អត្រាមរណភាពមាតាបន្តធ្លាក់ចុះពី ១៧០ មក ១៤១ ករណី ក្នុងទារកកើតរស់ ១០០ ០០០ នាក់

លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងជាអនុប្រធាន​អចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ បានមានប្រសាសន៍ថា បើទោះបីជាស្ថានភាពជំងឺកូវីដ-១៩ បានដាក់​សម្ពាធមកលើសុខភាពសាធារណៈ និងប្រព័ន្ធសុខាភិបាលក៏ដោយ ប្រព័ន្ធផ្តល់​សេវាថែទាំសុខភាពនៅបន្តដំណើរការប្រសើរជាប្រចាំ ​នៅទូទាំងប្រទេស។

ថ្លែងក្នុង ទិវាឆ្មបជាតិ ៥ ឧសភា ២០២២ ក្រោមប្រធានបទ “ការវិនិយោគលើឆ្មប ដើម្បីពង្រឹងការថែទាំសុខភាពបឋម សំដៅឈានទៅដល់ការគ្របដណ្តប់សុខភាពជាសកល” លោកស្រីបានបន្តថា ជារួមកម្ពុជាបានកាត់បន្ថយអត្រា​មរណភាពមាតាឱ្យបន្តធ្លាក់ចុះជាបន្តបន្ទាប់ ពោលគឺពី ១៧០ ករណី ក្នុង​ទារក​កើត​រស់​ ១០០ ០០០ នាក់ ​នៅឆ្នាំ២០១៤ មកនៅត្រឹម ១៤១ ករណី ក្នុងទារកកើតរស់ ១០០ ០០០ នាក់ នៅឆ្នាំ២០១៩។

លោកស្រី ម៉ែន នារីសោភ័គ បានបន្តថា ​អត្រានៃការសម្រាលកូនដោយបុគ្គលិកសុខាភិបាលជំនាញ​ បានកើនពី ៨៥% នៅឆ្នាំ​២០១៦ ទៅដល់ ៨៩% នៅឆ្នាំ២០២០។​ រីឯអត្រានៃការសម្រាលកូននៅមូលដ្ឋានសុខាភិបាល ក៏បានកើនពី ៨០% ទៅ៨៩% នៅក្នុងអំឡុងពេលដូចគ្នានេះ។

ក្នុងលិខិតអបអរសាទរ ទិវាឆ្មបជាតិ ៥ ​ឧសភានេះ សម្តេច​កិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ​ប្រធានកាក​បាទ​ក្រហមកម្ពុជា​ និងជាឥស្សរជន​ឆ្នើម​ថ្នាក់ជាតិ នៃ​ផែនការ​សកម្មភាពរួមអគ្គលេខាធិការអង្គការសហប្រជាជាតិ ​ដើម្បីសុខភាពស្រ្តី និងកុមារ បានថ្លែងការ​កោតសរសើរ និងអរគុណដល់ឆ្មបកម្ពុជាទាំងអស់ ​ដែលបានលះបង់គ្រប់បែបយ៉ាង​ រួមទាំងសុខភាព​ផ្ទាល់ខ្លួន​ និងគ្រួសារ ​ដើម្បីបំពេញ​កាតព្វកិច្ចពុះពារ ការលំបាកចូលរួមទប់ស្កាត់​ការចម្លង​មេរោគកូវីដ-១៩ផង ​និងបន្តរក្សាបានការថែទាំសុខភាពជូនស្រី្តទូទៅស្រី្តមានផ្ទៃពោះ ទារក និងកុមារ ឱ្យមានដំណើរការល្អជាប្រចាំ។

ទន្ទឹមនឹងនេះ សម្តេចកិត្តិព្រឹទ្ធបណ្ឌិត សូមអំពាវនាវដល់ស្ត្រីមានផ្ទៃពោះទាំងអស់ សូមទៅពិនិត្យសុខភាពតាមកាលកំណត់របស់គ្រូពេទ្យ សូមទៅសម្រាលកូននៅមណ្ឌលសុខភាព ឬមន្ទីរពេទ្យបង្អែក។ ត្រូវពិនិត្យតាមដានសុខភាពក្រោយសម្រាល និងយកទារកទៅចាក់ថ្នាំបង្ការ ១១ មុខ តាមកាលកំណត់ និងយកកូនទៅមន្ទីរពេទ្យជិតបំផុតឱ្យបានឆាប់នៅពេលទារក ឬកូនតូចគ្រុនក្តៅ ឬមានអាការៈខុសប្រក្រតី ឬពិបាកដកដង្ហើម។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា ក្រសួងសុខាភិបាល នឹងគាំទ្របន្តលើអន្តរាគមន៍គន្លឹះ ផ្នែកការងារឆ្មបបន្ថែមលើការវិនិយោគលើការបង្កើនចំនួនឆ្មបជំនាញ ឱ្យបានសមស្របទៅនឹងតម្រូវការធនធានមនុស្ស ក្នុងវិស័យសុខាភិបាល ដាក់បញ្ចូលក្របខណ្ឌបែងចែកឱ្យបំពេញការងារ នៅតាមមូលដ្ឋានសុខាភិបាលសាធារណៈ និងវិនិយោគលើការបណ្តុះបណ្តាល ការបង្វឹកជំនាញបន្ថែម និងការបណ្តុះបណ្តាលក្រោយមូលដ្ឋានថែមទៀត។

លោករដ្ឋមន្ត្រីសូមថ្លែងអំណរគុណចំពោះកិច្ចខិតខំប្រឹងប្រែងរបស់មន្ត្រីសុខាភិបាល អាជ្ញាធរ និងអ្នកពាក់ព័ន្ធគ្រប់លំដាប់ថ្នាក់ ជាពិសេសឆ្មបទាំងអស់ ដែលបានរួមចំណែកយ៉ាងធំធេងក្នុងការផ្តល់សេវាជូនប្រជាពលរដ្ឋគ្រប់រូប ជាពិសេសផ្តល់សេវាសុខភាពបន្តពូជ សុខភាពផ្លូវភេទ សុខភាពមាតានិងទារក នៅក្នុងស្ថានភាពដែលប្រទេសកម្ពុជាយើង ក៏ដូចជាបណ្តាប្រទេសលើសកលលោកកំពុងទទួលរងនូវការរាតត្បាតជំងឺកូវីដ-១៩។

ជាមួយគ្នានេះ លោករដ្ឋមន្ត្រីក៏សូមថ្លែងអំណរគុណដល់ដៃគូអភិវឌ្ឍសុខាភិបាល អង្គការជាតិ-អន្តរជាតិ វិស័យឯកជនដែលបានគាំទ្រដល់សកម្មភាពរបស់សមាគមឆ្មបកម្ពុជា៕

អត្ថបទ៖ សំអឿន