រដ្ឋមន្ត្រីការងារ៖ ការវិនិយោគរបស់ក្រុមហ៊ុនCP​នៅកម្ពុជា បានចូលរួមបង្កើតមុខរបរថ្មី និងឱកាស​ការងារជូនពលរដ្ឋយ៉ាងច្រើន

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ការវិនិយោគរបស់ក្រុមហ៊ុន CP នៅកម្ពុជា ពិតជាបានចូលរួមអភិវឌ្ឍសង្គមសេដ្ឋកិច្ច បង្កើតមុខរបរថ្មី និងឱកាសការងារជូនដល់ពលរដ្ឋកម្ពុជាយ៉ាងច្រើន។

លោករដ្ឋមន្ត្រីបានលើឡើងបែបនេះ នៅព្រឹកថ្ងៃទី២៨ ខែមេសា ក្នុងឱកាសអនុញ្ញាតឲ្យលោក Preeda Chunwong អគ្គនាយករង C.P នៅកម្ពុជា ចូលជួបសម្តែងការគួរសមនៅទីស្តីការក្រសួង។

លោករដ្ឋមន្ត្រីបានបន្តថា លើសពីនេះក្រុមហ៊ុនមិនត្រឹមតែចូលរួមនៅក្នុងការវិនិយោគនៅក្នុងប្រទេសកម្ពុជានោះទេ
ក្រុមហ៊ុនក៏បានផ្តល់ការងារជូនដល់ពលករកម្ពុជាបានយ៉ាងច្រើនទាំងនៅក្នុងស្រុក និងផ្តល់ឱកាសការងាររបស់ក្រុមហ៊ុនដល់ពលករកម្ពុជានៅក្នុងប្រទេសថៃថែមទៀត។

លោករដ្ឋមន្ត្រីបានបន្តទៀតថា ក្រុមហ៊ុន CPនៅកម្ពុជា​​ គោរពបានយ៉ាងត្រឹមត្រូវតាមលក្ខខណ្ឌ បទដ្ឋានការងារសម្រាប់កម្មករនិយោជិតដោយឯកឧត្តមសង្ឃឹមថា ក្រុមហ៊ុននឹងបន្តពង្រីកនូវគម្រោងរបស់ខ្លួនថ្មីៗបន្ថែមទៀត។

លោក Preeda Chunwong បានបញ្ជាក់ថា ក្រុមហ៊ុន CPកម្ពុជា មានវត្តមាននៅក្នុងប្រទេសកម្ពុជារយៈពេល២៦ឆ្នាំមកហើយ ក្រុមហ៊ុនមានដំណើរការអាជីវកម្មរីកចម្រើនមកទល់បច្ចុប្បន្ននេះដោយជោគជ័យនេះ
ក៏ដោយសារបានទទួលការជួយជ្រោមជ្រែងពីរាជរដ្ឋាភិបាលកម្ពុជា និងក្រសួងការងារនិងបណ្តុះបណ្តាលវិជ្ជាជីវៈ ។ លោកបានបន្តថា ដើម្បីជាការតបស្នង ក្រុមហ៊ុននឹងធ្វើការបណ្តាក់ទុនបន្ថែមទៀតនៅព្រះរាជាណាចក្រកម្ពុជា
ដើម្បីចូលរួមចំណែកជួយដល់សេដ្ឋកិច្ច និងប្រជាជនកម្ពុជាឲ្យមានការរីកចម្រើនដូចគ្នាទៅនឹងក្រុមហ៊ុនដែរ។

