បុគ្គល​ ឈ្មោះ​ ឱក ពុទ្ធី ប្រឈម​នឹងវិធានការ​ច្បាប់​ ក្រោយ​ធ្វើ​សកម្មភាព​លក់ដូរ​ដីរដ្ឋ

​មន្ទីរបរិស្ថានខេត្តពោធិ៍សាត់ នៅ ថ្ងៃទី ២០ ខែធ្នូ ឆ្នាំ ២០២១ នេះ បានប្រកាសពីចំណាត់ការផ្លូវច្បាប់ទៅ លើបុគ្គល ឈ្មោះ ឱក ពុទ្ធី មានទីលំនៅ រាជធានីភ្នំពេញ បន្ទាប់ពីបានធ្វើសកម្មភាពលក់ដូរដីធ្លី និងរៀបចំលិខិតផ្ទេរកម្មសិទ្ធិដីធ្លីនៅក្នុងតំបន់អភិរក្សដោយខុសច្បាប់ ក្នុងឃុំប្រម៉ោយ។

បុគ្គលឈ្មោះ ឱក ពុទ្ធី បានចេញមកទាមទារកាន់កាប់ដីធ្លី ថែមទាំងបានធ្វើសកម្មភាពលក់ដូរដីធ្លី និងរៀបចំ លិខិតផ្ទេរកម្មសិទ្ធិដីធ្លីនៅ ក្នុងតំបន់អភិរក្សដោយខុសច្បាប់ នៅ ចំណុចស្រែពាំង ភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ដែលជាដីព្រៃរបស់រដ្ឋស្ថិតក្នុងដែនជម្រកសត្វព្រៃភ្នំសំកុសបង្កើតឡើងដោយ ព្រះរាជក្រឹត្យចុះថ្ងៃទី០១ ខែវិច្ឆិកា ឆ្នាំ១៩៩៣ ដែលផ្តល់សមត្ថកិច្ចជូនក្រសួងបរិស្ថានគ្រប់គ្រង និងអភិរក្ស។

មន្ទីរបរិស្ថានបានបញ្ជាក់ថា នៅ ឆ្នាំ២០០៦ អ្នកស្រី ឱក ពុទ្ធី បានទិញដីព្រៃឈើខុសច្បាប់ នៅ ក្នុងដែនជម្រកសត្វព្រៃភ្នំសំកុស គ្រប់គ្រងអភិរក្សដោយក្រសួងបរិស្ថាន និងដីគម្របព្រៃឈើ ដែលគ្រប់គ្រងដោយរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ ហើយបច្ចុប្បន្ននេះផ្ទៃដីនេះ ត្រូវបានផ្ទេរការគ្រប់គ្រងមកក្រសួងបរិស្ថានវិញ ស្ថិតក្នុងរបៀងអភិរក្សជីវៈចម្រុះប្រព័ន្ធតំបន់ការពារធម្មជាតិ មានទំហំ ៥០ (ហាសិប) ហិកតា នៅ ចំណុចស្រែពាំង ភូមិសាស្ត្រភូមិស្ទឹងថ្មី ឃុំប្រម៉ាយ ស្រុកវាលវែង ខេត្តពោធិ៍សាត់។

ក្រោយមករដ្ឋបាលខេត្តពោធិ៍សាត់ តែងតែបានចុះមកហាមឃាត់ ការធ្វើសកម្មភាពលើទីតាំងនេះជាច្រើនលើកច្រើនសារព្រមទាំងបានចេញដីកាដកហូតដីនេះ កាលពីខែកក្កដា ឆ្នាំ២០០៩ ហើយក្រសួងបរិស្ថាន ក៏បានចេញលិខិតលេខ ៤៣៦ សជណ ចុះថ្ងៃទី១៥ ខែកក្កដា ឆ្នាំ២០១១ បដិសេធការទាមទារនេះដែរ។

ចាប់តាំងពីការចេញដីកាដកហូតដី នេះមកមន្ទីរបរិស្ថានខេត្តពោធិ៍សាត់ បានសាងសង់ទីស្នាក់ការមួយនៅ លើទីតាំងនោះដើម្បីការពារ និង អភិរក្សធនធានធម្មជាតិ។

មន្ត្រីឧទ្យានុរក្សនៃមន្ទីរបរិស្ថាន ជាមន្ត្រីនគរបាលយុត្តិធម៌ មានភារកិច្ចក្នុងការ អភិរក្សធនធានធម្មជាតិ បានខិតខំផ្សព្វផ្សាយ​អំពីច្បាប់ ចុះល្បាតទប់ស្កាត់ បង្ក្រាបបទល្មើសធនធាន ធម្មជាតិ ព្រមទាំងបានឃាត់ខ្លួនជនល្មើស ធ្វើការអប់រំ និងពេលខ្លះ បានកសាងសំណុំរឿងជាបន្តបន្ទាប់ បញ្ជូនទៅ សាលាដំបូងខេត្តពោធិ៍សាត់ដើម្បីចាត់ការតាមនីតិវិធីច្បាប់ ក្នុងកិច្ចខិតខំប្រឹងប្រែងធ្វើយ៉ាងណាការពារ និងអភិរក្ស តំបន់ការពារធម្មជាតិ សម្បត្តិធម្មជាតិ និងជីវៈចម្រុះឱ្យបានគង់វង្សសម្រាប់មនុស្សរាប់ ជំនាន់តទៅ ទៀត។

