ក្រសួងរៀបចំអនុក្រឹត្យស្តីពី ការគ្រប់គ្រងដីចំណីផ្លូវដែក ដើម្បីលុបបំបាត់ការទន្ទ្រានដីចំណីផ្លូវ

ក្រសួងសាធារណការ និងដឹកជញ្ជូនបានរៀបចំអនុក្រឹត្យស្តីពី ការគ្រប់គ្រងដីចំណីផ្លូវដែក ដើម្បីលុបបំបាត់បាតុភាពការទន្ទ្រានយកដីចំណីផ្លូវដែក និងជួយសម្រួលដល់សមត្ថកិច្ចពាក់ព័ន្ធក្នុងការផ្ដល់ភាពស្របច្បាប់ដល់ពលរដ្ឋដែលមានកម្មសិទ្ធិនៅតាមបណ្ដាញផ្លូវដែកផងដែរ។

ថ្លែងក្នុងកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពី ការគ្រប់គ្រងដីចំណីផ្លូវដែកនៅតាមបណ្ដោយផ្លូវដែកកាលពីថ្ងៃម្សិលមិញ លោក ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានឱ្យដឹងថា អនុក្រឹត្យនេះរៀបចំឡើង ក្នុងគោលបំណងគ្រប់គ្រង និងលុបបំបាត់បាតុភាព ការទន្ទ្រានយកដីចំណីផ្លូវដែក ទៅធ្វើការកសាងសំណង់ ឬដាំដំណាំផ្សេងៗ សំដៅទប់ស្កាត់ឧបទ្ទវហេតុគ្រោះថ្នាក់ចរាចរណ៍ និងការរក្សាសណ្តាប់ធ្នាប់សង្គម ដែលតែងតែកើតមាននៅតាមបណ្ដាញផ្លូវដែក ក៏ដូចជាកាត់បន្ថយឧបសគ្គនានា ដែលរាំងស្ទះដល់ការអភិវឌ្ឍផ្លូវដែក។

លោក បន្តថា អនុក្រឹត្យនេះ ក៏ជួយកាត់បន្ថយរាល់ការចំណាយរបស់រដ្ឋទៅលើការដោះស្រាយផលប៉ះពាល់ផ្ទះសំបែងប្រជាពលរដ្ឋ ដែលតាំងទីលំនៅតាមបណ្ដាញផ្លូវដែក ព្រមទាំងបង្កលក្ខណៈងាយស្រួលដល់សមត្ថកិច្ចពាក់ព័ន្ធ ក្នុងការផ្ដល់ភាពស្របច្បាប់ ដល់ប្រជាពលរដ្ឋ ដែលមានកម្មសិទ្ធិនៅតាមបណ្ដាញផ្លូវ និងធានាការអភិវឌ្ឍវិស័យហេដ្ឋារចនាសម្ព័ន្ធរូបវន្ត ប្រកបដោយនិរន្តរភាពនៅកម្ពុជា។

គួរបញ្ជាក់ថា អនុក្រឹត្យស្តីពីការគ្រប់គ្រងដីចំណីផ្លូវដែក ដែលបាន និងកំពុងរៀបចំឡើងនេះ មានចែងអំពីបទបញ្ញត្តិទូទៅ សមត្ថកិច្ចគ្រប់គ្រងផ្លូវដែក ការសាងសង់ផ្លូវឆ្លងកាត់ផ្លូវដែក ការកំណត់ដីចំណីផ្លូវដែក វិធានការសុវត្ថិភាពផ្លូវឆ្លងកាត់ និងកិច្ចការពារដីចំណីផ្លូវដែក ប្រភពធនធាននៃការអភិវឌ្ឍផ្លូវដែក ទោសប្បញ្ញត្តិ និងអន្តរប្បញ្ញត្តិ។

លោករដ្ឋលេខាធិការបានណែនាំឱ្យក្រុមការងារជំនាញរបស់ក្រសួង យកខ្លឹមសារដែលបានឯកភាពខាងលើទៅរៀបចំជាមាត្រា និងខ្លឹមសារលម្អិត ដើម្បីលើកយកមកពិភាក្សានៅក្នុងកិច្ចប្រជុំសប្ដាហ៍ក្រោយ៕

អត្ថបទ៖ សំអឿន