន្ធា។” នេះជាសម្តីបញ្ជាក់របស់លោក ណុប បាយ៉ារិទ្ធ៕

អត្ថបទ៖ ចាន់រ៉ា

ចុចអាន៖ ផលិតករទម្លាយថា «Wedding 93» វីដេអូដើមសាហាវជាង Trailer ទៅទៀត

ចុចអាន៖ នាយ ចឺម ចាប់ផ្តើមមានទឹកមាត់លេបឡើងវិញ ក្រោយបើកប្រទេស