មន្ទីរបរិស្ថានខេត្តពោធិ៍សាត់បញ្ជាក់ថា ការទាមទារកាន់កាប់ដីស្ថិតនៅ ចំណុចស្រែពាំង ភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ របស់ ឈ្មោះ ឱក ពុទ្ធី និងស្វាមីជនជាតិអូស្ត្រាលី ពុំស្របតាមច្បាប់ភូមិបាលឆ្នាំ២០០១ និងច្បាប់ស្តីពីតំបន់ការពារធម្មជាតិឆ្នាំ២០០៨ឡើយ ហើយដីទាំងនេះក៏ស្ថិតក្នុងភូមិសាស្ត្រដែនជម្រកសត្វព្រៃភ្នំសំកុស ដែលការប្រើប្រាស់ដីក្នុងតំបន់ការពារធម្មជាតិ ត្រូវតែមានការអនុញ្ញាតពីរាជរដ្ឋាភិបាលកម្ពុជា តាមរយៈដីសម្បទានសង្គមកិច្ច ដីប្រទានកម្ម ឬដីដែលត្រូវបានកំណត់ថា ជាតំបន់សហគមន៍ ផ្អែកតាម មាត្រា ១១ ជំពូកទី៤ នៃច្បាប់ស្តីពីតំបន់ការពារធម្មជាតិ។

យោងតាមផ្លូវច្បាប់ បុគ្គលឈ្មោះ ឱក ពុទ្ធី គ្មានសិទ្ធិទាមទារដីនេះមកវិញឡើយ ហើយក៏គ្មានសិទ្ធិលក់ដូរ ឬផ្ទេរកម្មសិទ្ធិដីព្រៃរបស់រដ្ឋទៅបុគ្គលណាម្នាក់ឡើយ។

ទង្វើរបស់បុគ្គល ឱក ពុទ្ធី និងស្វាមី ដែលបានព្យាយាមម្តងហើយម្តងទៀត ក្នុងការកាន់កាប់ដីព្រៃរបស់រដ្ឋដោយខុសច្បាប់ ហើយថែមទាំងបាន ប្រើប្រាស់ការគំរាមកំហែងមកលើមន្ត្រីអនុវត្តច្បាប់ថែមទៀត គឺជាទង្វើខុសច្បាប់ទាំងស្រុង និងប្រមាថលើ មន្ត្រីរាជការសាធារណៈ។

បុគ្គល ឱក ពុទ្ធី ពុំដែលបានចូលរួមគោរពច្បាប់ទេ ថែមទាំងឃុបឃិតជាមួយមន្ត្រីខិលខូចមួយចំនួនតូចបានយកដីដែលខ្លួនកាន់កាប់ដោយខុសច្បាប់នេះ ទៅ លក់បន្តឱ្យអ្នកដទៃទៀតដោយបំពាន ហើយទង្វើទាំងនេះ មន្ទីរបរិស្ថានខេត្តពោធិ៍សាត់ ដែលជាអង្គភាពការពារដីរដ្ឋនៅ ក្នុងតំបន់ការពារ ធម្មជាតិ ក៏បានដាក់ពាក្យបណ្តឹងទៅ សាលាដំបូងខេត្តពោធិ៍សាត់រួចរាល់ហើយដែរ ដោយរង់ចាំតែការអនុវត្តនីតិវិធីច្បាប់។

មន្ទីរបរិស្ថានខេត្តពោធិ៍សាត់សូមរំឭកថា ក្រសួងបរិស្ថាន ធ្លាប់បានបញ្ជាក់រួចហើយថា ការទន្ទ្រានកាន់កាប់ ការលក់ដូរ ឬការផ្ទេរដីក្នុងឧទ្យានជាតិ ឬដែនជម្រកសត្វព្រៃ- គឺជាទង្វើខុសច្បាប់ដែលត្រូវ ប្រឈមមុខនឹងច្បាប់ជាធរមាន។ ដីតំបន់ការពារធម្មជាតិជាដីសាធារណៈរបស់រដ្ឋ ហើយការប្រើប្រាស់ ការបែងចែកឬធ្វើប្រទានកម្មដីក្នុងតំបន់ការពារធម្មជាតិ លុះត្រាតែមានការសម្រេចយល់ព្រមពីរាជរដ្ឋាភិបាល។

ដូច្នេះគ្មានជនណាម្នាក់អាចទន្ទ្រានកាន់កាប់ លក់ដូរ ផ្ទេរសិទ្ធិកាន់កាប់ដីធ្លី ឬបញ្ជាក់លើលិខិត ស្នាមកាន់កាប់ ឬលក់ដូរដីក្នុងតំបន់ការពារធម្មជាតិបានឡើយ»៕

សេចក្ដីប្រកាសព័ត៌មានខាងក្រោម៖