ព័ត៌មានជាតិ

គណៈប្រតិភូក្រសួងប្រៃសណីយ៍ស្វែងយល់ពីការគ្រប់គ្រងឯកសារនៅ សាលាក្តីខ្មែរក្រហម

បានផុស

៤ years មុន

នៅ

ថ្ងៃចន្ទ ២៨ មីនា ២០២២

ដោយ

តបតាមការស្នើសុំរបស់ក្រសួងប្រៃសណីយ៍ និងទូរគមនាគមន៍ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី២៨ ខែមីនា ឆ្នាំ២០២២នេះ បានរៀបចំកម្មវិធីទស្សនកិច្ចសិក្សាស្វែងយល់អំពីការគ្រប់គ្រងឯកសារនិងប័ណ្ណសារ និងការប្រើប្រាស់ប្រព័ន្ធបច្ចេកវិទ្យាសម្រាប់រៀបចំកិច្ចប្រជុំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីទស្សនកិច្ចសិក្សាស្វែងយល់នេះ មានគោលបំណងស្វែងយល់ពីការរៀបចំនីតិវិធីប្រតិបត្តិស្តង់ដារ ការធ្វើឌីជីតនីយកម្ម (Digitization) ការប្រើប្រាស់កម្មវិធីគ្រប់គ្រងឯកសារ និងប័ណ្ណសារ ការការពារ និងរក្សាទុកទិន្នន័យ ការរៀបចំបន្ទប់ទុកដាក់ប័ណ្ណសារ ការធ្វើប្រតិចារឹក ការរៀបចំប្រព័ន្ធសោតទស្សន៍ និងការចូលរួមសវនាការពីចម្ងាយរបស់ភាគីពាក់ព័ន្ធជាដើម ស្របតាមឧត្តមានុវត្តន៍អន្តរជាតិ។

លោក ក្រាញ់ តូនី ប្រធានការិយាល័យរដ្ឋបាលនៃសាលាក្តីខ្មែរក្រហម បានជម្រាបជូនគណៈប្រតិភូអំពីប្រវត្តិរបស់សាលាក្តី ដែលជាតុលាការកូនកាត់ បង្កើតឡើងដោយរាជរដ្ឋាភិបាលកម្ពុជា និងអង្គការសហប្រជាជាតិ។ ក្នុងដំណើរការការងាររយៈពេល១៦ឆ្នាំមកនេះ បានសម្រេចសមិទ្ធផលលើសំណុំរឿង ដោយមានការគាំទ្រពីអ្នកបច្ចេកទេសជំនាញក្នុងស្រុកជាច្រើន ដែលទទួលបានការបណ្តុះបណ្តាល ចំណេះដឹង និងបទពិសោធន៍ លើការងារនេះ និងឈរលើគោលការណ៍ចំនួន៣ គឺភាពជាម្ចាស់ ភាពជាអ្នកដឹកនាំ និងចីរភាព។ ធនធាន មនុស្សជំនាញទាំងនេះ ជាធនធានដ៏សំខាន់ជួយដល់ការងារនៅតាមក្រសួងស្ថាប័ន នៅពេលអណត្តិរបស់អ.វ.ត.ក បញ្ចប់នៅពេលខាងមុខនេះ។

លោក សុខ ពុទ្ធិវុធ ប្រធានគណៈប្រតិភូរបស់ក្រសួងប្រៃសណីយ៍ និងទូរគមនាគមន៍ បានជម្រាបជូនពីគោលនយោបាយរដ្ឋាភិបាលឌីជីថល ដែលទើបទទួលបានការអនុម័តពីប្រមុខរាជរដ្ឋាភិបាល ក្នុងគោលបំណងជំរុញការធ្វើបរិវត្តកម្មរដ្ឋាភិបាលឌីជីថលនៅកម្ពុជា។ បច្ចុប្បន្ននេះ ក្រសួងប្រៃសណីយ៍ និងទូរគមនាគមន៍កំពុងរៀបចំប្រែក្លាយទៅជាក្រសួងឌីជីថលឈានមុខ និងពង្រីកលទ្ធភាពគាំទ្រក្រសួងស្ថាប័នក្នុងការអនុវត្តគោលនយោបាយនេះ។ ទស្សនកិច្ចសិក្សានេះ គឺដើម្បីស្វែងយល់ពីដំណើការគ្រប់គ្រងឯកសារនៅអ.វ.ត.ក ដែលមានឯកសាររាប់លានទំព័រជាភាសាខ្មែរ អង់គ្លេស និងបារាំង។

បន្ទាប់ពីបានស្តាប់បទបង្ហាញរបស់មន្ត្រីជំនាញសាលាក្តី លោបានវាយតម្លៃខ្ពស់ចំពោះប្រព័ន្ធគ្រប់គ្រងឯកសារអេឡិចត្រូនិកមានលក្ខណៈស្តង់ដារ ដែលជាគំរូសម្រាប់អនុវត្តគ្រប់គ្រងឯកសារនៅតាមក្រសួងស្ថាប័ន សំដៅលើកកម្ពស់ដំណើរការការងារផ្ទៃក្នុងរដ្ឋាភិបាល (G2G) ប្រកបដោយប្រសិទ្ធភាព និងប្រសិទ្ធផល។

ជាទីបញ្ចប់ ប្រធានគណៈប្រតិភូ ក៏បានថ្លៃងអំណរគុណដល់ថ្នាក់ដឹកនាំសាលាក្តី ដែលបានរៀបចំដំណើរកម្មវិធីទស្សនកិច្ចសិក្សាស្វែងយល់អំពីការគ្រប់គ្រងឯកសារនិងប័ណ្ណសារ និងការប្រើប្រាស់ប្រព័ន្ធបច្ចេកវិទ្យាសម្រាប់រៀបចំកិច្ចប្រជុំ ហើយ នឹងបន្តពិភាក្សាលទ្ធភាពក្នុងការធ្វើសហ ប្រតិបត្តិការរួមគ្នា ដើម្បីជំរុញការប្រើប្រាស់ប្រព័ន្ធគ្រប់គ្រងឯកសារអេឡិចត្រូនិកនៅក្នុងរាជរដ្ឋាភិបាល៕

ដោយ ៖ កោះកែវ