ជាង ៤០ ឆ្នាំ រុស្សីផ្តល់អាហារូបករណ៍​ដល់និស្សិតកម្ពុជា​ជាង ៨៥០០ នាក់

ភ្នំពេញ៖ រយៈពេលជាង ៤០ ឆ្នាំនេះ រដ្ឋាភិបាល​សហព័ន្ធរុស្ស៊ីបានផ្តល់អាហារូបការណ៍ដល់និស្សិតកម្ពុជាប្រមាណជាង​៨៥០០ នាក់ ឱ្យទៅ បន្តការសិក្សាជំនាញផ្សេងៗនៅ តាមសាកលវិទ្យាល័យនានានៅ ប្រទេសរុស្សី។

លោក ផន បុរី ជំនួយការនាយិការមជ្ឈមណ្ឌលវិទ្យាសាស្ត្រ និងវប្បធម៌រុស្សីមានប្រសាសន៍នៅ ថ្ងៃទី០៦ធ្នូនេះថា ចាប់តាំងពីឆ្នាំ១៩៨០ រហូតមកដល់បច្ចុប្បន្ននេះរុស្សីបានផ្តល់អាហារូបករណ៍ដល់និស្សិតខ្មែរ ឱ្យទៅ បន្តការសិក្សានៅ តាមសាកលវិទ្យាល័យនានានៅ ប្រទេសរុស្សីប្រមាណជាង ៨៥០០ នាក់ក្នុងនោះមានប្រមាណ ៨០០០នាក់ បានបញ្ចប់ការសិក្សានិងប្រមាណជិត ៥០០នាក់កំពុងសិក្សានៅ ប្រទេសរុស្សី។

ឆ្នាំ២០២០និង២០២១នេះ រុស្សីបានផ្តល់អាហារូបករណ៍ដល់កម្ពុជាចំនួន២៩នាក់ ហើយនៅ ឆ្នាំ២០២២ខាងមុខនេះ នឹងផ្តល់បន្ថែមចំនួន ២០នាក់ទៀត ដោយពួកគេនឹងសិក្សាទៅ លើជំនាញវិស្វកម្មយន្តហោះ ស្ថាបត្យកម្ម ​សំណង់ស៊ីវិល វេជ្ជសាស្ត្រ ទំនាក់ទំនងអន្តរជាតិ សេដ្ឋកិច្ច ផ្នែកវប្បធម៌ សិល្បៈ ដូចជាការដឹកនាំភាពយន្ត និងផលិតនិពន្ធជាដើម។

លោកបានបន្ថែមទៀតថា ក្នុងចំណោមមុខវិជ្ជាទាំងនោះមុខវិជ្ជាដែលមានការពេញនិយមសម្រាប់និសិត្សខ្មែររួមមានសំណង់ស៊ីវិល ថាមពលនុយក្លេអ៊ែរនិងវិស្វកម្មយន្តហោះជាដើម។

លោក ផន បុរី បានអំពាវនាវដល់និស្សិតកម្ពុជាដែលមានបំណងចង់ទៅ សិក្សានៅ សហព័ន្ធរុស្សី ត្រូវមកទំនាក់ទំនងនៅ មជ្ឈមណ្ឌលវិទ្យាសាស្ត្រនិងវប្បធម៌រុស្សី ដើម្បីត្រៀមភាសារុស្សីនិងត្រៀមដាក់ពាក្យស្នើសុំអាហារូបករណ៍ទៅសិក្សានៅ រុស្សី៕

អត្ថបទ៖ សំអឿន