លោក Preeda Chunwong បានបន្តថា បច្ចុប្បន្នមានពលករខ្មែរកំពុងធ្វើការនៅក្រុមហ៊ុននៅប្រទេសថៃ​ប្រមាណ​ជាង១ម៉ឺននាក់ ដោយពួកគេមានភាពស្មោះត្រង់ ឧស្សាហ៍ព្យាយាម អត់ធ្មត់នឹងការងារដែលធ្វើឱ្យក្រុមហ៊ុន ត្រូវការពលករចំនួន២ពាន់នាក់បន្ថែមទៀតដើម្បីជួយការងាររបស់ក្រុមហ៊ុន។ លោកបានបន្តទៀតថាពលករកម្ពុជាធ្វើការនៅថៃនឹងទទួលអត្ថប្រយោជន៍ស្មើៗគ្នាទៅនឹងពលកររបស់ប្រទេសដទៃផ្សេងទៀត។ មិនតែប៉ុណ្ណោះ ខាងក្រុមហ៊ុនមានកម្មវិធី​បណ្តុះបណ្តាល កសាងសមត្ថភាព ដោយពលករធម្មតាឲ្យក្លាយជាពលករជំនាញ និងផ្តល់អាហារូបករណ៍ដល់ពួកគេក្នុងការទទួលបានការសិក្សារៀនសូត្របំប៉មសមត្ថភាពដើម្បីក្លាយខ្លួនជាអ្នកដឹកនាំនៅក្នុងផ្នែកនីមួយៗ របស់ក្រុមហ៊ុននាពេលអនាគត។

លោកបានបញ្ជាក់ថា ក្រុមហ៊ុន CP មានអាជីវកម្មជាច្រើនដែលកំពុងបណ្តាក់ទុនវិនិយោគ ចំនួន២១ប្រទេសទូទាំងពិភពលោក។ ពាក់ព័ន្ធទៅនឹងការជួយដល់ប្រជាកសិករខ្មែរវិញ លោកបានឱ្យដឹងទៀតថា ក្រុមហ៊ុនបានបញ្ជាទិញផលិតផលពីពួកគាត់ចំនួន៤សែនតោនក្នុងមួយឆ្នាំៗ សម្រាប់យកទៅកែច្នៃជាផលិតផលរបស់ក្រុមហ៊ុន។

លោករដ្ឋមន្ត្រី បានបង្ហាញក្តីរីករាយជាខ្លាំងដែលខាងក្រុមហ៊ុនបានបញ្ជាទិញកសិផល ពីប្រជាកសិករខ្មែរទាំងនេះ​ចាត់ទុកជាទីផ្សារមួយដ៏សំខាន់ជួយដោះស្រាយជីវភាពរបស់ពួកគាត់បានប្រសើរមួយកម្រិត។ ជាមួយគ្នានេះដែរ លោករដ្ឋមន្ត្រីបានលើកទឹកចិត្តដល់ក្រុមហ៊ុនគួរបង្កើនភាពជាដៃគូដោយធ្វើការបញ្ជាទិញកសិផលពីកសិករខ្មែរឲ្យបានកាន់តែច្រើនបន្ថែមទៀតព្រោះវាមានន័យណាស់សម្រាប់សេដ្ឋកិច្ច។

ចំពោះក្រុមហ៊ុនCP ដែលត្រូវការកម្លាំងពលកម្ម ចំនួន២ពាន់នាក់សម្រាប់បម្រើការងារជូនដល់ក្រុមហ៊ុននៅប្រទេសថៃ លោករដ្ឋមន្ត្រីឯកភាពចំពោះសំណើនេះ ដោយអនុវត្តតាមអនុស្សរណៈនៃការយោគយល់គ្នាដែលប្រទេសយើងទាំងពីរបានធ្វើជាមួយគ្នាកន្លងមកនោះ។

លោករដ្ឋមន្ត្រី លើកឡើងថា គណៈកម្មការផ្ដល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ នឹងបញ្ជូនក្រុមការងារបច្ចេកទេសទៅបំពេញបេសកកម្មនៅព្រះរាជាណាចក្រថៃឡង់ដ៏ដើម្បីបន្តសុពលភាពប័ណ្ណពលករកម្ពុជាធ្វើការនៅបរទេស (OCWC) និងលិខិតធ្វើដំណើរ (TD)។ ដូច្នេះប្រសិនជាពលករកម្ពុជាដែលកំពុងស្នាក់នៅនិងធ្វើការនៅក្រុមហ៊ុនដែលផុតសុពលភាព ឬសុពលភាពនៅសល់ក្រោម ៦ខែអាចដាក់ពាក្យស្នើសុំបន្តសុពលភាពតាមរយៈប្រព័ន្ធស្វ័យប្រវត្តិកម្មរបស់នាយកដ្ឋានមុខរបរនៃក្រសួងការងារថៃ៕

អត្ថបទ៖ សំអឿន