Biden យល់ព្រមប្រជុំជាមួយ Putin តែមានលក្ខខណ្ឌមួយ

ប្រធានាធិបតីអាមេរិកលោក Joe Biden បានយល់ព្រមរៀបចំកិច្ចប្រជុំកំពូលជាមួយប្រធានាធិបតីរុស្ស៊ី Vladimir Putin ដើម្បីពិភាក្សាអំពីវិបត្តិអ៊ុយក្រែន។

ទោះបីជាយ៉ាងណាក៏ដោយ សេតវិមានបាននិយាយថា កិច្ចចរចាដែលស្នើឡើងដោយបារាំងនេះ នឹងប្រព្រឹត្តទៅបានលុះត្រាតែរុស្ស៊ីមិនវាយប្រហារប្រទេសជិតខាង។

កិច្ចប្រជុំនេះ អាចផ្តល់នូវដំណោះស្រាយការទូត ចំពោះវិបត្តិសន្តិសុខដ៏អាក្រក់បំផុតមួយនៅទ្វីបអឺរ៉ុប ក្នុងរយៈពេលជាច្រើនទសវត្សរ៍ចុងក្រោយ។

សំណើនេះត្រូវបានប្រកាសដោយប្រធានាធិបតីបារាំង បន្ទាប់ពីការហៅទូរសព្ទរវាងលោកប្រធានាធិបតី Emmanuel Macron និងលោក Putin ដែលអូសបន្លាយពេលជិតបីម៉ោង។

ការិយាល័យរបស់លោក Macron បាននិយាយថា ព័ត៌មានលម្អិតនៃកិច្ចប្រជុំកំពូលដែលអាចធ្វើទៅបាននេះ នឹងត្រូវពិភាក្សាក្នុងអំឡុងកិច្ចប្រជុំរវាងរដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការបរទេសរុស្ស៊ីលោក Sergei Lavrov នៅថ្ងៃព្រហស្បតិ៍ខាងមុខ។

នៅក្នុងសេចក្តីថ្លែងការណ៍មួយដែលបញ្ជាក់ពីសំណើនេះ សេតវិមានក៏បាននិយាយផងដែរថា រុស្ស៊ីហាក់ដូចជាកំពុងបន្តការត្រៀមលក្ខណៈសម្រាប់ការវាយប្រហារទ្រង់ទ្រាយធំលើអ៊ុយក្រែនក្នុងពេលឆាប់ៗ ហើយថា សហរដ្ឋអាមេរិកបានត្រៀមខ្លួនរួចជាស្រេចក្នុងការចាត់វិធានការយ៉ាងឆាប់រហ័ស និងធ្ងន់ធ្ងរប្រសិនបើរឿងនេះកើតឡើងមែន។

រដ្ឋបាលលោក Biden បានប៉ាន់ប្រមាណថា រុស្ស៊ីបានដាក់ពង្រាយកងទ័ពរហូតដល់ទៅ ១៩០ ០០០នាក់នៅជុំវិញអ៊ុយក្រែន រួមទាំងកងកម្លាំងបំបែកខ្លួនក្នុងតំបន់ Donetsk និង Luhansk នៅភាគខាងកើតប្រទេសអ៊ុយក្រែនផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ ឈ្លោះគ្នារឿង ពូទីន, អ្នកកាសែត និងអ្នកនយោបាយអ៊ុយក្រែន វាយគ្នាផ្អើលទូរទស្សន៍ ពេលកំពុងផ្សាយផ្ទាល់