ចិន​ ជំរុញ អាស៊ាន ឆ្ពោះទៅតំបន់​គ្មាន​អាវុធ​នុយក្លេអ៊ែរ

ប្រទេសចិននៅថ្ងៃចន្ទនេះបាននិយាយថា ត្រៀមខ្លួនរួចជាស្រេចដើម្បីធ្វើការជាមួយសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន) ឆ្ពោះទៅរកតំបន់គ្មានអាវុធនុយក្លេអ៊ែរ ក្រៅពីការធានាស្ថិរភាពនៅក្នុងសមុទ្រចិនខាងត្បូងដែលមានជម្លោះ ។

លោកប្រធានាធិបតី ស៊ី ជីនពីង បានប្រាប់កិច្ចប្រជុំកំពូលចិន-អាស៊ី ដែលត្រូវបានធ្វើឡើងដើម្បីប្រារព្ធខួបលើកទី ៣០ ឆ្នាំនៃទំនាក់ទំនងរវាងភាគីទាំងពីរថា “ប្រទេសចិនគាំទ្រកិច្ចខិតខំប្រឹងប្រែងរបស់អាស៊ានក្នុងការកសាងតំបន់គ្មានអាវុធនុយក្លេអ៊ែរ ហើយត្រៀមខ្លួនជាស្រេចដើម្បីចុះហត្ថលេខាលើពិធីសារនៃសន្ធិសញ្ញាស្តីពីតំបន់គ្មានអាវុធនុយក្លេអ៊ែរនៅអាស៊ីអាគ្នេយ៍ឲ្យបានឆាប់តាមដែលអាចធ្វើទៅបាន” ។

ការអះអាងរបស់ទីក្រុងប៉េកាំងសម្រាប់តំបន់អាស៊ីអាគ្នេយ៍គ្មានអាវុធនុយក្លេអែរកើតឡើង នៅពេលដែលសហរដ្ឋអាមេរិក និងចក្រភពអង់គ្លេសផ្តល់អំណាចដល់សម្ព័ន្ធមិត្តរបស់ពួកគេគឺប្រទេសអូស្ត្រាលី ជាមួយនឹងនាវាមុជទឹកដើរដោយថាមពលនុយក្លេអ៊ែរ ក្រោមកិច្ចព្រមព្រៀងមួយហៅថា AUKUS ដែលបានចុះហត្ថលេខាកាលពីខែកញ្ញា ។

លោក ស៊ី បាននិយាយថា ការរក្សាសន្តិភាពគឺជាផលប្រយោជន៍រួមដ៏ធំបំផុតរបស់យើង និងជាក្តីប្រាថ្នាដ៏គួរឲ្យស្រឡាញ់បំផុតរបស់ប្រជាជននៃប្រទេសទាំងអស់ ដោយជំរុញឲ្យប្រកាន់យកនូវ “ការសន្ទនាជាជាងការប្រឈមមុខដាក់គ្នា” ។

ដោយបញ្ជាក់សារជាថ្មីនូវការផ្តោតការយកចិត្តទុកដាក់ជាយូររបស់ទីក្រុងប៉េកាំងលើការអនុវត្តពហុភាគីនិយមពិតប្រាកដ លោក ស៊ី បាននិយាយថា “ប្រទេសចិនប្រឆាំងយ៉ាងដាច់ខាតនូវនយោបាយអនុត្តរភាព និងអំណាច” ។

លោកបញ្ជាក់ថា “ប្រទេសចិនបន្តការរួមរស់ប្រកបដោយមិត្តភាពយូរអង្វែងជាមួយប្រទេសជិតខាង ហើយជាផ្នែកមួយនៃកិច្ចខិតខំប្រឹងប្រែងរួមគ្នាសម្រាប់សន្តិភាពយូរអង្វែងនៅក្នុងតំបន់ ។ ប្រទេសចិននឹងមិនស្វែងរកអនុត្តរភាពឡើយ ហើយនឹងមិនបង្ខិតបង្ខំប្រទេសតូចៗនៅជិតខាងក្នុងតំបន់នោះទេ” ។

ជាចុងក្រោយលោក ស៊ី បានសង្កត់ធ្ងន់ថា “កិច្ចខិតខំប្រឹងប្រែងរួមគ្នាគឺចាំបាច់ដើម្បីការពារស្ថិរភាពនៅសមុទ្រចិនខាងត្បូង និងធ្វើឲ្យវាក្លាយជាសមុទ្រនៃសន្តិភាព មិត្តភាព និងកិច្ចសហប្រតិបត្តិការ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក ស៊ី និយាយថា ចិន មិនបង្ខិតបង្ខំប្រទេសតូចៗទេ