ចារកម្មអាមេរិកទម្លាយ ក្រុមមនុស្សក្នុងបញ្ជីដែល រុស្ស៊ី នឹងសម្លាប់ ក្រោយចូលកាន់កាប់ អ៊ុយក្រែន

មន្ត្រីអាមេរិកនិយាយថា ពួកគេទទួលបានរបាយការណ៍ចារកម្ម ដែលទម្លាយថា រុស្ស៊ីមានបញ្ជីឈ្មោះជនជាតិអ៊ុយក្រែន ដែលត្រូវសម្លាប់ ឬបញ្ជូនទៅជំរំ នៅក្នុងព្រឹត្តិការណ៍នៃការវាយប្រហារ។

ក្នុងលិខិតមួយផ្ញើជូនប្រមុខសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet ឯកអគ្គរដ្ឋទូតរបស់ទីក្រុងវ៉ាស៊ីនតោន ប្រចាំ UN នៅទីក្រុងហ្សឺណែវ បានអះអាងថា ផែនការក្រោយការវាយប្រហាររបស់រុស្ស៊ី នឹងពាក់ព័ន្ធការធ្វើទារុណកម្ម ការចាប់ខ្លួនដោយបង្ខំ និងការរងទុក្ខខ្លាំងក្លារបស់មនុស្ស។

ឯកអគ្គរដ្ឋទូតរូបនេះបានចោទប្រកាន់ថា គោលដៅទាំងនោះ នឹងដាក់បញ្ចូលអ្នកប្រឆាំងរុស្ស៊ី និងបេឡារុស ដែលកំពុងនិរទេសខ្លួនក្នុងប្រទេសអ៊ុយក្រែន, អ្នកកាសែត និងសកម្មជនប្រឆាំងអំពើពុករលួយ និង ប្រជាជនងាយរងគ្រោះ ដូចជាជនជាតិភាគតិច និងអ្នកកាន់សាសនា ព្រមទាំងអ្នកស្រឡាញ់ភេទដូចគ្នា។

លិខិតនោះបន្ថែមថា “ជាពិសេស យើងមានព័ត៌មានដែលអាចជឿទុកចិត្តបានថា កងកម្លាំងរុស្ស៊ីកំពុងរៀបចំបញ្ជីឈ្មោះជនជាតិអ៊ុយក្រែនដែលនឹងត្រូវសម្លាប់ ឬបញ្ជូនទៅកាន់ជំរំបន្ទាប់ពីការកាន់កាប់ដោយយោធា”។

ទោះជាយ៉ាងណាក៏ដោយ អាមេរិកមិនបានផ្តល់នូវព័ត៌មានលម្អិតទូលំទូលាយ អំពីព័ត៌មានសម្ងាត់នេះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ Biden យល់ព្រមប្រជុំជាមួយ Putin តែមានលក្ខខណ្ឌមួយ