អ្នកនាំពាក្យរាជរដ្ឋាភិបាល បន្តអំពាវនាវដល់ពលរដ្ឋ សូមបន្តចាកចេញពីចម្ការរបស់លោក ខឹម វាសនា

អ្នកនាំពាក្យរាជរដ្ឋាភិបាល បានបន្តអំពាវនាវដល់ប្រជាពលរដ្ឋ សូមបន្តចាកចេញពីចម្ការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ហើយត្រឡប់ទៅផ្ទះរៀងៗខ្លួនវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍ក្នុងស​ន្និសីទសារព័ត៌មានមួយ នាព្រឹកថ្ងៃទី ១ ខែកញ្ញា ឆ្នាំ ២០២២នេះថា ទោះបីជារាជរដ្ឋាភិបាល និងអាជ្ញាធរ ត្រូវខាតពេលវេលា និងត្រូវចំណាយថវិកាមួយចំនួន ដោយសារតែប្រជាពល​រដ្ឋ ទៅចូលរួមក្នុងពិធីជួបជុំរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យក៏ដោយ ក៏រាជរដ្ឋាភិបាលមិនបានយកទោសពៃអ្វីឡើយ។ ដូច្នេះលោក ផៃ ស៊ីផាន បានបន្តអំពាវនាវដល់ប្រជាពលរដ្ឋ បន្តចាកចេញពីចម្ការរបស់លោក ខឹម វាសនា ត្រឡប់ទៅផ្ទះរៀងៗខ្លួន។

អ្នកនាំពាក្យរាជរដ្ឋាភិបាល មានប្រសាសន៍បន្តថា «សម្ដេចអគ្គមហាសេនាបតីតេជោ ហ៊ុន សែន លោកបានបង្ហាញអំពីសីលធម៌នយោបាយរបស់លោក អត់មានប្រកែប្រកាន់​ ឬដាក់ទោសទណ្ឌដល់បងប្អូនប្រជាពលរដ្ឋ ដែលលោកបានអញ្ជើញទៅ ទោះបីជាប៉ះពាល់ដល់ការចំណាយ និងពេលវេលារបស់អាជ្ញាធរ និងការចំណាយដ៏ធំធេងរបស់រដ្ឋយើងយ៉ាងណាក៏ដោយ ក៏លោកអត់បានយកទោសយកពៃអីដែរ អញ្ចឹងសុំអញ្ជើញប្រជាពលរដ្ឋទាំងអស់ អញ្ជើញត្រឡប់មកកាន់ផ្ទះសម្បែងវិញ ដែលជាទីសុខសាន្ដរបស់យើង»។

សូមជម្រាបថា កាលពីថ្ងៃទី ៣១ ខែសីហា ឆ្នាំ ២០២២ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុ បានអំពាវនាវឲ្យប្រជាពលរដ្ឋរំសាយការជួបជុំ និងត្រឡប់ទៅផ្ទះរៀងៗខ្លួនវិញ ដោយរាជរដ្ឋាភិបាល និងអាជ្ញាធរមិនមានការប្រើកម្លាំង ដើម្បីបំបែកការជួបជុំនោះឡើយ។ ជាមួយគ្នានេះ សម្តេចតេជោនា​យករដ្ឋមន្ត្រី ក៏បានអំពាវនាវដល់លោក ខឹម វាសនា និងសមាជិករបស់លោកកុំបង្ខាំង ឬរារាំងប្រជាពលរដ្ឋដែលមានបំណងចង់ចេញពីចម្ការ ត្រឡប់ទៅផ្ទះរបស់ពួកគេវិញ។

លើសពីនេះទៀត ប្រមុខរាជរដ្ឋាភិបាល ក៏បានណែនាំដល់អាជ្ញាធរខេត្តសៀមរាប ត្រូវត្រៀមរថយន្តដឹកជញ្ជូនប្រជាពលរដ្ឋចេញពីចម្ការរបស់លោក ខឹម វាសនា ត្រឡប់ទៅផ្ទះវិញ និងត្រៀមស្បៀងអា​ហារផ្តល់ជូនដល់ពួកគាត់ផងដែរ។ បន្ទាប់ពីមានការអំពាវនាវ ពីសំណាក់សម្ដេចតជោនាយករដ្ឋមន្ត្រីរួចមក គឺសង្កេតឃើញមានប្រជាពលរដ្ឋបានចេញចាក់ពីចម្ការរបស់លោក ខឹម វាសនា ជាបន្តបន្ទាប់ចាប់តាំងពីរសៀលថ្ងៃទី ៣១ ខែសីហា ឆ្នាំ ២០២២មក៕

អត្ថបទ៖ ឃួន សុភ័ក្រ