ប្រទះឃើញមនុស្សស្លាប់ ក្រោយសាកសព​មានក្លិនស្អុយសាយភាយពេញព្រៃ

សាកសពបុរសម្នាក់ ត្រូវបានប្រជាពលរដ្ឋប្រទះឃើញដេកស្លាប់នៅលើផ្លូវលំក្នុងដីចម្ការមួយកន្លែង ក្រោយពីសាកសពមានក្លិនស្អុយសាយភាយពេញព្រៃទៅហើយ។

ការភ្ញាក់ផ្អើលដោយសារតែមានក្លិនស្អុយនេះ បានកើតឡើងកាលពីថ្ងៃទី ១០ ខែកក្កដា ឆ្នាំ២០២២ វេលាម៉ោង ១១ និង ២០នាទីថ្ងៃត្រង់ នៅចំណុចក្នុងដីចម្ការរបស់ម្ចាស់ឈ្មោះ ភាព ភេទប្រុស អាយុប្រហែល ៥០ឆ្នាំ ស្ថិតក្នុងភូមិវាលវង់ ឃុំតាស្ដា ស្រុកសំពៅលូន ខេត្តបាត់ដំបង។   

ក្រោយពីទទួលបានពត៌មាន កម្លាំងជំនាញនៃអធិការដ្ឋាននគរបាលស្រុកសំពៅលូន បានចុះទៅដល់ចំណុចកើតហេតុ និងធ្វើការស្រាវជ្រាវជុំវិញកន្លែងកើតហេតុ ដោយសង្គេតបឋមឃើញថា ជនរងគ្រោះពុំមានសាច់ញាតិ និងទីលំនៅពិតប្រាកដ ហើយសាកសពមានសភាពស្អុយរលួយសឹងមើលពុំយល់ទៅហើយ ទើបកំលាំងជំនាញរង់ចាំកំលាំងជំនាញការិយាល័យបច្ចេកទេសខេត្តមកធ្វើការត្រួតពិនិត្យបន្ត ដោយសមត្ថកិច្ចមូលដ្ឋាន កំពុងស្រាវជ្រាវលើករណីនេះ ព្រោះមិនទាន់ដឹងថា ជនរងគ្រោះស្លាប់ដោយសារខ្យល់.គ ឬជាអំពើឃាតកម្មនោះឡើយ។

នៅព្រឹកថ្ងៃទី១១ នេះដែរ កម្លាំងការិយាល័យ បច្ចេកទេស និងកោសល្យវិច្ច័យខេត្ត នឹងចុះទៅពិនិត្យនិងសិក្សាអោយបានច្បាស់ អំពីករណីមនុស្សស្លាប់នេះ ៕

អត្ថបទ : សោ និយមរ័ត្ន