រុស្ស៊ី ទទួលស្គាល់ថា ខ្លួនបាត់បង់កងទ័ពច្រើនលើសលប់ និងជាសោកនាដកម្មដ៏ធំធេងសម្រាប់ទីក្រុង មូស្គូ

អ្នកនាំពាក្យប្រធានាធិបតី វ្ល៉ាឌីមៀរ ពូទីន បាននិយាយថា ប្រទេសរុស្ស៊ីបានទទួលរងការបាត់បង់កងទ័ពច្រើនលើសលប់។

លោក Dmitry Peskov ត្រូវបានសួរនៅលើ Sky News ថាតើសង្រ្គាមគឺជាភាពអាម៉ាស់ ដោយសារតែរុស្ស៊ីបានដកថយពីរដ្ឋធានី, បាត់បង់កងទ័ពរាប់ម៉ឺននាក់ និងថាប្រធានាធិបតីអ៊ុយក្រែនលោក Volodymyr Zelensky នៅតែកាន់អំណាចមែនឬទេ។

លោក​ឆ្លើយថា នេះ​ជា​ការ​យល់​ខុស​អំពី​អ្វី​ដែល​កំពុង​កើត​ឡើង។

ប៉ុន្តែនៅពេលត្រូវបានសួរម្តងទៀតថាតើរុស្ស៊ីបានបាត់បង់កងទ័ពរាប់ម៉ឺននាក់មែនឬអត់? លោកបានឆ្លើយថា “មែនហើយ យើងបានបាត់បង់ទាហានយ៉ាងច្រើនលើសលប់ ហើយវាជាសោកនាដកម្មដ៏ធំធេងសម្រាប់ពួកយើង”។

បន្ទាប់មកលោកបានបន្ថែមថា ការដកទ័ពចេញពីតំបន់ Kyiv និងទីក្រុងភាគខាងជើង Chernihiv គឺជា “ទង្វើនៃសុច្ឆន្ទៈ” ដើម្បីកាត់បន្ថយភាពតានតឹង ក្នុងអំឡុងពេលកិច្ចចរចាសន្តិភាព។

នៅក្នុងបទសម្ភាសន៍ លោក Peskov បានលើកឡើងម្តងទៀតនូវហេតុផលរបស់រុស្ស៊ីចំពោះអ្វីដែលខ្លួនពណ៌នាថាជា “ប្រតិបត្តិការយោធាពិសេស” ដោយនិយាយថា អ៊ុយក្រែនបានក្លាយទៅជាអ្នកប្រឆាំងរុស្ស៊ី ហើយរុស្ស៊ីពិតជាភ័យខណៈដែលណាតូ បានចាប់ផ្តើមឆ្ពោះទៅរកព្រំដែនរបស់យើង។

គួរបញ្ជាក់ថា រុស្ស៊ី​ធ្លាប់​បាន​និយាយ​ថា ទាហានចំនួន ១៣៥១ នាក់​ត្រូវ​បាន​សម្លាប់។ យ៉ាងណាក្តី ចំនួនអ្នកស្លាប់ពិតប្រាកដ មិនត្រូវបានគេដឹងនោះទេ ប៉ុន្តែមន្ត្រីណាតូម្នាក់លើកឡើងថា វាមានចន្លោះពី ៧០០០ទៅ ១៥ ០០០ ហើយ ការប៉ាន់ស្មានរបស់សហរដ្ឋអាមេរិកគឺស្រដៀងគ្នា៕

ប្រែសម្រួល៖ Vann Vann

ប្រភព៖ BBC

ចុចអាន៖ កម្ពុជា បោះអនុបវាទ ក្នុងសេចក្តីសម្រេចព្យួរ រុស្ស៊ី ពី ក្រុមប្រឹក្សាសិទ្ធិមនុស្ស អង្គការសហប្រជាជាតិ