សម្ដេចតេជោ ហ៊ុន សែន អំពាវនាវឲ្យប្រកាន់គោលការណ៍ មិនត្រូវហ៊ានពេក និងមិនត្រូវខ្លាចជ្រុលពេក

ស្របពេលដែលប្រទេសកម្ពុជា បាននិងកំពុងបើកដំណើរការសង្គម-សេដ្ឋកិច្ច ចាប់ពីដើមខែវិច្ឆិកាមក សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់បងប្អូនជនរួមជាតិ ត្រូវប្រកាន់ខ្ជាប់នូវគោលការណ៍ មិនត្រូវហ៊ានពេក និងមិនត្រូវខ្លាចជ្រុលពេក ដើម្បីលើកស្ទួយជីវភាពគ្រួសារផង និងជំរុញកំណើនសេដ្ឋកិច្ចជាតិផង។

ការអំពាវនាវនេះ គ្រាដែលសម្ដេចតេជោនាយករដ្ឋមន្ត្រី បានអញ្ជើញទៅទទួលវ៉ាក់សាំង ដែលជាជំនួយរបស់​ប្រទេ​ស​​ចិនចំនួន ២លានដូសបន្ថែមទៀត នៅព្រឹកថ្ងៃទី ១៧ ខែវិច្ឆិកា ឆ្នាំ ២០២១នេះ។ ជាថ្មីម្ដងទៀតសម្ដេចតេជោ​ ហ៊ុន សែន ក៏បានអំពាវនាវដល់បងប្អូន​ជនរួមជាតិខ្មែរទាំងអស់​ នាំកូនចៅទៅចាក់វ៉ាក់សាំងបង្ការជំងឺកូវីដ-១៩ ឲ្យ​បាន​គ្រប់ៗគ្នា និងទៅចាក់វ៉ាក់សាំងដូសជំរុញសម្រាប់ខ្លួនឯង ទៅ​តាមការកំណត់របស់អាជ្ញាធរមានសមត្ថកិច្ច។

លើសពីនេះទៀតសម្ដេចតេជោ ហ៊ុន សែន ក៏បានអំពាវនាវដល់ប្រជាពលរដ្ឋគ្រប់រូប បន្តអនុវត្តនូវរាល់វិធានកា​រ​សុខា​ភិ បាល ដែលបានដាក់ចេញ និងត្រូវ​ប្រកាន់ខ្ជាប់នូវវិធានការ ៣ការពារ និង៣កុំផងដែរ។

សម្ដេចតេជោ ហ៊ុន សែន បានលើកឡើងថា «ដោយប្រទេសយើង កំពុងបើកដំណើរការឡើងវិញលើគ្រប់​វិស័យជា​បណ្ដើរៗ សូមបងប្អូនជនរួមជាតិទាំងអស់ រៀបចំចាត់ចែង និងគ្រប់គ្រងសកម្មភាពសង្គម-សេដ្ឋកិច្ចឡើងវិញ ដោយ​ប្រកាន់គោលការណ៍ មិនត្រូវហ៊ានពេក និងមិនត្រូវខ្លាចជ្រុលពេក ដើម្បីលើកស្ទួយជីវភាពខ្លួនឯង ស្ដារ និងជំរុញ​កំណើន​សេដ្ឋកិច្ច»៕

អត្ថបទ៖ ឃួន សុភ័ក្រ