ក្រុមបាល់ទាត់នារីកម្ពុជា ស្ថិតនៅពូល B ជាមួយក្រុមខ្លាំងវៀតណាម នៃពានបាល់ទាត់នារីអាស៊ាន ឆ្នាំ២០២២

ក្រុមបាល់ទាត់នារីជម្រើសជាតិកម្ពុជា ត្រូវបានចាប់ឆ្នោតចូលពូល B ជាមួយក្រុមខ្លាំងទើបឈ្នះមេដាយមាស ស៊ីហ្គេម២០២២ វៀតណាម ក្នុងពានរង្វាន់ជើងឯកនារីប្រចាំតំបន់អាស៊ីអាគ្នេយ៍ (AFF Women’s Championship) ឆ្នាំ២០២២។

យោងតាមលទ្ធផលនៃការចាប់ឆ្នោតដែលបានធ្វើឡើងនៅព្រឹកថ្ងៃទី២៨ ខែឧសភា ឆ្នាំ២០២២ នេះនាប្រទេសហ្វីលីពីន ដែលត្រូវធ្វើជាម្ចាស់ផ្ទះផងដែរនោះ ក្រុមនារីកម្ពុជា ត្រូវបានចាប់ឆ្នោតស្ថិតនៅពូល B ជាមួយក្រុមខ្លាំងវៀតណាម, មីយ៉ាន់ម៉ា, ទីម័រខាងកើត និងឡាវ។ ខណៈពូល A វិញមានម្ចាស់ផ្ទះហ្វីលីពីន, ថៃ, ឥណ្ឌូនេស៊ី, សិង្ហបុរី, អូស្ត្រាលី និងម៉ាឡេស៊ី។

ក្រោយការចាប់ឆ្នោតនេះរួច ការប្រកួតនឹងធ្វើឡើងពីពីថ្ងៃទី០១ ដល់ថ្ងៃទី១៤ ខែកក្កដា ឆ្នាំ២០២២ ក្រុមលេខ១ និងលេខ២ បានឡើងទៅវគ្គពាក់កណ្ដាលផ្ដាច់ព្រ័ត្រ។

គួររំឮកថា នេះជាលើកទី៣ ហើយដែលនារីកម្ពុជា ចូលរួមប្រកួតព្រឹត្តិការណ៍បាល់ទាត់នារីដ៏ធំប្រចាំតំបន់មួយនេះ បន្ទាប់ពីចូលរួមលើកដំបូងនៅឆ្នាំ២០១៨ កាលនោះបានលេខ៤ ក្នុងពូល ដែលមាន ៥ក្រុម (ថៃ, អូស្ត្រាលី U-20, ម៉ាឡេស៊ី និងទីម័រខាងកើត) ដោយប្រកួតឈ្នះ១ និចាញ់៤ ខណៈនៅឆ្នាំ២០១៩ នៅក្នុងពូលជាមួយក្រុមខ្លាំងៗ (វៀតណាម, មីយ៉ាន់ម៉ា និងឥណ្ឌូនេស៊ី) បានរងបរាជ័យទាំង ៣ប្រកួតស្ថិតនៅបាតតារាង។

អត្ថបទ៖ មន្នីរ័ត្ន