ទូត រុស្ស៊ី នៅអង់គ្លេសបញ្ជាក់ពីលទ្ធភាពប្រើ ឬមិនប្រើអាវុធនុយក្លេអ៊ែរនៅ អ៊ុយក្រែន

ឯកអគ្គរដ្ឋទូតរុស្ស៊ីប្រចាំនៅអង់គ្លេសបានច្រានចោលនូវលទ្ធភាពដែលទីក្រុងមូស្គូនឹងប្រើប្រាស់អាវុធនុយក្លេអ៊ែរយុទ្ធសាស្ត្រនៅអ៊ុយក្រែន ព្រោះតែអាវុធ​ប្រភេទ​នេះ​អាច​ប្រើ​បានតែ​ក្នុងរយៈ​ចម្ងាយ​ខ្លីប៉ុណ្ណោះ ។

លោកឯកអគ្គរដ្ឋទូត Andrei Kelin បានប្រាប់ BBC កាលពីថ្ងៃអាទិត្យថា យោងតាមគោលលទ្ធិយោធារុស្ស៊ី អាវុធបែបនេះមិនត្រូវបានប្រើនៅក្នុងជម្លោះប្រភេទនេះនោះទេ ។

លោកបានបន្ថែមថា ប្រទេសរុស្ស៊ីមានបទប្បញ្ញត្តិដ៏តឹងរ៉ឹងបំផុតលើការប្រើប្រាស់អាវុធនុយក្លេអ៊ែរយុទ្ធសាស្ត្រ ហើយវាប្រើជាចម្បងនៅពេលដែលរដ្ឋមានគ្រោះថ្នាក់ប៉ុណ្ណោះ ហើយវា​មិន​មាន​ពាក់ព័ន្ធ​នឹង​ប្រតិបត្តិការ​យោធាបច្ចុប្បន្ននៅអ៊ុយក្រែន​ទេ” ។

នៅពេលសួរអំពីការប្រយុទ្ធគ្នានៅភាគខាងកើតអ៊ុយក្រែន លោក Kelin បាននិយាយថា ប្រទេសរុស្ស៊ីនឹងដោះស្រាយវាជាមួយនឹងប្រតិបត្តិការធម្មតា និងមានកំណត់ ។

ទន្ទឹមនោះ ការអត្ថាធិប្បាយរបស់លោក Kelin ធ្វើឡើង ចំពេលមានការព្រួយបារម្ភជាខ្លាំងពីអន្តរជាតិអំពីការប្រើប្រាស់អាវុធនុយក្លេអ៊ែររបស់រុស្ស៊ី បន្ទាប់ពីប្រធានាធិបតី វ្ល៉ាឌីមៀ ពូទីន បានបញ្ជាឲ្យកងកម្លាំងនុយក្លេអ៊ែររបស់លោកមានការប្រុងប្រយ័ត្ន ជាពិសេសនៅក្នុងប្រតិបត្តិយោធាពិសេសកាលពីខែកុម្ភៈ ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក វ្ល៉ាឌីមៀ ពូទីន ហៅថាជា “ប្រតិបត្តិយោធាពិសេស” បានអូសបន្លាយពេលជាង ៣ ខែហើយ បន្ទាប់ពីផ្ទុះការវាយលើទីក្រុងកៀវកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន កំពុងរៀបចំផែនការប្រើ “អាវុធគីមី” ហើយទម្លាក់កំហុសលើ រុស្ស៊ី