ព័ត៌មានជាតិ

សមត្ថកិច្ចចុះដកហូតគ្រឿងចក្រមួយគ្រឿង ឈូសឆាយកាយដីស្រែ ឆ្លៀតឱកាសរំលោភយកដីប្រឡាយរដ្ឋ

បានផុស

៣ years មុន

នៅ

ថ្ងៃអង្គារ ២២ កុម្ភៈ ២០២២

ដោយ

បាត់ដំបង ៖ សមត្ថកិច្ចចុះដកហូតគ្រឿងចក្រមួយគ្រឿងដែលប្តីប្រពន្ធ២នាក់ ឈូសឆាយកាយដីស្រែខ្លួន ឆ្លៀតឱកាសពង្រីកទំហំដីស្រែចូលរំលោភលើដីចំណីប្រឡាយរបស់រដ្ឋជាច្រើនម៉ែត្រ ទើបបែកធ្លាយដល់អាជ្ញាធរខេត្តហើយ បញ្ជាឲ្យសមត្ថកិច្ចចុះអន្តរាគមន៍តែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីខាងលើនេះ លោកសឿម .ប៊ុនរិទ្ធិ អភិបាលរងខេត្តបាត់ដំបងបានបញ្ជាក់ឲ្យដឹងថា ករណីប្រព្រឹត្តបទល្មើសឈូសឆាយកាយដីចំណីប្រឡាយខាងលើ ជនបង្កបានប្រព្រឹត្តឡើងកាលពីថ្ងៃទី២១ខែកុម្ភៈ ឆ្នាំ២០២២ ស្ថិតក្នុងភូមិសាស្ត្រភូមិសំរោង ឃុំធិបតី ស្រុកគាស់ក្រឡ ខេត្តបាត់ដំបង។

លោកបន្តឲ្យដឹងថា ជនបង្កមានឈ្មោះកន .សៅរ៉េត អាយុ៣២ឆ្នាំនិងប្រពន្ធឈ្មោះយ៉យ .កញ្ញាអាយុ២៦ឆ្នាំ មានទីលំនៅក្នុងភូមិសំបុកអក ឃុំកំពង់ព្រៀង ស្រុកសង្កែ ខេត្តបាត់ដំបង។ ម្ចាស់កម្មសិទ្ធិដីស្រែខាងលើនៅថ្ងៃកើតហេតុបានជួលគ្រឿងចក្រមួយគ្រឿងចូលឈូសឆាយរំលោភយកដីចំណីប្រឡាយរបស់រដ្ឋដើម្បីពង្រីកផ្ទៃដីស្រែរបស់ខ្លួននាំឲ្យប៉ះពាល់លើដីរបស់រដ្ឋប្រវែង៣៦ម៉ែត្រx៦ម៉ែត្រនិងជីកយកអាចម៍ដីជម្រៅ០១ម៉ែត្រថែមទៀត។

លោកសឿម ប៊ុនរិទ្ធិ អភិបាលរងខេត្តបន្តថា ករណីខាងលើក្រោយសមត្ថកិច្ចនិងក្រុមការងារបានចុះអន្តរាគមន៍ទប់ស្កាត់អាជ្ញាធរខេត្តបានតម្រូវឲ្យម្ចាស់ដីស្រែធ្វើកិច្ចសន្យាជាលាយលក្ខណ៍អក្សរនិងតម្រូវឲ្យយកអាចម៍ដីមកចាក់បំពេញដីចំណីប្រឡាយឱ្យបានល្អដូចដើមវិញហើយត្រូវបញ្ឈប់ជាបន្ទាន់នូវរាល់សកម្មភាពល្មើសគ្រប់រូបភាពបន្តទៅទៀត។

ក្រោយការព្រមានពីអាជ្ញាធរខេត្តម្ចាស់ស្រែបានចេញមុខជួលគ្រឿងចក្រ១ផ្សេងទៀតដើម្បីកាយយកអាចម៍ដីបំពេញដីចំណីប្រឡាយវិញ ក្រោយពីម្ចាស់គ្រឿងចក្រដែលកាយប៉ះពាល់បើកគេចបាត់ហើយសមត្ថកិច្ចកំពុងស្រាវជ្រាវរកម្ចាស់គ្រឿងចក្រដើម្បីឲ្យចូលខ្លួនមកបំភ្លឺជុំវិញករណីខាងលើនេះនិងកសាងសំណុំរឿងទៅតុលាការដើម្បីចាត់ការតាមនីតិវិធី៕

ដោយ ៖ សៅ សារិទ្ធ