លោក ផៃ ស៊ីផាន ៖ កម្ពុជាមិនឲ្យតម្លៃ ចំពោះរបាយការណ៍របស់អង្គការ TI អំពីបញ្ហាអំពើពុករលួយ ឡើយ

មន្ត្រីជាន់ខ្ពស់ រាជរដ្ឋាភិបាលកម្ពុជា បានលើកឡើងថា ការធ្វើរបស់របាយការណ៍ អំពីស្ថានភាពអំពើពុករលួយនៅកម្ពុជា របស់អង្គការតម្លាភាពអន្តរជាតិ (TI) មិនសុក្រិតនោះទេ ហើយថា កម្ពុជាមិនឲ្យតម្លៃចំពោះការចេញរបាយការណ៍នេះដែរ។

ការលើកឡើងនេះ បន្ទាប់ពីអង្គការតម្លាភាពអន្តរជាតិ (TI) បានចេញរបាយការណ៍ ស្ដីពី សន្ទស្សន៍នៃការយល់ឃើញ ពីអំពើពុករលួយឆ្នាំ២០២១។ ក្នុងនោះ ប្រទេសកម្ពុជាទទួលបានពិន្ទុ ២៣ លើពិន្ទុអតិបរមា ១០០ និង ឈរនៅលេខរៀង ទី ១៥៧ ក្នុងចំណាត់ថ្នាក់ជាសកល ដែលមានប្រទេស និងដែនដីសរុបចំនួន ១៨០ ដែលត្រូវបានយកមកសិក្សានៅឆ្នាំនេះ។

បើតាម TI កាលពីឆ្នាំ ២០២០ ប្រទេសកម្ពុជាទទួលបានពិន្ទុ ២១ ដោយជាប់ចំណាត់ថ្នាក់ទី ១៦០ លើ ១៨០ប្រទេស និងដែនដី ហើយប្រៀបធៀបនឹងឆ្នាំ ២០២១នេះ គឺប្រទេសកម្ពុជា មានការល្អជាងឆ្នាំ ២០២០ ដោយទទួលកើនបាន​ពីរពិន្ទុ​។ ក៏ប៉ុន្តែនៅកម្រិតតំបន់ ប្រទេសកម្ពុជា ​បន្ត​ស្ថិតក្នុង​ចំណោមប្រទេសមានពិន្ទុទាបជាងគេទី ៣ នៅតំបន់​អាស៊ី​ប៉ាស៊ីហ្វិច នៅលើតែប្រទេស​អាហ្វហ្កានីស្ថាន និងកូរ៉េខាងជើងតែ​ប៉ុណ្ណោះ ហើយ​ក៏ជាប្រទេសមានពិន្ទុ​ទាប​ជាង​គេបំផុត ​​ក្នុងតំបន់​អាស៊ានផងដែរ។

លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍ប្រាប់កម្ពុជាថ្មីថា អង្គការតម្លាភាពអន្តរជាតិ (TI) មិនយល់អំពីយុទ្ធសាស្រ្ដ និងសកម្ម​ភាព របស់រាជរដ្ឋាភិបាលកម្ពុជា ក្នុងកិច្ចការងារប្រឆាំងអំពើពុករលួយ។ កិច្ចការងារប្រឆាំងអំពើពុករលួយ គឺរាជរដ្ឋាភិបាលកម្ពុជា ធ្វើតាមលំនាំរបស់អង្គការសហប្រជាជាតិ ហើយកម្ពុជាប្រឆាំងនឹងអំពើពុករលួយប៉ុណ្ណោះ ដោយមិនប្រឆាំងនឹងប្រជាពលរដ្ឋនោះឡើយ។ នេះបើតាមលោក ផៃ ស៊ីផាន ដដែល។

លោកបន្ថែមថា «ដូច្នេះការប្រឆាំងនឹងអំពើពុករលួយ បានសេចក្ដីថា យើងមិនទុកឱកាសណាមួយ សម្រាប់មនុស្ស អាចរំលោភពាក់ព័ន្ធ នឹងសកម្មភាពពុករលួយនោះទេ។ អាហ្នឹង គឺយើងធ្វើច្បាស់​លាស់នៅក្នុងសាច់រឿងហ្នឹង ហើយបន្ទាប់ មកទៀតហ្នឹង យើងបង្កើតវប្បធម៌តាមរយៈការអប់រំ ឲ្យគេយល់ ឲ្យគេមានជំនឿ ឲ្យគេចូលរួម ក្នុងការប្រឆាំងអំពើពុករលួយ ក្រោយពីយើងបង្កើតប្រព័ន្ធតម្លាភាព នៅក្នុងការផ្លាស់ប្ដូរលុយ បញ្ឈប់ការផ្លាស់ប្ដូរពីដៃមួយទៅដៃមួយ ទៅតាមប្រព័ន្ធដែលមានគណនីភាព ហើយនឹងតម្លាភាព»។

អ្នកនាំពាក្យរាជរដ្ឋាភិបាលរូបនេះ បានគូសបញ្ជាក់ទៀតថា អ្វីដែលអង្គការតម្លាភាពអន្តរជាតិ ធ្វើរបាយការណ៍អំពីស្ថានភាពអំពើពុករលួយនៅកម្ពុជានោះ គឺមិនមានភាពសុក្រិតទេ ដោយសារតែអង្គការមួយនេះ មិនបានយល់អំពីយុទ្ធសាស្រ្ដរបស់កម្ពុជា ក្នុងការប្រយុទ្ធប្រឆាំងនឹងអំពើពុករលួយ ហើយម្យ៉ាងទៀត រាជរដ្ឋាភិបាលកម្ពុជា ក៏មិនយល់អំពីរបៀបវាយតម្លៃរបស់អង្គការមួយនេះ ផងដែរ។

បើតាមលោក ផៃ ស៊ីផាន គឺរាជរដ្ឋាភិបាលកម្ពុជា មិនឲ្យតម្លៃទៅលើការវាយតម្លៃ របស់អង្គការតម្លាភាព​អន្តរជាតិ អំពីស្ថានភាពអំពើពុករលួយនៅកម្ពុជា នោះឡើយ។ លោកថា «ដូច្នេះយើងមិនឲ្យតម្លៃនូវអ្វីដែលជាលទ្ធផល នៃការលើកឡើងនោះទេ ក៏ប៉ុន្តែអ្វីដែលយើងមានមោទនភាព ពីព្រោះយើងកំពុងតែរៀបចំ បានមួយចំនួនធំហើយលើរឿងប្រព័ន្ធ ក្នុងការគ្រប់គ្រងកិច្ចការផ្លាស់ប្ដូរលុយ ការផ្លាស់ប្ដូរប្រាក់ យើងមានទឡ្លីករណ៍​ត្រឹមត្រូវ មើលកំណើនទឹកប្រាក់ចំណូលទៅក្នុងរដ្ឋ យើងមានគណនីភាព យើងមានតម្លាភាព»៕

អត្ថបទ៖ ឃួន សុភ័ក្រ