តៃវ៉ាន់ បង្ហាញកញ្ចប់ថវិកាការពារជាតិ ច្រើនបំផុតមិនធ្លាប់មាន ចំពេលតានតឹងជាមួយ ចិន (មានវីដេអូ)

តៃវ៉ាន់ បានបង្ហាញផែនការ បង្កើនការចំណាយលើវិស័យការពារជាតិក្នុងកម្រិតកំណត់ត្រា ប៉ុន្មានសប្តាហ៍បន្ទាប់ពីប្រទេសចិន ធ្វើសមយុទ្ធយោធាមិនធ្លាប់មានពីមុនមក ជុំវិញកោះដែលគ្រប់គ្រងតាមបែបប្រជាធិបតេយ្យមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្កើនខ្ទង់ចំណាយ ១៣,៩ភាគរយ ដែលរួមបញ្ចូលទាំងការផ្តល់មូលនិធិសម្រាប់យន្តហោះចម្បាំងថ្មី និងឧបករណ៍ផ្សេងទៀតផងដែរនោះ នឹងធ្វើឲ្យកញ្ចប់ថវិកាការពារជាតិសរុបកើនឡើងដល់ ១៩.៤១ ពាន់លានដុល្លារអាមេរិក ឬប្រហែល១៥ភាគរយ នៃការចំណាយសរុបរបស់រដ្ឋាភិបាល។

កញ្ចប់ថវិកា ដែលត្រូវបានប្រកាសដោយរដ្ឋាភិបាលរបស់លោកស្រីប្រធានាធិបតី Tsai Ing-wen នៅថ្ងៃព្រហស្បតិ៍ទី២៥ខែសីហានេះ និងរង់ចាំការអនុម័តពីសភា គឺបង្ហាញពីការបង្កើនយ៉ាងខ្លាំងនៃខ្ទង់ចំណាយ បើធៀបនឹងការបង្កើនប្រហែល ៤ ទៅ ៥ភាគរយ ក្នុងរយៈពេលប៉ុន្មានឆ្នាំថ្មីៗនេះ។

លោកស្រី Tsai បាននិយាយថា ការប្តេជ្ញាចិត្តរបស់កោះដែលគ្រប់គ្រងដោយខ្លួនឯងដើម្បីការពារអធិបតេយ្យភាពរបស់ខ្លួន គឺនឹងមិនផ្លាស់ប្តូរដោយសារតែសម្ពាធឬការគំរាមកំហែងឡើយ។

ស្របពេលជាមួយគ្នានេះ លោកស្រីក៏បាននិយាយដែរថា “ក្នុងនាមជាសមាជិកដែលមានទំនួលខុសត្រូវនៃសហគមន៍អន្តរជាតិ តៃវ៉ាន់នឹងមិនបង្កឲ្យកើតមានឧប្បត្តិហេតុ ឬធ្វើឲ្យជម្លោះកើនឡើងនោះទេ”។

កាលពីឆ្នាំមុន តៃវ៉ាន់បានប្រកាសថា ខ្លួននឹងចំណាយប្រាក់បន្ថែម ៨.៦៩ពាន់លានដុល្លារនៅត្រឹមឆ្នាំ២០២៦ លើកញ្ចប់ថវិកាការពារប្រចាំឆ្នាំរបស់ខ្លួន ដើម្បីបង្កើនសមត្ថភាពកងទ័ពជើងទឹក និងធ្វើទំនើបកម្មកងកម្លាំងប្រដាប់អាវុធរបស់កោះនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ តៃវ៉ាន់ បង្ហាញសាច់ដុំយោធា ដោយបង្អួតយន្តហោះចម្បាំងផលិតដោយអាមេរិក ទំនើបបំផុត