កីឡដ្ឋានអន្តរជាតិខេត្តកំពង់ស្ពឺ សម្រេចការសាងសង់បាន​ប្រមាណ ៧០ភាគរយ

យោងតាមផេកហ្វេសប៊ុកផ្លូវការ លោក ហ៊ុន ម៉ានី តំណាងរាស្រ្តមណ្ឌលកំពង់ស្ពឺ បានឱ្យដឹងថា គិតមកទល់ពេលនេះ កីឡដ្ឋានអន្តរជាតិខេត្តកំពង់ស្ពឺ សម្រេចការសាងសង់បានប្រមាណ៧០ភាគរយហើយ។

លោក ហ៊ុន ម៉ានី បានបន្តថា ព្រឹកនេះក្រុមការងារកំពុងត្រៀមដំឡើងបង្គោលភ្លើងធំៗ ចំនួន៤បង្គោល នៅជុំវិញទីលានបាល់ទាត់ជាមួយសកម្មភាពសាងសង់ផ្សេងៗទៀត យ៉ាងសកម្មស្របតាមប្រព័ន្ធបច្ចេកទេសកម្រិតស្តង់ដារខ្ពស់។ លោកបានបន្តទៀតថា «តាមរយៈគំនិតផ្តួចផ្តើមជាមួយក្រុមការងារ កន្លងមកខ្ញុំជឿជាក់ថា កីឡដ្ឋានខេត្តកំពង់ស្ពឺ ដែលមានទីតាំងស្ថិតនៅក្នុងភូមិតាម៉ុលសង្កាត់ច្បារមន ក្រុងច្បារមនគឺជាក្តីសង្ឃឹមថ្មីមួយទៀតនៃវិស័យកីឡារបស់ខេត្តកំពង់ស្ពឺជាពិសេសការត្រៀមខ្លួនរបស់កម្ពុជា ក្នុងការធ្វើជាម្ចាស់ផ្ទះកីឡាអាស៊ីអាគ្នេយ៍SEAGAME ឆ្នាំ២០២៣ និងព្រឹត្តិការណ៍កីឡាផ្សេងៗទៀត។ បងប្អូនប្រជាពលរដ្ឋនៅក្នុងខេត្តនិងតំបន់ជុំវិញនឹងទទួលបានសមិទ្ធផលថ្មីសន្លាងមួយ ក្នុងពេលឆាប់ៗនេះ»។ លោក ហ៊ុន ម៉ានី បានកោតសរសើរ និងអរគុណដល់សប្បុរជន ក៏ដូចជាការខិតខំប្រឹងប្រែងជាបន្តបន្ទាប់របស់ថ្នាក់ដឹកនាំខេត្ត និងជាពិសេសក្រុមការងារបច្ចេកទេសសាងសង់យ៉ាងស្រស្រាក់សស្រាំបើទោះបីជាយើងកំពុងតែឆ្លងកាត់ការលំបាកក្នុងបរិបទនៃការរីករាលដាលនៃជំងឺកូវីដ១៩ក៏ដោយ។

លោក​ វ៉ី សំណាង អភិបាលខេត្តកំពង់ស្ពឺធ្លាប់ បានមានប្រសាសន៍ពេលនអញ្ជើញចុះពិនិត្យមើលវឌ្ឍន​ភាព នៃការសាងសង់មណ្ឌលកីឡដ្ឋាននេះកាលពីថ្ងៃទី ៨ខែធ្នូឆ្នាំ២០២១កន្លងទៅថា គម្រោងសាងសង់កីឡដ្ឋានអន្តរជាតិខេត្តកំពង់ស្ពឺ នឹងបញ្ចប់ការសាងសង់ទាំងស្រុង នៅពាក់កណ្ដាលឆ្នាំ ២០២២ ស្របពេលដែលកម្ពុជា នឹងធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៣។លោកអភិបាលខេត្ត បានបន្តថា ពហុកីឡដ្ឋានខេត្តកំពង់ស្ពឺ គឺសាងសង់តាមលក្ខណៈបច្ចេសស្តង់ដារអន្តរជាតិ និងជាគំនិតផ្ដួចផ្ដើម​របស់លោក ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ព្រមទាំងថ្នាក់ដឹកនាំខេត្តកំពង់ស្ពឺនិងបានការគាំទ្រយ៉ាងពេញទំហឹងពីគម្រោង​ណា​ហ្គា​វើលបេះដូងសប្បុរសរួម​ទាំងពីសំណាក់​សប្បុរស​ជន​នានាដ៏ទៃទៀតក្រោមជំនួយឧបត្ថម្ភទឹកប្រាក់ប្រមាណជាង ២​លាន​ដុល្លារអាមេរិក ពី​មូលនិធិណាហ្គាវើល៕

អត្ថបទ៖ សំអឿន