អាមេរិក ពិចារណាបញ្ឈប់ការនាំចូលស្មាតហ្វូន យន្តហោះ និងគ្រឿង បន្លាស់របស់ រុស្ស៊ី បើហ៊ានឈ្លានពាន អ៊ុយក្រែន

ទីភ្នាក់ងារព័ត៌មាន Reuters បានរាយការណ៍ ដោយដកស្រង់សម្តីមន្ត្រីរដ្ឋបាលលោក បៃដិន ថា មន្ត្រីអាមេរិកនឹងជួបគ្នាដើម្បីពិភាក្សាអំពីវិធានការប្រឆាំងរុស្ស៊ី ប្រសិនបើហ៊ានឈ្លានពានអ៊ុយក្រែន ដែលអាចរាប់បញ្ចូលទាំងការបញ្ឈប់ក្នុងការនាំចូលស្មាតហ្វូន យន្តហោះ និងគ្រឿងបន្លាស់រថយន្ត ក៏ដូចជាសម្ភារៈសំខាន់ៗផ្សេងទៀតពីវិស័យគ្រប់ប្រភេទ ។

របាយការណ៍បាននិយាយថា មន្ត្រីសហរដ្ឋអាមេរិកក៏នឹងពិគ្រោះជាមួយដៃគូសំខាន់ៗនៅអឺរ៉ុប និងអាស៊ី ដែលអាចរងផលប៉ះពាល់ដោយវិធានការទាំងនេះផងដែរ ។

ភាព​តានតឹង​ជុំវិញប្រទេស​អ៊ុយក្រែន​កាន់តែ​ធ្ងន់ធ្ងរ​ឡើង​ក្នុង​រយៈពេល​ប៉ុន្មាន​សប្តាហ៍​កន្លង​ទៅ​នេះ បន្ទាប់ពី​ការ​ចោទ​ប្រកាន់​ថា​មាន​ការ​ដាក់ពង្រាយ​ទាហាន​រុស្ស៊ី​នៅ​ជិត​ព្រំដែន​អ៊ុយក្រែន ​និង​ការ​អះអាង​ពី​ការ​ត្រៀម​ខ្លួន​សម្រាប់​ការ​ឈ្លានពាន ។

ទន្ទឹមនោះ ទីក្រុងម៉ូស្គូបានបដិសេធម្តងហើយម្តងទៀតនូវការចោទប្រកាន់ទាំងនោះ ដោយចង្អុលទៅសកម្មភាពយោធារបស់ណាតូនៅជិតព្រំដែនរុស្ស៊ី ដែលខ្លួនចាត់ទុកថាជាការគំរាមកំហែងដល់សន្តិសុខជាតិរបស់ខ្លួន ខណៈរុស្ស៊ី​ក៏​បាន​និយាយ​ដែរ​ថា ខ្លួន​មាន​សិទ្ធិ​ផ្លាស់ទី​កងកម្លាំង​ក្នុង​ទឹកដី​ខ្លួន ។

របាយការណ៍បាននិយាយថា សហរដ្ឋអាមេរិកនឹងប្រើប្រាស់វិធានការត្រួតពិនិត្យការនាំចេញប្លែកពីធម្មតាដើម្បីបង្ការប្រទេសរុស្ស៊ីពីការនាំចូលបច្ចេកវិទ្យាឧស្សាហកម្ម និងអ្នកប្រើប្រាស់ ដែលអាចជះឥទ្ធិពលយ៉ាងខ្លាំងដល់អ្នកប្រើប្រាស់រុស្ស៊ី ប្រតិបត្តិការឧស្សាហកម្ម និងការងារ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កងទ័ពកំពុងបែកបាក់ ឧត្តមសេនីយ៍អាមេរិក​ ព្រមានផ្ទុះរដ្ឋប្រហារយោធា