កីឡា

លោក ទុំ សារ៉ាយ៖ អគ្គិសនីកម្ពុជានៅតែមានចំណុចត្រូវកែតម្រូវ ទោះបានទម្លាក់គីរីវង់ ពីពានសម្តេចតេជោ

បានផុស

៣ years មុន

នៅ

ថ្ងៃព្រហស្បតិ៍ ១៨ សីហា ២០២២

ដោយ

ក្លិបបាល់ទាត់អគ្គិសនីកម្ពុជា បានកៅអីឡើងវគ្គ ៨ ក្រុមចុងក្រោយពានរង្វាន់សម្តេចតេជោ ហ៊ុន សែន ឆ្នាំ ២០២២ ជាផ្លូវការកាលពីម្សិលមិញ ក្រោយយកឈ្នះលើក្លិបបាល់ទាត់គីរីវង់សុខសែនជ័យ លទ្ធផលសរុបទាំងពីរជើង ៤-៣ ក្នុងវគ្គ ១៦ ក្រុមចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីជើងទី ១ អគ្គិសនីកម្ពុជា បានយកឈ្នះ គីរីវង់សុខសែនជ័យ ៣-២ នៅកីឡដ្ឋានអគ្គិសនីកម្ពុជា រាជធានីភ្នំពេញ បន្ទាប់មកជើងទី ២ ក្រុមទាំងពីរស្មើគ្នា ១-១ នៅកីឡដ្ឋានគីរីវង់ ខេត្តតាកែវ ធ្វើឱ្យលទ្ធផលសរុបទាំងពីរជើង ៤-៣។

នេះជាការឡើងវគ្គ ៨ ក្រុមចុងក្រោយ ២ ឆ្នាំជាប់ៗគ្នាសម្រាប់អគ្គិសនីកម្ពុជា បន្ទាប់ពីខកខាន ៣ ឆ្នាំ (២០១៨,២០១៩, ២០២០) ចាប់តាំងពីលើកចុងក្រោយបានឡើងដល់វគ្គពាក់កណ្ដាលផ្ដាច់ព្រ័ត្រ ហើយទទួលបានចំណាត់ថ្នាក់លេខ ៣។

លោក ទុំ សារ៉ាយ គ្រូបង្វឹករបស់ក្លិបអគ្គិសនីកម្ពុជាបានឱ្យ ‘កម្ពុជាថ្មី’ ដឹងថា៖ «សម្រាប់ការប្រកួតជាមួយគីរីវង់ ក្រុមរបស់យើងរៀបចំបានល្អ ទាំងការហ្វឹកហាត់ត្រៀមមុនប្រកួត ទាំងការសម្រាក ហើយនឹងហូបចុក ហើយនៅពេលប្រកួតពួកគាត់លេងជាក្រុមបានល្អ សហការគ្នាបានល្អ មានឱកាសច្រើនតែគាត់ធ្វើអត់បានល្អ អ៊ីចឹងហើយនេះចំណុចខ្វះខាតបន្តិចបន្តួចដែលយើងត្រូវតែយកមកបន្ថែមនៅប្រកួតបន្តបន្ទាប់ទៀត។»

«គោលដៅឆ្នាំនេះ ក្លិបដាក់គោលដៅយ៉ាងហោចណាស់ក៏ឡើងទៅវគ្គ ៤ ក្រុមចុងក្រោយ យើងនឹងព្យាយាមឱ្យអស់ពីសមត្ថភាព ការដាក់គោលដៅគ្រាន់តែជាគោលដៅ ប៉ុន្តែអ្វីដែលយើងធ្វើនៅលើទីលានវាពិបាកជាងដែលយើងដាក់គោលដៅ អ៊ីចឹងនឹងព្យាយាមធ្វើយ៉ាងម៉េចឱ្យពួកគាត់លេងជាក្រុមឱ្យបានល្អនៅពេលប៉ះស្វាយរៀង។» អតីតកីឡាករព្រះខ័នរាជស្វាយរៀងរូបនេះ និយាយពីគោលដៅនៅក្នុងពានរង្វាន់សម្តេចតេជោ ឆ្នាំ ២០២២។

គួរបញ្ជាក់ថា នៅវគ្គ៨ក្រុមចុងក្រោយ ក្លិបអគ្គិសនីកម្ពុជា នឹងត្រូវជួបជាមួយ ក្លិបព្រះខ័នរាជស្វាយរៀង ដោយជើងទី ១ គ្រោងនឹងធ្វើឡើងនៅថ្ងៃទី ២៤ ខែសីហា ខណៈជើងទី ២ នៅថ្ងៃទី ៣១ ខែសីហា ឆ្នាំ ២០២២ ដើម្បីសម្រេចក្រុមឡើងទៅវគ្គពាក់កណ្ដាផ្ដាច់ព្រ័ត្រ៕

អត្ថបទ៖ មន្នីរ័ត្ន

Related Topics:ពានរង្វាន់សម្ដេចតេជោ ហ៊ុន សែន (Hun Sen Cup)